AM:12:20:09/03/2026
176 جار خوێندراوەتەوە
+
-
مەغریب خەریکی داڕشتنەوەی پلانێکی تۆکمەیە و ئینێستا و چاڤیش بەشێک
دەبن لەو پلانە.
تۆپی پێی مەغریب لە بەردەم قۆناغێکی مێژوویی نوێدایە، دوای ئەوەی
فیدراسیۆنی تۆپی پێی ئەو وڵاتە بڕیاری دا لاپەڕەیەکی نوێ لە بەڕێوەبردنی
هەڵبژاردەی نیشتمانیدا بکاتەوە.
لە هەنگاوێکی گرنگدا، محەمەد
وەهبی وەک بەڕێوەبەری تەکنیکی نوێی هەڵبژاردەی یەکەم دەستنیشان کرا، کە پێشتر
سەرکەوتنی گەورەی لەگەڵ هەڵبژاردەی لاوان بەدەستهێنابوو و نازناوی مۆندیالی لاوانی
بۆ مەغریب بردبووەوە.
لەلایەکی تەرەوە، مەغریب دەیەوێت پڕۆژە وەرزشییەکەی بە ئەزموونی
جیهانی دەوڵەمەند بکات، بۆیە لە دانوستانێکی پێشکەوتوودایە لەگەڵ ئەفسانەی ئیسپانی
ئەندرێس ئینێستا بۆ وەرگرتنی پۆستی بەڕێوەبەری وەرزشیی هەڵبژاردەکە.
ئامادەبوونی ئینێستا لە یاری کۆتایی مۆندیالی لاوان لە ڕیبات بە
بانگهێشتی فەرمی شای مەغریب، وەک ئاماژەیەکی بەهێز دەبینرێت بۆ نزیکبوونەوەی ئەو
لەم پۆستە، کە ئەرکی سەرەکی داڕشتنەوەی ستراتیژییەتی شێرەکانی ئەتڵەس دەبێت بۆ
ساڵانی 2026 تا 2030.
هاتنی ئینێستا بۆ کارگێڕی وەرزشی مەغریب ڕەنگە ڕێ خۆشکەر بێت بۆ هاتنی
چاڤی هێرناندیز لە داهاتوودا وەک ڕاهێنەر، بەو پێیەی چاڤی ئارەزووی پڕۆژەیەکی
درێژخایەن دەکات کە لە سفرەوە دەست پێ بکات.
ئەم پلانە مەزنەی مەغریب کە
میوانداریکردنی مۆندیالی 2030 لەخۆ دەگرێت، ئامانجی ئەوەیە بە تێکەڵکردنی ئەزموونی
ئیسپانی و کارگێڕی ئەوروپی، مەغریب بکاتە یەکێک لە هێزە هەرە گەورەکانی تۆپی پێ
لەسەر ئاستی جیهان.