کەشناسی هەرێم هۆشداری داوە لەبارەی ئەو شەپۆلە نوێیەی روو لە ناوچە جیاوازەکانی هەرێم دەکات و دیلان رەشاد وتەبیژی وەزارەتی گواستنەوە و گەیاندن بە ئێن ئاڕ تی راگەیاند، شەپۆلەکە لە باشووری هەرێم و ئیدارەی گەرمیانەوە دەستپێدەکات و پلەکانی گەرما دادەبەزن و بەفر دەبارێت.
دیلان رەشاد وتەبێژی وەزارەتی گواستنەوە و گەیاندن بە ئێن ئاڕ تی راگەیاند، لە ئەنجامى کاریگەرى دوو نزمە پاڵەپەستۆى دەریاى سوور و کەنداوى عەرەب لە دواى نیوەڕۆى ئەمڕۆوە شەپۆلێکى بارانبارین روو لە ناوچە جیاجیاکانى هەرێم دەکات.
ئاماژەی بەوەش کرد، شەپۆلەکە لە باشووری هەرێمەوە دەستپێدەکات
و لە ئیدارەی گەرمیان زۆرترین بڕی باران دەبارێت بەتایبەت لە درەنگانی شەودا، بڕی
بارانبارینی پێشبینیکراویش لەنێوان ٣٥-٤٥ ملم دەبێت و هەندێک کات هەورەتریشقە و
بارانی بە لێزمە دەبێت و ئەگەری هەستانی لافاوی لێدەکرێت.
ئەوەشی خستە روو، دواتر کاریگەرى شەپۆلەکە درێژدەبێتەوە
بۆسەر بەشێک لە سنوورى سلێمانى و هەڵەبجە و ئیدارەى راپەڕین و بڕی بارانبارینی
پێشبینیکراو لەنێوان ٢٠-٢٥ ملم دبێت و دواتر درێژدەبێتەوە بۆسەر سنوورى پارێزگای
هەولێر و ئیدارەی سەربەخۆی سۆران و ناوچە شاخاوییەکانیان، کە بڕی بارانبارینی
پێشبینیکراو لە سەنتەری شاری هەولێر ١٠ – ١٥ ملم دەبێت و لە ئیدارەی سۆران سەروو
٢٠ ملم دەبێت.
وتیشی، لە سنووری پارێزگای دهۆک و ئیدارەى سەربەخۆى زاخۆ
کاریگەرى شەپۆلەکە کەمتر دەبێت و بڕی بارانبارینی پێشبینیکراو لەنێوان ٧ بۆ ١٢ ملم
دەبێت.
دیلان رەشاد دەشڵێت، لەگەڵ بارانبارین لە شەودا بارستە هەوایەکى
سارد روو لە ناوچەکە دەکات و لە ناوچە شاخاوییە سنووریەکان بەفر دەبارێت و لەناو
شارەکانیشدا تەرزە دەبارێت.
لەبارەی کاتی کۆتاییهاتنی شەپۆلەکەشەوە دەڵێت، لەدوای
نیوەڕۆی رۆژی دووشەممەوە شەپۆلەکە بەرەو لاوازبوون و نەمان دەچێت.