بەڕێوەبەرایەتی گشتی ئاو و ئاوەڕۆی هەرێم رایگەیاند، ماوەی لێخۆشبوونی هاوبەشانی ئاو بەڕێژەی ١٥٪ تا رێکەوتی ٩ی حوزەیرانی ئەمساڵ درێژکراوەتەوە.
ئەمڕۆ چوارشەممە، بەڕێوبەرایەتی گشتی ئاو و ئاوەڕۆی هەرێم راگەیەنراوێکی بڵاوکردەوە و تیایدا هاتووە، لێخۆشبوونی ١٥% ی قەرزی ئاو تا ٩ی حوزەیرانی ئەمساڵ بەردەوام دەبێت.
راگەیەنراوەکە ئاماژەی بەوەداوە، بە لەبەرچاوگرتنی دۆخی دارایی هاوڵاتیانی
هەرێمی كوردستان و لەپێناو بەرژەوەندی گشتی، لێخۆشبوونی ١٥%ی قەرزی ئاو بۆ هاوبەشانی
ئاو تا ٩ی حوزەیرانی ئەمساڵ بەردەوام دەبێت
بەپێی رێنمایی دارایی ژمارە ٤ی ساڵی ٢٠٢٢.
ئەوەشی خستووەتەڕوو، تەواوی بەڕێوەبەرایەتی و فەرمانگەكانی سەر بە بەڕێوەبەرایەتی
گشتی ئاو و ئاوەڕۆ لە شارو شارۆچكەكانی هەرێمی ئاگادار كراونەتەوە بۆ كاركردن بەو رێنماییە
و جێبەجێكردنی تا بەرواری دیاری كراو.
ئەمە لەکاتێکدایە، حکومەتی هەرێم لەماوەی رابردوودا بەهۆی سەرهەڵدانی
کۆرۆنا و دابەزینی نرخی نەوت و قەیرانەکانەوە، بڕیاری لێخۆشبوونی ١٥٪ی هاوبەشانی
ئاوی لە هەرێم دەرکرد و چەند جارێک مۆڵەت و وادەی لێخۆشبوونەکەی، بەمەبەستی
دانەوەی قەرزی ئاو لەلایەن هاوڵاتییانەوە، نوێ کردووەتەوە.