دی لا فۆنتێ: یاری داهاتوومان قورسە

PM:02:00:05/09/2025

92 جار خوێندراوەتەوە

+ -

دی لا فۆنتێ دوپاتیکردەوە لە تایمی دووەم ئاستیان باش نەبووە و یاری داهاتووشیان بەرامبەر تورکیا قورسە.

پاش بردنەوەیان لە بولگاریا، دی لا فۆنتێی راهێنەری هەڵبژاردەی ئیسپانیا رایگەیاند، لە تایمی یەکەم ئاستێکی باشیان پێشکەش کردووە و بە نزیکەی یارییەکەیان یەکلایکردووەتەوە، بەڵام لە تایمی دووەم کەتوونەتە ژێر کاریگەری ریتمی تیپی بەرامبەر، سەرەڕای ئەوەش گرنگترین شت ئەوەیە هەموو یاریزانەکانی سەلامەتن و بەبێ پێکان یاریگایان بەجێهێشتە.

وتیشی: یەکێک لە ئامانجەکانی ئێمە گەرانەوەی رۆدری و کارڤاخاڵ بوو، گەڕانەوەیان بێ هۆکار نەبوو بەڵکو شایستە بوون، بەشێوەیەکی گشتی لە ئاستی تیپەکەم رازیم، چ ئەو یاریزانانەی یارییان کرد، چ ئەو یاریزانانەی یارییان نەکرد.

جەختی لەسەر ئەوەشکردەوە، دەکرا ئاستێکی باشتر پێشکەش بکەن و پێویستە رەخنە لە خۆیان بگرن، چونکە لە تایمی دووەم ئاستیان وەک پێویست نەبووە.

سەبارەت بە یاری داهاتوویان بەرامبەر تورکیا وتی: یاریی بەرامبەر تورکیا قورستر و پڕ لە ئاستەنگ دەبێت، هەمیشە بەدوای پێشکەوتنی بەردەوامدا دەگەڕێین و ئەوە ئامانجی ئێمەیە، یەکشەممەش هەمان شت دەبێت، ئەم مانگە ئاڵۆز و قورسە، بەڵام دەبێت هەنگاوی ئاسایی خۆمان بنێین، پێداچوونەوە بە ئاستی خۆماندا زۆر گرنگە.