ئاماژە بەوەش کراوە، لەو کاتەدا کە هێرشەکە ئەنجامدراوە، فڕۆکەیەکی سەربازی ئەمریکا دەگەڕایەوە بۆ بنکە سەربازییەکە، بەوهۆیەوە سەربازانی ئەمریکا فڕۆکە بێ فڕۆکەوانەکەیان لەگەڵ فڕۆکەکەی ئەمریکا لێ تێکەڵ بووە و هیچ هەوڵێکیان نەداوە بۆ خستەخوارەوەی فڕۆکە بێ فڕکەوانەکە.

ئەوەش خراوەتە روو، فڕۆکە بێ فڕۆکەوانەکە شوێنی مانەوەی هێزەکانی ئەمریکای کردووەتە ئامانج بۆیە بووەتە هۆی گیان لەدەستدانی سێ سەربازی و برینداربوونی زیاتر لە ٤٠ سەرباز.

ئەمەش لەکاتێکدایە، رۆژی یەکشەممەی ئەم هەفتەیە لەلایەن فڕۆکەی بێ فڕۆکەوانەوە هێرش کرایە سەر بنکەیەکی سەربازی ئەمریکا (تاوەری ٢٢) لە ئوردن و بووە هۆی گیان لەدەستدانی سێ سەربازی ئەمریکی و برینداربوونی زیاتر لە ٤٠ سەربازی دیکە.

دوابەدوای هێرشەکە، جۆ بایدن سەرۆکی ئەمریکا رایگەیاند، گروپە چەکدارەکان لە عێراق و سوریا بە ئەنجامدەری ئەو هێرشە دادەنێن و بە دڵنیاییەوە وەڵامیان دەبێت بۆ ئەو هێرشە.

تاوەری ٢٢ دامەزراوەیەکی ئەمریکییە لە خاکی ئوردن، لەسەر سنووری نێوان ئوردن و عێراق و سوریا، ئەندازیاری و فڕۆکەوانی و لۆجستی و ئاسایشی ئەمریکای تێدایە و نزیکەی ٣٥٠ کارمەندی سوپای ئەمریکا و هێزی ئاسمانی تێدایە.