وەزارەتی کشتوکاڵ و سەرچاوەکانی ئاوی هەرێم رایگەیاند، بەپێی ئەو پێشبینییانەی پێیان گەیشتووە، شەپۆلێکی چڕی بارانبارین لە رۆژانی دووشەممە و سێشەممەی ئەم هەفتەیەدا بەڕێوەیە. دەشڵێت، "پێویستە ئامادەسازی پێشوەختە بۆ لافاو بکرێت".
ئەمڕۆ یەکشەممە، وەزارەتی کشتوکاڵ و سەرچاوەکانی ئاوی هەرێم رایگەیاند، بەپێی ئەو پێشبینییانەی لە کەشناسی "یو ئێس جی ئێس"ـی ئەمریکی و سەرچاوەکانی ئاوی عێراق و کەشناسی هەرێمی کوردستان پێیان گەیشتووە، شەپۆلێکی چڕی بارانبارین بەڕێوەیە.
ئاماژەی بەوەش کرد، شەپۆلی
بارانبارینەکە بەتایبەتی دەکەوێتە رۆژانی ١٨ و ١٩ـی ئەم مانگە کە دەکات رۆژی دووشەممە
و سێشەممەی ئەم هەفتەیە.
ئەوەشی خستە روو، بۆ تێپەڕاندنی شەپۆلەکە
بە سەلامەتی و پاراستنی سەروماڵی هاوڵاتیان و پڕۆژەکان، پێویستە ئامادەسازی پێشوەختە
بۆ لافاو بکرێت و داواش لە هاووڵاتیانی نیشتەجێی سنوری بەنداوەکان و کەنار چەم و
رووبارەکان، دەکەن لە هەر ئەگەرێکی بەرزبونەوەی ئاستی ئاودا ئاگاداربن و خۆیان
بپارێزن.
هەر ئەمڕۆ، بەڕێوەبەرایەتی گشتی کەشناسی
هەرێم رایگەیاند، سبەی دووشەممە شەپۆلێکی بارانبارین روو لە سەرجەم ناوچەکانی هەرێم
دەکات و لە رۆژی سێشەممەدا روو لە زیادبوون دەکات بەشێوەی بارانی بەخوڕ. دەشڵێت، رۆژی
چوارشەممەی ئەم هەفتەیە بارانبارین کۆتایی دێت.