ئاماژەی بەوەش کرد، وەزیری دارایی عێراق وتوویەتی کار بە هەژماری من ناکەن، چونکە بڕیاری دادگای فیدراڵی عێراق ناوی چەند بانکێکی عێراقی داوە و تەنها لەو بانکانەوە فەرمانبەرانی هەرێم دەتوانن مووچەکانیان وەربگرن و ئەو بانکانەش کە لەهەژماری مندا هەن دەبێت بانکی ناوەندی عێراق ئیعترافیان پێ بکات.

ئەوەشی خستە روو، وەک نەوەی نوێ پێداگریان لەوە کردووە کە بەزووی چارەسەری کێشەی مووچەخۆرانی هەرێمی کوردستان بکەن چوونکە ماوەی شەش مانگە تەنها یەک مووچەیان وەرگرتووە.

دەشڵێت، "ئەگەر حکومەتی کاربەڕێکەری هەرێم کێشە دروست نەکات، بە پاڵپشتی بڕیاری دادگای فیدراڵی عێراق وەزارەتی دارایی عێراق مووچەی مانگی سێش دابەش دەکات".

هاوکات، وەزیرە ئەحمەد پەرلەمانتاری فراکسیۆنی نەوەی نوێ لە پەرلەمانی عێراق رایگەیاند، وەزیری دارایی عێراق جەختی لەوە کردووەتەوە بە نیشتیمانی کردنی مووچەی مووچەخۆرانی هەرێم کاتێکی کەمی دەوێت و پرۆسەیەکی ئاسانە و ئەوەی رێگریان لێدەکات حکومەتی کاربەڕێکەری هەرێمە.

باسی لەوەش کرد، وەزیری دارایی عێراق پێی راگەیاندوون، حکومەتی هەرێم زۆر قەرزارە و تا داهاتی تەواوی هەرێم رادەستی بەغدا نەکرێت ناتوانن مووچەی مانگی سێ دابەش بکەن.