بۆ ساڵی نوێی خوێندنیش، وەزارەتی پەروەردەی هەرێم، وەک نەریتی ساڵانەی خۆی پلان و ساڵمانەی خوێندنی بڵاوکردەوە و تیایدا سەرجەم رۆژانی پشووی ئەمساڵی خوێندنی ئاشکرا کرد.

لەبارەی وتنەوەی وانەکان و دەسپێکردنی خوێندەوە، وەزارەتی پەروەردەی هەرێم، بڕیاریدا وەک تەواوکردنی پرۆسەی خوێندنی ساڵی رابردوو، کەبەهۆی ڤایرۆسی کۆرۆناوە نەتوانرا وەک پێویست سەرجەم بابەتەکان بخوێندرێن و قەرەبووی خوێندکاران بکرێتەوە، بڕیاریدا بۆ سەرجەم قۆناغەکان جگە لە قۆناغی یەکی بنەڕەتی و حەوتی بنەڕەتی و ١٠ی ئامادەیی، سێ هەفتەی یەکەمی ساڵی نوێی خوێندن بابەتە تەواونەکراوەکان تەواوبکرێن و لەو ماوەیەشدا هیچ جۆرە تاقیکردنەوەیەک ئەنجام نادرێت.

هەروەها، پێشتریش دڵشاد عومەر بەڕێوەبەرى گشتى پەروەردەى سلێمانى لە لێدوانێکدا بە ئێن ئاڕ تى راگەیاندبوو، "پۆلی ١ و ٧ ی بنەرەتی و ١٠ و ١٢ی ئامادەیی بۆ ساڵی نوێی خوێندن پێداچوونەوە ناکەن و راستەوخۆ دەستدەکەن بە خوێندنی وانەکانی ساڵی نوێ.

لەبارەی چۆنییەتی روبەڕوبوونەوەی پەتای ڤایرۆسی کۆرۆنا لە ماوەی پرۆسەی خوێندنی ئەمسال، ئالان حەمە سەعید وەزیری پەروەردەی هەرێم ئاشکرای کرد، بەستی ماسک ناچارییە و دەبێت ماسک بەکاربهێندرێت.

راشیگەیاند، دوو ملیۆن و ٥٠٠ هەزار ماسک و ٥٠ هەزار پاکەرەوە "تەعقیم"یان داناوە و بەسەر خوێندگەکاندا دابەشیدەکەن.

لەلایەن خۆشییەوە، بەڕێوەبەرایەتی تەندروستی سلێمانی ئاشکرای کرد، "وەرگرتنی ڤاکسین و بەکارهێنانی دەستکێش و دەمامک لەلایەن مامۆستایان و خوێندکاران بەهەند وەردەگیرێت."

هەر لەسەرەتای دەستپێکردنی خوێندنی ئەمساڵەوە، یەکێک لەو ئاڵنگارییانەی دێتە بەردەم پرۆسەکە، چارەسەر نەکردنی کێشەی مامۆستایانی وانە بێژەوە و لەو بارەشەوە لەماوەی رابردوودا کارزان جەمال نوێنەری مامۆستایانی وانەبێژ بە ئێن ئاڕ تی راگەیاند، لە شاری هەولێر نوێنەرانی مامۆستایانی وانەبێژ کۆبوونەتەوە و تیایدا بڕیاردراوە کە رۆژی ٢٠ی ئەم مانگە هەڵوێستی خۆیان لەرێگای "فشارە مەدەنییە جۆراوجۆرەکانەوە" دەرببڕن.

لە هەرێمى کوردستان نزیکەى ٢٠ هەزار مامۆستای وانەبیژ هەیە کە ئەمانە دانەمەزراون و پێشتر حکومەتى هەرێم شایستەیەکى دیاریکراوى بۆ بڕیبوونەوە بەبڕى ٣٠٠ هەزار بۆ مامۆستایانى هەڵگرى بروانامەى بەکالۆریۆس و ٢٥٠ هەزار دینار بۆ هەڵگرانى بڕوانامەى دبلۆم.

بەڵام لە مانگی ٢ی ئەمساڵەوە بەپێى بەشە وانەکان شایستەى داراییان بۆ خەرج دەکرێت و ئەوەش نارەزایەتییەکى زۆرى لەلاى مامۆستایانى وانەبێژ دروستکردووە و بەشێک لە مامۆستایانى وانەبێژ وەکو نارەزایەتییەک خۆپیشاندانیان لەبەردەم پەروەردە جیاوازەکان و ئەنجومەنى وەزیران ئەنجامدا، بەڵام تا ئێستا هیچ بڕیارێک نەدراوە بۆ دامەزراندنیان.

لەماوەی رابردوودا، دوای ئەوەی بەهۆی سەرهەڵدانی ڤایرۆسی کۆرۆنا و تۆمار کردنی یەکەم کەیس لە عێراقدا، لە ٢٦ی شوباتی ٢٠٢٠ەوە، پرۆسەی خوێندن لە هەرێم راگیرا و دواتر بەچەند قۆناگێک و بە گرتنە بەری شێوازی خوێندنی ئەلیکترۆنی و دواتر خوێندنی ئاوێتەی ئەلیتکرۆنی و ئامادەبوون لەناو هۆڵەکانی خویندندا، دواجار بۆ خوێندنی ئەمساڵ وەزارەتی پەروەردەی هەرێم بڕیاریدا بەدەستپێکردنەوەی دەوامی خوێندن لە نێو خوێندگاکانی هەرێم لەرۆژی ١٤ی ئەم مانگەدا، بەپابەندبوون بەتەواوی رێنماییە تەندرووستییەکان لەلایەن مامۆستایان و فەرمانبەران و خوێندکارانەوە.

كـ، ئـ