یاریدەدەری سەرۆکی زانکۆی سلێمانی بۆ کاروباری خوێندکاران رایگەیاند، ئەنجومەنی زانکۆی سلێمانی لە کۆبوونەوەیەکی نائاسایی بڕیاریدا بە راگرتنی پرۆسەی خوێندن لە زانکۆی سلێمانی لە رۆژی سێشەممەوە رێکەوتی ١٥ی ١١ی ٢٠٢٢ و رۆژانی دواتر.
ئەمڕۆ دووشەممە، نوسینگەی یاریدەدەری سەرۆکی زانکۆ بۆ کاروباری خوێندکاران راگەیەنراوێکی بڵاوکردەوە و تیایدا هاتووە، ئەنجومەنی زانکۆی سلێمانی لە کۆبوونەوەیەکی نائاسایی لە ئەمڕۆدا جەختی کردەوە لە پشتیوانی داواکارییە رەواکانی خویندکار بەتایبەت پێدانی دەرماڵە و پشتیوانی دارایی بۆیان.
ئاماژەی بەوەشداوە، لەگەڵ ئەوەشدا لەبەر پاراستنی سەروگیانی خوێندکاران و
ئاسایش و ئارامی زانکۆی سلێمانی و دروست نەبوونی ئاستەنگی هاتووچۆ لە پارێزگای سلێمانی،
وە بەپێی ئەو دەسەڵاتەی پێیدراوە بەکۆی دەنگ بڕیاریدا بە راگرتنی خوێندنی خوێندکاران
لە سەرجەم کۆلێجەکان لە رۆژی سێشەممە ١٥ی ١١ی ٢٠٢٢ و رۆژانی دواتر.
ئەمە لەکاتێکدایە، ماوەی دوورۆژە لە زانکۆی سلێمانی و زانکۆی پۆلەتەکنیکی
سلێمانی و راپەڕین و هەڵەبجە و گەرمیان لەسەر پێنەدانی دەرماڵەی خوێندکاران و
دابیننەکردنی پێداویستی و خزمەتگوزارییەکان خوێندکاران خۆپیشاندانیان ئەنجامدا.
لە خۆپیشاندانەکانی دوێنێی خوێندکاران لە شاری سلێمانی لە نێوان هێزە
ئەمنییەکان و خوێندکارانی خۆپیشاندەر گرژی و ئاڵۆزی دروستبوو.
هەر ئەمڕۆش، خوێندکارانی زانکۆی سەڵاحەدین و پۆلەتەکنیکی هەولێر لە
کۆنفرانسێکی رۆژنامەنوسیدا راگەیەنراوێکیان لەبارەی پێنەدانی دەرماڵەی خوێندکاران
و پشتیوانیکردنی خۆپیشاندانەکانی خوێندکاران لە ناوچەکانی دیکەی هەرێم خوێندەوە و
تیایدا هۆشدارییان دایە حکومەت بەوەی ئەگەر حکومەت وەڵامی داخوازییەکانی خوێندکاران
نەداتەوە ئەوا لە رۆژانی داهاتوودا هەڵوێستی دیکەیان دەبێت.