وەزارەتی دەرەوەی روسیا ئێوارەی رۆژی شەممە ناوی ٩٦٣ هەزار کەسی دیکەی ئەمریکی راگەیاند کە رێگەیان پێنادرێت بچنە ناو خاکی روسیاوە و لەناو ناوەکانیشدا جۆو بایدنی سەرۆکی ئەمریکا و مارک زوکەربێرگ و چەندین کەسی دیکە بوونیان هەیە و یەکێک لەوانەش مۆرگان فریمان گەورە ئەکتەری ئەمریکییە.
بەگوێرەی لیستی ئەو ناوانەی بڵاوکراونەتەوە، چەندین بەرپرسی حکومی و پەرلەمانتار و چەند کەسی دیکەش بوونیان هەیە لە کۆمەڵگەی مەدەنییدا کاردەکەن و یەکێک لەوانەش ئەکتەری بەناوبانگی جیهانی مۆرگان فریمانی تەمەن ٨٤ ساڵە.
بەگوێرەی راپۆڕتێکی سکای نیوزی ئینگلیزی، قەدەغەکردنی فریمان هۆکارەکەی
گرتەڤیدیۆییەکە کە دەگەڕێتەوە بۆ ساڵی ٢٠١٧ و تێیدا دووپاتی دەکاتەوە کە روسیا سەرقاڵی
پلانگێڕییەکە دژی ویلایەتە یەکگرتووەکانی ئەمریکا.
ماڵپەڕەکە باسی لەوەشکردووە، مۆرگان فریمان ڤیدیۆکەی بڵاوکردووەتەوە بۆ هۆشیارکردنەوەی
خەڵکی لەبارەی دەستێوەردانی روسیا لە هەڵبژاردنەکانی ٢٠١٦ی ئەمریکا و لەو
کاتەشدا وتویەتی، "ئێمە لە حاڵەتی جەنگداین
و هێرشمان کراوەتە سەر."
لەبەرامبەر سزاکانیشدا، کۆشکی سپی ئەمریکا لە راگەیەندراوێکدا بە تەنزەوە
ئاماژەی بەوەکردووە، هیچ کەسێک پلانی گەشتکردنی نییە بۆ روسیا و دەشڵێت، بە هەڵە مۆسکۆ
سزای بەسەر بایدندا سەپاندووە."
ئەمەش لە کاتێکدایە، ماوەی ٨٨ رۆژە هێرشەکانی روسیا بۆ سەر ئۆکرانیا دەستی
پێکردووە و ئەمریکا و یەکێتی ئەوروپا روسیا تۆمەتبار دەکەن بە دەستدرێژی کردن بۆ سەر
خاک و سەروەری وڵاتانی دیکە و چەندین سزای ئابورییان بەسەردا سەپاندووە.