لە سەرەتای کۆبوونەوەکەی ئەمڕۆ دوای دروستبوونی ئاڵۆزی، رێواز فایەق، سەرۆکی پەرلەمانی ماوەبەسەرچووی هەرێمی کوردستان کۆبوونەوەکەی دواخست، بەڵام هێمن هەورامی، جێگری رەتیکردەوە کۆبوونەوە دوابخرێت و کاراکردنەوەی کۆمیسیۆنی خستە دەنگدانەوە و بە ٥٨ دەنگ پەسەندکرا.

مردوو زیندوو ناکرێتەوە

رێواز فایەق سەرۆکی ماوەبەسەرچووی پەرلەمانی کوردستان بە ئێن ئاڕتی راگەیاند،"دانیشتن داخراوە واتە مردووە و مردوو زیندوو ناکرێتەوە."

زیاد جەبار سەرۆکی فراکسیۆنی یەکێتیش دەڵێت، لە شەڕەکەی ئەمڕۆدا سەری شکاوە، لەکۆنگرەیەکی رۆژنامەنوسیدا کە ئەندامانی حزبەکەی ئامادەبوون وتی:" سەرۆکی پەرلەمان بەپێی دەسەڵاتەکانی دانیشتنەکەی دواخست و ئێمە رێگریمان کرد لەوەی پارتی کاری نایاسایی بکات لەناو پەرلەماندا".

ئەوەشی خستەڕوو، دانیشتنەکە دواخرا و یاساکە تێنەپەڕێندرا، بە قسەی زیاد جەبار "لەگەڵ پارتی رێککەوتوین کە دەبێت یاسای کۆمیسیۆن بە ریککەوتن تێپەڕێندرێت".

دەربارەی پێکهاتەکانیش وتی:"پێکهاتەکان بۆ تێکدانی هاوسەنگی هێز دانراوە و ئەوەی سکرتێری پەرلەمان کردی هۆکاری ئەو گرژیەی ئەمڕۆ بوو".

پارتی چی دەڵێت؟

پێشەوا هەورامی وتەبێژی پارتی ئەوەیخستەڕوو بە دەنگی ٥٨ پەرلەمانتار کۆمیسیۆنی باڵای هەڵبژاردن کارا کراوەتەوە.

دەربارەی گرژیەکانیش وتی:"گرژی رویداوە و یەکەمجار نییە ئەوە رویداوە و لە جیهاندا ئەوە رودەدات، سیاسەتی حزبەکەمان جێبەجێ دەکەین و رێگا نادەین هەرێمی کوردستان بکەوێتەوە بۆشایی یاسایی و لەگەڵ درێژکردنەوەی ماوەی پەرلەمان نەبووین."

بەگوێرەی راگەیێندراوی دوێنێی بەرنامەی کاری پەرلەمانی کوردستان، دەبوو ئەمڕۆ دووشەممە ٢٢ـی ئایاری ٢٠٢٣ پەرلەمان کۆببێتەوە و بڕگەی یەکەمی کۆبوونەوەکەش ده‌نگدان بێت له‌سه‌ر ده‌ستله‌كاركێشانه‌وه‌ی حەوت پەرلەمانتاری فراکسیۆنی کۆمەڵی دادگەریی کوردستان. بڕگەی دووەمیش خوێندنه‌وه‌ بۆ دوو پڕۆژەیاسایە بکرایە، بەڵام بەهۆی ناکۆکییەوە لەسەر دانیشتنەکە، کۆبوونەوەکە ئاڵۆزی تێکەوت و تەنیا ئەوە بەڕێوەبرا، کە پارتی دەڵێ کۆمیسیۆن کاراکراوەتەوە و یەکێتی رەتیدەکاتەوە.

شەڕ لەسەر چی؟

هیمداد شاهین وتەبێژی جووڵانەوەی نوێ لەو بارەیەوە رایگەیاند، ٣٢ ساڵە حکومەتی پارتی و یەکێتی زوڵم لە خەڵکی هەرێم دەکەن و ماوەی پێنج ساڵە مووچە و کارەبا و خزمەتگوزاری تەندروستیان بۆ هاوڵاتیان دابین نەکردووە.

ئاماژەی بەوەشدا، سەرەڕای ئەوەی خەڵکی کوردستان سەدان کێشەیان هەیە، بەڵام نەبینرا پەرلەمانتارەکانی یەکێتی و پارتی لەسەر مافی خەڵک لە پەرلەمان شەڕ بکەن، کەچی ئێستا هەریەکە لەو دوو حیزبە لەسەر ئەندامی یەک کۆمسیۆن کردویانە بە هەرا.

هیمداد شاهین وتیشی، "بەڕاستی حیزبایەتی لای پارتی و یەکێتی مانای بەرژەوەندی حیزبی خۆیان، نەک غەم و بەرژەوەندی خەڵک."