PM:09:36:18/09/2024
380 جار خوێندراوەتەوە
+
-
قۆناغی یەکەمی
بەهێزترین پاڵەوانێتی ئەوروپا بەردەوامی هەیە و پێنجشەممە بە ئەنجامدانی شەش یاری
هەفتەی یەکەم کۆتاییدێت.
لە کاتژمێر 10ی
شەودا، یانەی بەرشەلۆنەی ئیسپانی لەدەرەوەی یاریگای خۆی رووبەڕووی یانەی مۆناکۆی
فەرەنسی دەبێتەوە.
بەرشەلۆنە لەم
وەرزەدا بە ئاستێکی نایابەوە دەرکەوتووە و پێنج یاری ئەنجامداوە لە سەرجەمیاندا
بردنەوەی بەدەستهێناوە و بە کۆکردنەوەی 15 خاڵ لە پێشەنگی خولی ئیسپانیدایە،
ئامانجی ئەوەیە بەردەوامی بدات بە ئەنجامە باشەکانی.
بەرشەلۆنە
لە مێژوویدا تەنها دوو جار لە چامپیۆنز لیگدا رووبەڕووی مۆناکۆی فەرەنسی بووەتەوە
کە لە وەرزی 1993 بۆ 1994دا بووە و لە هەردوو یاریەکەدا براوە بووە، سێ گۆڵی
تۆمارکردووە و گۆڵی لێنەکراوە.
بەشێکی زۆری هۆکاری
ئەنجامە باشەکانی یانە کەتەلۆنیەکە لەم وەرزەدا بۆ هانسی فلێکی راهێنەری نوێی ئەو
یانەیە دەگەڕێتەوە و کاریگەرییەکانی بە خێرایی لەسەر ئەو یانەیە دەرکەوتووە.
لە هەمان کاتدا،
یانەی ئارسناڵی ئینگلیزی لە یاریەکی بەهێزدا لەدەرەوەی یاریگای خۆی رووبەڕووی
یانەی ئەتڵانتای ئیتاڵی دەبێتەوە.
ئارسناڵ
لە مێژوویدا نەیتوانیوە هیچ نازناوێکی چامپیۆنز لیگ بەدەستبهێنێت و تا ئێستاش 211
یاری لەو پاڵەوانێتییە ئەنجامداوە، 106 بردنەوە و 45 یەکسانبوون و 60 شکستی هەبووە،
351 گۆڵی تۆمارکردووە و 226 گۆڵی لێکراوە.
لە یاریەکی تریشدا،
یانەی ئەتلەتیکۆ مەدریدی ئیسپانی لە یاریگای واندا میترۆ پۆلیتانۆ میوانداری یانەی
لایپزیگی ئەڵمانی دەکات.
ئەتلەتیکۆ
مەدرید لە مێژوویدا سێ جار گەیشتووەتە یاری کۆتایی چامپیۆنز لیگ و لە سەرجەمیاندا
تووشی شكستبووە، لە ساڵی 1974 بە بایرن میونشن دۆڕاوە و لە 2014 و 2016 بەرامبەر
ریاڵ مەدرید تووشی شكستهاتووە.
لە کاتژمێر حەوت و
45 خولەکیشدا، یانەی بەنفیکای پورتوگالی لە دەرەوەی یاریگای خۆی دەبێتە میوانی
زڤیزدای سڕبی، یانەی بایەر لیڤەرکوزنی پاڵەوانی وەرزی رابردووی خولی ئەڵمانیاش
رووبەڕووی یانەی فاینۆرد رۆتەردامی هۆڵەندی دەبێتەوە.
خ . ک