ئاژانسی ویلایەتە یەکگرتووەکانی ئەمریکا بۆ پەرەپێدانی نێودەوڵەتی (USAID) و دەزگای تۆپ ماونتن (Top Mountain) پڕۆگرامێکی یەك ملیۆن دۆلاری دەخەنەگەڕ بۆ پەرەپێدان لە بواری کشتوکاڵیدا لە هەرێمی کوردستانی عێراق.
لە راگەیاندراوێکدا ئاژانسی ویلایەتە یەکگرتووەکانی ئەمریکا بۆ پەرەپێدانی نێودەوڵەتی (USAID) و دەزگای تۆپ ماونتن لەسەر بەگەڕخستنی پڕۆگرامی وەبەرهێنان و پەرەپێدان لە کەرتی کشتوکاڵیدا لە هەرێمی کوردستان ئاماژەیان بە پلانێکی نوێ بۆ کەرتی کشتوکاڵی هەرێم کردووە و تیایادا هاتووە، پڕۆگرامەکە یەك ملیۆن دۆلاریی و ١٢ مانگیە و ئامانج لێی زیادکردنی توانای پێشبڕکێکردنی بەرهەمە کشتوکاڵییەکانی ناوخۆی عێراقە.
لە
راگەیاندراوەکە هاتووە، پرۆگرامەکە لە ڕێی بەخشینی دارایی لە شێوەی ئامێر و خزمەتگوزاری
و برەودان بە ویستی بەکارهێنانی بەرهەمی خۆماڵی دەبێت، لەرێگای دروستکردنی پەیوەندی
لە نێوان لایەنەکانی بازاڕی بەرهەمە کشتوکاڵییەکان و ئاسانکاریکردن بۆ کاری هاوبەش
لە نێوان کەرتی گشتی و کەرتی تایبەتدا.
راگەیاندراوەکە باس لەوەدەکات، دەتوانرێت ئوميدی زۆر لەسەر کەرتی
کشتوکاڵ لە عێراق هەڵبچنرێت بۆ هەمەچەشنکردنی ئابوری و رەخساندنی هەلی کار.
لە باسی خاکی
عێراقیشدا هاتووە، "سەرەڕای ئەوەی خاکەکەی دەوڵەمەندە و سەرچاوەی ئاوی پێویستی
هەیە، بەڵام هێشتا هەرێمی کوردستان لەم ڕووەوە گەشەی تەواوی بەخۆوە نەبینیوە ئەویش
بەهۆی کەمی وەبەرهێنان لە تەکنەلۆجیای نوێ و شێوازی ئیدارەدانی بەسەرچوو و پڕۆسێسێکی
لاوازی بە بازاڕکردن کە دەبێتە هۆی بەفیڕۆچوونی بەرهەمی زۆر و پێشبینینەکردنی بڕی
بەرهەم و بەرز و نزمی لە نرخدا. لەبەر ئەمەیە هێشتا عێراق هاوردەکاری خۆراکی ئامادەکراوە
کە بووەتە هۆی نەهێشتنی دەرفەتی ئابوری گرنگ و بەرچاو و مەترسیشە بۆ سەر ئاسایشی خۆراك."
ئەوەش خراوەتەڕوو، "پرۆگرامەکە دەبێتە هۆی پاڵپشتیکردن لە پڕۆژەی
بازرگانی زۆر بچوك و بچوك و مامناوەند و بزنسی تازە دامەزراوی بواری کشتوکاڵ و کەرتی
بازرگانی تایبەت بە بواری کشتوکاڵ لە هەرێمی کوردستان و ڕێکخستنی زنجیرەیەك ئیڤێنت
و چالاکی و بەم هۆیەشەوە خوازیارانی بوارەکە لە کەرتی حکومی و تایبەت پێکەوە گرێدەدات
و بەرهەمە خۆماڵیەکان تیایاندا دەخرێنە ڕوو و لە ڕێیانەوە برەودەدرێت بە بەکارهێنان
و وەبەرهێنان لە بەرهەمی خۆماڵیدا."
ئاژانسی ویلایەتە
یەکگرتووەکانی ئەمریکا بۆ پەرەپێدانی نێودەوڵەتی (USAID) ئاژانسی پێشەنگە لە بواری پەرەپێدان و
لایەنێکی کارای هێنانە کایەی ئەو ئامانجانەی لە بواری پەرەپێداندا دەبینێرێن.
هاوکات، تۆپ
ماونتن دامەزراوەیەکی ڕاوێژکاریە لە عێراق و کار لەسەر گەڕاندنەوەی سەقامگیری و پەرەپێدانی
ئابوری و برەودان بە ڕەخساندنی هەلی کار و هەوڵە کارسازیەکان دەکات.