ئەوەش هاتووە، ئەنجومەنەکە داوا لە ئەنجومەنی وەزیران دەکات رەزامەندی لەسەر تەرخانکردن و خەرجکردنی گوژمەی پێویست بۆ ئەو مەبەستە بدات.

ئەوەش راگەیاندراوە، ئەنجومەنی زانکۆی گەرمیان پاڵپشت بەو دەسەڵاتەی پێدراوە و بە رەچاوکردنی ئەم دۆخە ناهەموارە و لەبەر پاراستنی گیانی خوێندکاران و مامۆستایان و فەرمانبەرانی زانکۆ، بڕیاریدا:

١- راگرتنی دەوامی خوێندنی بەیانیان ( بەکالۆریۆس) بۆ رۆژانی سێشەممە و چوارشەممە و پێنجشەممە (١٥-١٧ /١١ /٢٠٢٢ ) .

٢- بەشە زانستییەکان خشتەی تاقیکردنەوەکان دوا دەخەن بۆ رۆژانی دواتر .

٣- ساڵنامەی خوێندن؛ جارێکی تر پێداچوونەوەی پێدا دەکرێت و بەپێی پێویست قەرەبووی رۆژانی خۆپیشاندان دەکرێتەوە .

٤-راگرتنی دەوام، خوێندنی ئێواران و خوێندنی باڵا و دەوامی کارگێری سەرۆکایەتی زانکۆ و کۆلێجەکان ناگرێتەوە .

٥- بەشەناوخۆییەکانی زانکۆی گەرمیان تا کاتژمێر (١١)ی پێش نیوەڕۆی سبەینێ سێشەممە (١٥-١١-٢٠٢٢) لە خزمەتی خوێندکاران دەبن، دواتر کاری نۆژەنکردنەوەیان تێدا بەردەوام دەبێت .

ئەمڕۆش، نووسینگەی یاریدەدەری سەرۆکی زانکۆی سلێمانی بۆ کاروباری خوێندکاران رایگەیاند، ئەنجومەنی زانکۆی سلێمانی لە کۆبوونەوەیەکی نائاسایی بڕیاریدا بە راگرتنی پرۆسەی خوێندن لە زانکۆی سلێمانی لە رۆژی سێشەممەوە رێکەوتی ١٥ی ١١ی ٢٠٢٢ و رۆژانی دواتر.

لە راگەیاندراوێکی نووسینگەکەدا هاتووە، ئەنجومەنی زانکۆی سلێمانی لە کۆبوونەوەیەکی نائاساییدا جەختی کردەوە لە پشتیوانی داواکارییە رەواکانی خویندکار بەتایبەت پێدانی دەرماڵە و پشتیوانی دارایی بۆیان.

ئەمە لەکاتێکدایە، لە سەرەتای دەستپێکردنی ساڵی نوێی خوێندنی باڵاوە بۆ ئەمساڵ، لە زانکۆی سلێمانی و زانکۆی پۆلەتەکنیکی سلێمانی و راپەڕین و هەڵەبجە و گەرمیان و چەند زانکۆ و پەیمانگایەکی دیکەی هەرێم، لەسەر پێنەدانی دەرماڵەی خوێندکاران و دابیننەکردنی پێداویستی و خزمەتگوزارییەکان خوێندکاران خۆپیشاندانیان ئەنجامداوە.

ماوەی دوو رۆژیشە خۆپیشاندانەکان بەرفراوان بوون و بەو هۆیەشەوە گرژی لە نێوان هێزە ئەمنییەکان و خوێندکاراندا دروستبووە و هێزە ئەمنییەکان گازی فرمێسکرێژیان بەرامبەر خوێندکاران بەکارهێناوە و گوللـەی پلاستیکییان بەسەردا تەقاندوون. جگە لەوەی رێگرییان لە رووماڵی خۆپیشاندانەکان کردووە لەلایەن راگەیاندنەکانەوە.
هـ.ئـ