ئەندامێکی خولی پێشووی پەرلەمانی عێراق بە ئێن ئاڕ تی رایگەیاند، پارتی ناتوانێت بەشداری هەڵبژاردن نەکات چونکە کۆمەڵگەی نێودەوڵەتی لێیان قبوڵ ناکات و فشارەکانیان بۆ ئەنجامدانی هەڵبژاردن بەردەوامە.
ئەمڕۆ دووشەممە، هۆشیار عەبدوڵا ئەندامی خولی پێشووی پەرلەمانی عێراق لە بەرنامەی تاوتوێی ئێن ئاڕ تیدا رایگەیاند، پارتی لە ئەنجامدانی هەڵبژاردن دەترسێت و پێی وایە ئەگەر هەڵبژاردن دوابخات ئەوا ئاڵۆزیی لە ناوچەکەدا دروست دەبێت و لە بەرژەوەندی خۆیاندا دەشکێتەوە.
جەختیشی لەوە کردەوە، پارتی ناتوانێت بەشداری هەڵبژاردن
نەکات، چونکە فشارەکانی ئەمریکا و کۆمەڵگەی نێودەوڵەتی بەردەوامیان هەیە و لێیان
قبووڵ ناکەن.
هۆشیار عەبدوڵا باسی لەوەش کرد، سەردانەکەی سودانی بۆ ئەمریکا
کاریگەری دەبێت لەسەر سەقامگیری سیاسی لە عێراقدا و ئەگەری هەیە هەڵبژاردنی پەرلەمانی
عێراق نزیک بکاتەوە.
وتیشی،" پارتی و یەکێتی بە درێژایی مێژوو مووچەیان
بەکارهێناوە بۆ سزای سیاسی و بۆ بەرتیلی سیاسی، هەموو ئەمانە بووەتە هۆی ئەوەی کە
خەڵکی باوەڕی بە دەسەڵاتی پارتی و یەکێتی نەمێنێت، هەروەها لە دنیادا هیچ وەزارەتێک
مووچە دابەش ناکات، چونکە دابەشکردنی مووچە ئەرکی بانکەکانە".
ئەو پەرلەمانتارەی خولی پێشووی پەرلەمانی عێراق ئەوەشی
خستە روو، پارتی و یەکێتی رێککەوتنیان کردووە لەسەر پرۆژەی هەژماری من، خەڵکی هەرێمی
کوردستان مافی خۆیانە بڕوایان بە هەژماری من نەبێت.
باسی لەوەش کردووە، "ئەگەر پارتی و یەکیتی دڵسۆزی هەرێمی
کوردستان بوونایە دژایەتی جێگیرکردنی مووچەیان نەدەکرد، چونکە پێیان وایە کە دابەشکردنی
مووچەی فەرمانبەرانی هەرێمی کوردستان پەیوەندی هەیە بە مانەوەیانەوە."