نوسەر بەپێی ئەزمونی خۆی باسی لەوە کردووە کە ئەو وێنەو گرتە ڤیدیۆیی و دەنگانەی لەڕێگەی تۆڕە کۆمەڵایەتیەکانەوە بڵاودەکرێنەوە، دەکرێت ھەندێکیان ببنە سەرچاوەی باش و بەشێکیشیان ببنە چەکێکی ترو لەنێو ئەو فەوزا سیاسی و ئیداریەی کوردستان، وەک چەکێک دژی نەیارە سیاسیەکان و کەسایەتیە دیارەکانی کۆمەڵگە بەکاربھێنرێن.

نوسەر دەڵێت، بەشاھیدی دەوروبەرەکەی و ئەوانەی کاری لەگەڵ کردون، ھەمیشە وردبینی کارکردنی خستوەتە پێش ھەموو شتێکی ترەوە.

ھەر بۆیە بەشێک لەڕۆژنامەنوسان و دەزگاکانی راگەیاندن لەپێناو زوو دابەزینی ھەواڵ و گرتەو وێنەکان، ھەڵپەدەکەن و وێنەو گرتە ڤیدیۆییەکان، بێ ھیچ بەدوادواچون و لێکۆڵینەوەیەک دادەبەزێنن، ئەوەش گرفت و کێشەی یاسایی لێدەکەوێتەوە.

نوسەر "رێبوار ئەوڕەحمان" لەپێشەکی کتێبەکەیدا رەخنە لەکەناڵ و دەزگاکانی راگەیاندن دەگرێت و دەڵێت، کەمیان ھەیە وۆرکشۆپ و بەدواداچون و لێکۆڵینەوەی ورد رێکبخەن بۆ رۆژنامەنوس و کارمەندەکانیان و دەوڵەمەندیان بکەن بە زانیاری و زانستی نوێ لەبوارە جیاکانی میدیا.

نوسەر لەکتێبەکەیدا ھەوڵیداوە رۆژنامەنوس بەو میکانیزم و ئامرازانە ئاشنا بکات کەدەتوانێت لە رێگەیانەوە لێکۆڵینەوە لەوێنەیەک یاخود گرتەیەکی ڤیدیۆیی بکات کاتێک لەسۆشیال میدیا بڵاودەکرێنەوە، تا بتوانرێت بەوردیی‌ و راسترین زانیاری بگەیەنرێتە وەرگران.

لەم کتێبەدا زانیاریەکان و وشەکان بەزمانێکی سادە نوسراون و ھەوڵدراوە لە بەکارھێنانی ئەو زاراوانەی پەیوەست بەسایت و بزوێنەرەکانە، ئەو وشانە بەکاربھێنرێن کە لەناو خەڵکدا زۆر باوە و ئاسانن لەسەر زمانی خەڵک.

ھەروەک نوسەر پۆزشی ھێناوەتەوە بۆ ئەوەی کەناوی ھەندێک دەزگاو ناوەندی راگەیاندنی ھێناوە لەکتێبەکەیدا، مەبەست شکاندن و سوکایەتیی نەبوە، بەڵکو ئامانج لێی خستنەڕووی تێپەڕبونی چەند ھەڵەیەک بووە لەنێو ئەو دەزگا و ناوەندە راگەیاندنانەی ھەڵە تیایاندا تێپەڕیوە و کاریگەریشی لەسەر وەرگر دروستکردووە.

(گومان لەچاو) کتێبێکی گرنگ بۆرۆژنامەنووسان

نووسین و ئامادەکردنی: رێبوار ئەورەحمان