کەشناسی هەرێم رایگەیاند، جگە لە پارێزگای سلێمانی بڕی بارانبارین لەمساڵدا لە سەرجەم پارێزگاکانی دیکە بەراورد بە ساڵی رابردوو زیادی کردووە.
ئەمڕۆ یەکشەممە، بەڕێوەبەرایەتی گشتی كەشناسی و بوومەلەرزەزانیی هەرێم ئاماری بارانبارینی پارێزگاکان لە ماوەی ئەمساڵدا بڵاوکردەوە و ئاماژەی بەوە کرد، لە پارێزگای دهۆک زۆرترین بڕی باران باریوە کە زیاتر لە ٨٢٣ ملم بووە و لە پارێزگای کەرکوک کەمترین بڕی باران باریوە کە ٣٤٦.٤ ملم بووە.
باسی لەوەش کرد، لە ماوەی ئەمساڵدا لە پارێزگای هەولێر
٥٨٤.٢ ملم باران باریوە و بەراورد بە ساڵی رابردوو کە ٢٥١.٩ ملم بووە، ٣٣٢ ملم زیادی
کردووە.
ئەوەشی خستووەتە روو، لە پارێزگای سلێمانی بە تێکڕا لە
ماوەی ئەمساڵدا ٦٧٢.٥ ملم باران باریوە و بەراورد بە ساڵی رابردوو ٦٠ ملم کەمی
کردووە، بەوپێیەی بڕی باران لە ساڵی ٢٠٢٣ـدا ٧٣٢.٨ ملم بووە.
هاوکات، لەمساڵدا زۆرترین بڕی باران لە پارێزگای دهۆک
باریوە کە ٨٢٣.٣ ملم بووە و بەراورد بە ساڵی رابردوو کە تێیدا ٣٨٨.٤ ملم بارانی لێ
باریوە، ٤٣٤.٩ ملم زیادی کردووە.
لە پارێزگای کەرکوکیش ٣٤٦.٤ ملم باران باریوە و بەراورد
بە ساڵی رابردوو ١٠١.٥ ملم زیادی کردووە کە بە تێکڕا ٢٤٤.٩ ملم بارانی لێ باریبوو.
بڕی بارانبارین لە پارێزگای هەڵەبجەش بە تێكڕا ٨١١.٦ ملم
بووە و لە ساڵی رابردوودا ٥١٤.٦ ملم بارانی لێ باریوە و بەوەش ٢٩٧ ملم زیادی کردووە.