ئاماژەی بەوەش کرد، کاری لەپێشینەی حکومەتی عێراق بریتییە لە چارەسەرکردنی کێشەی نەوتی هەرێم بە رێگەی یاسایی و دەستووری و بۆ ئەو مەبەستەش لەگەڵ وەفدێکی وەزارەتی نەوتی تورکیا سەبارەت بە دیاریکردنی کرێی گواستنەوی یەک بەرمیل نەوتی هەرێم کۆبوونەتەوە. وتیشی،" بەگرنگیەوە لە هەناردەی نەوتی هەرێم دەڕوانین".

هاوکات لەو بارەیەشەوە، چاوگێکی ئاگادار لە لیژنەی تەکنیکی نەوتی عێراق بە دیجیتاڵ میدیای ئێن ئاڕ تی راگەیاند، هەفتەی رابردوو دوای تاقیکردنەوەی پەمپکردنی بۆریی نەوتی کەرکوک-موسڵ-تورکیا ئەنجامەکان ئەرێنی بوون بۆ هەناردەی نەوت.

باسی لەوەش کرد، ئەمڕۆ توانای بۆریەکە تاقیکرایەوە بۆ پەمپکردنی گاز ، لە ئێستاشدا ئەو بۆرییە بە تەواوی ئامادەکراوە بۆ هەناردەی نەوتی هەرێم لە رێگەی بەندەری جەیهانەوە.

لەلایەکی تریشەوە چاوگێک لە وەزارەتی سامانە سروشتیەکانی حکومەتی کاربەڕێکەر بە ئێن ئاڕ تی ڕاگەیاند، پێشبینی دەکرێت هەناردەی نەوتی هەرێم بکەوێتە دوای سەردانەکەی رەجەب تەیب ئەردۆغان سەرۆک کۆماری تورکیا بۆ عێراق. وتیشی، "پرسی نەوتی هەرێم پێویستی بە کۆبوونەوەی سەرۆک وەزیرانی عێراق و سەرۆک کۆماری تورکیایە و لەدوای ئەو کۆبوونەوەیەوە دەست بە هەناردەی نەوتی هەرێم دەکرێت، بەگوێرەی رێککەوتنەکانیش، لەبەرامبەر هەر بەرمیلێک نەوت، ٤٠ دینار وەردەگیرێت".
لەو بارەیەشەوە بەرپرسێکی باڵا لە وەزارەتی نەوتی عێراق بە دیجیتاڵ میدیایی ئێن ئاڕ تی راگەیاند، پێشبینی دەکەن کە لە ناوەڕاستی مانگی ئایاردا دەست بە هەناردەی نەوتی هەرێم بکرێتەوە لە رێگەی بۆریی نەوتی کەرکوک-جەیهان و بەشێکیشی لە رێگەی بۆریی نەوتی کەرکوک – موسڵ- تورکیا هەناردە دەکرێت.

ئەوەش لە کاتێکدایە، ساڵێک بەسەر راوەستانی هەناردەکردنی نەوتی هەرێم تێپەڕ بووە و بە گوێرەی راپۆرتی وەزارەتی سامانە سروشتیەکانی حکومەتی کاربەڕێکەر، راگرتنی نەوتەکە زیانی ١٢ ملیار دۆلاری هەبووە.