حکومەتی عێراق چەند بڕیارێکی سەبارەت بە مامۆستایان لە بەغدا و پارێزگاکانی دیکە دەرکرد، یەکێک لە بڕیارەکان، دابەشکردنی پارچە زەوی نیشتەجێبوونە بەسەر مامۆستایان، هەروەها لیژنەیەک بۆ دروستکردنی یەکەی نیشتەجێبوون بۆ مامۆستایان و فەرمانبەرانی پەروەردە پێکبهێنرێت.
ئەمڕۆ سێشەممە ٨ـی نیسانی ٢٠٢٥، بەپێی راگەیەندراوێکی نوسینگەی سەرۆکی ئەنجومەنی وەزیرانی عێراق، ئەنجومەنەکە چەند بڕیاریکی تایبەت بە مامۆستایان و فەرمانبەرانی وەزارەتی پەروەردە دەرکرد.
بڕیارەکانی ئەنجومەنی وەزیرانی عێراق بریتین لەمانە:
- بەردەوامبوون لە رێکارەکانی دابەشکردنی
زەوی بەسەر فەرمانبەرانی پەروەردە و فێرکاریی لە بەغدا و پارێزگاکانی دیکە،
هەروەها لیژنەیەکی باڵا پێکبهێنرێت بۆ جێبەجێکردنی نووسراوی دیوانی سەرۆکایەتیی
ئەنجومەنی وەزیران - دەسەڵاتی باڵا، بۆ هەماهەنگیی نێوان پارێزگاکان، کە رەزامەندی
سەرۆکی حکومەت لەخۆدەگرێت بۆ دامەزراندنی گەڕەکی تایبەتی نیشتەجێبوون بۆ
فەرمانبەران و کادیرەکانی وەزارەتی پەروەردە بە بەشداریی سەندیکای مامۆستایان لە
بەغدا و پارێزگاکانی دیکە.
- وەزارەتی دارایی عێراق کرێی گواستنەوەی
سەرپەرشتانی پەروەردەیی دابین دەکات، وەک لە بودجەی هەر بەڕێوەبەرایەتییەکی
پەروەردەی سەر بە وەزارەت تەرخان کراوە.
- وەزارەتی پەروەردە بڕی ١٠٠ هەزار دینار بۆ
بەڕێوەبردنی کاری ئیدارەی قوتابخانەکان خەرج دەکات، بۆ هەر وەرزێکی خوێندن.
- چالاککردنی سەرجەم بڕگەکانی یاسای پاراستنی
مامۆستا، ژمارە ٨ـی ساڵی ٢٠١٨.
- ئامارگیرییەکی ئەو قوتابخانانە بکرێت کە ١٠٠
کیلۆمەتر لە سەنتەری شارەکانەوە دوورن، بۆ زانینی کەمیی میلاکاتی مامۆستا و
فەرمانبەران، تاوەکوو چارەسەرێکی گونجاویان بۆ بدۆزرێتەوە.
- وەزارەتی دارایی عێراق دیراسەی هەژمارکردنی
ساڵانی خزمەتکردنی بێبەرامبەر دەکات، بۆ مەبەستی پاداشت و پلەبەرزکردنەوە.
- پێدانی قەرزی دارایی بە فەرمانبەرانی
پەروەردەیی و لە بانکە حکومەتییەکانەوە، بە رێژەیەکی کەمی سوود، بۆ بەرزکردنەوەی
ئاستی ژیان.