ماوەیەکە لە ئیسپانیا بیرۆکەیەک دروستبووە بە بردنەدەرەوەی هەندێک لە گرنگترین یارییەکانی خولەکە بۆدەرەوەی وڵاتەکە بەتایبەت بۆ ویلایەتە یەکگرتووەکانی ئەمریکا.

ئەوەی جێگەی سەرنجە خافێر تیباسی سەرۆکی لالیگا داکۆکیکارێکی سەرسەختی بیرۆکەکەبوو، واچاوەڕواندەکرا یاریی نێوان بەرشەلۆنە و ئاتلێتیکۆ مەدرید کە 21ی مانگی داهاتوو رووبەڕووی یەکتردەبنەوە، لە شاری مەیامی ئەمریکا بەڕێوەبچێت، بەڵام یەکێتی تۆپی پێی ئیسپانیا لە راگەیاندرواێکیدا رایگەیاند ئەو پلانە وەستێنراوە و یارییەکە هەر لە ئیسپانیا  و لە یاریگای بارسا بەڕێوەدەچێت.

رۆژنامەی گاردیانی ئینگلیزی هۆکارەکانی ڕونکردووەتەوە و رایگەیاندووە بیرۆکەکە لەئێستادا بۆ هۆکاری نەبوونی رەزامەندی دەگەڕێنێتەوە کە هێشتا فیفا، یویفا و یەکێتی تۆپی پێی ئیسپانیاش رەزامەندییان پیشان نەداوە بۆ بردنەوەی دەرەوەی یارییەکان.

ئەوەی جێگەی سەرنجە ئامانجی تیباس لەم کارەدا بە پلەی یەکەم بۆ ئەوەبووە هاندەرانی ئەو وڵاتەش لە نزیکەوە چێژ لە بینینی یاریی یانەکانی خولی ئیسپانی ببینن و لەسەر ئاستی جیهان رێژەی بینەرانیان زیاتر بکەن.

سەرچاوەکە ئەوەی ئاشکراکردووە پلانەکە لەئێستادا راگیراوە، بەڵام هێشتا بۆ وەرزی 2025-2026 ئەگەرێکی کراوەیە و تیباس پێداگرە لەسەر کارەکەی.