ئاماژەی بەوەش کرد، بەپێی ئامارە سەرەتاییەکان ژمارەی ئەو دوکانانەی بەهۆی ئاگرەکەوە سووتاون بە نزیکەی ٣٧٢ دوکان مەزەندە دەکرێت.

باسی لەوەش کرد، ئاگرەکە زیانی گیانی نەبووە و تەنها چەند کەسێک بەهۆی ئاگرەکەوە بریندار ببوون و لەدوای گەیاندنیان بە نەخۆشخانە چارەسەری پێویستیان بۆ کراوە. وتیشی، تا ئێستا هۆکاری ئاگرکەوتنەوەکە دیار نییە.

ئەوەش لەکاتێکدایە، شەوی ٥ـی ئایار ئاگر لە بازاڕی قەیسەری هەولێر کەوتەوە و چەندان تیمی بەرگری شارستانی هەولێر خرانە ئامادەباشییەوە بۆ کۆنتڕۆڵکردنی ئاگرەکە و دوای زیاتر لە چوار کاتژمێر لەلایەن تیمەکانی بەرگری شارستانییەوە کۆنتڕۆڵ کرا.

هاوکات، بۆ دووەم جاریشە لە ساڵی ٢٠١٨ـەوە، ئاگرێکی گەورە لە بازاڕی قەیسەری هەولێر بکەوێتەوە و لەمساڵدا چوارەم رووداوی گەورەی ئاگرکەوتنەوەیە لە بازاڕەکانی هەولێردا.

٢٧ـی شوباتی ئەمساڵ، ئاگر لە بازاڕی لەنگەی شاری هەولێر کەوتەوە، ئەوکات پارێزگاری هەولێر رایگەیاند، ١٦٦ دوکان بەتەواوی سوتاون نزیکەی ٩٠ کەس بەهۆی ئاگرەکەوە تەندروستییان تێکچووە کە ٢٤ کەسیان رەوانەی نەخۆشخانە کران.

دواتر و لە ٨ـی نیسانی ئەمساڵدا، دووبارە ئاگر لە بازاڕی لەنگەی هەولێر کەوتەوە و ئەمجارە بەهۆی ئاگرەکەوە نزیکەی ٥٠ دوکان سوتان، ئەوەش سێیەم رووداوی ئاگرکەوتنەوە بوو لە بازاڕەکە لە ساڵی ٢٠١٨ـەوە.

لە ٢٣ـی نیسانی ئەمساڵیشدا، ئاگر لە بازاڕی شێخەڵای هەولێر کەوتەوە و بەهۆیەوە چەندین دوکان سوتان و کاسبکاران دووبارە زیانێکی زۆریان بەرکەوت.

هاوکات، لە سەرجەم رووداوەکانی ئاگرکەوتنەوەدا لەمساڵدا، زیانێکی زۆر بەر کاسبکار و خاوەن دوکانەکان کەوتووە، حکومەتی کاربەڕێکەریش تا ئێستا قەرەبووی ئەو کەسانەی نەکردووەتەوە کە بەهۆی ئاگرکەوتنەوەوە زیانیان بەرکەوتووە و زۆربوونی ژمارەی رووداوەکان، گومانی لای هاوڵاتییان و کاسبکاران دروست کردووە.