بۆمبهاوێژى 'بی وەن' کە بە یەکێک لە توانا بێهاوتاکانى ئاسمانیی ئەمریکا دادەنرێت بەوە جیادەکرێتەوە فڕۆکەیەکی دوورمەودا و کیشوەربڕە و دەتوانێت لە دوورترین مەودادا ئامانجەکەی بپێکێت، کە بەپێی ڕاپۆرتێکی ماڵپەڕی هێزی ئاسمانی ئەمریکا، فڕۆکەکە گەورەترین بۆمب هەڵدەگرێت ئەمەش لەباری ئاسایی خۆیدا هەروەها بە کاریگەرترین بۆمبهاوێژى دوورمەودای وڵاتەکەش دادەنرێت کە خێرایی فڕۆکەکە توانای بەزاندنی دیواری دەنگی هەیە.

بە گوێرەی ماڵپەڕێکی ئەمریکی تایبەت بە فڕۆکە، درێژیی بۆمبهاوێژی بی وەن ٤٤ مەتر و ٥٠ سانتیمەترە و بەرزییەکەی ١٠ مەتر و ٤٠ سانتمەترە و کێشی فڕۆکەکەش زیاتر لە ٨٦ تەنە هەروەها تواناى هەڵگرتنی زیاتر لە ٢٢ تەن لە چەک و تەقەمەنی هەیە، خێراییەکەشی دەگاتە زیاتر لە هەزار و ٤٠٠ کیلۆمەتر لە کاتژمێرێکدا کە لەلایەن دەستەیەکى فڕۆکەوانى چوارکەسیەوە لێدەخوڕدرێت.

فڕۆکەکە بۆ یەکەم جار لە ساڵی ١٩٨٥ چووە بوارى خزمەتەوە لە سوپای ئەمریکا و یەکەمینجار فڕۆکەکە لە ساڵی ١٩٩٨ بەکارهێنرا لە ئۆپەراسیۆنی (رێوی بیابان) لە عێراق کە چەند بارەگایەکی سوپای ئەوکاتەی عێراقی پێکا.

بەڵام لە ئێستادا فڕۆکە زەبەلاحەکە بەرەو خانەنشین بوون دەڕوات و وەزارەتى بەرگرى رایگەیاندووە کە پلانیان هەیە تا ساڵى ٢٠٣٠ کۆتایی بە خزمەتى ئەم فڕۆکەیە بهێنێت.