سزایەکى قورس چاوەڕێى تۆرێس و ساڤیچ دەکات

PM:02:29:09/01/2023

648 جار خوێندراوەتەوە

+ -

ئەگەر هەیە فیران تۆرێس و ستیفان ساڤیچ بەهۆى شەڕەکەى نێوانیانەوە بۆ 12 یارى ڕابگیرێن.

لە یارى لوتکەى نێوان ئەتلەتیکۆ مەدرید و بەرشەلۆنە لە لا لیگا، کە لە سودى بەرشەلۆنە کۆتایى هات، لە دوا خولەکەکانى یارییەکەدا فیران تۆرێسى هێرشبەرى بەرشەلۆنە و ستیڤان ساڤیچى یاریزانى ئەتلەتیکۆ بەشەڕهاتن و هەردووکیان کارتى سوریان وەرگرت.

ڕۆژنامەى سپۆرتى کەتەلۆنى بڵاویکردەوە، لیژنەى پێشبڕکێکان لە یەکێتى تۆپى پێى ئیسپانیا بەرپرسە لە سزادانى هەردوو یاریزانى ناوبراو دواى شەڕەکەى نێوانیان.

سپۆرت ئاماژەى بەوەکردووە، ئەگەر پۆلێنکردنى ڕووداوەکە بە دەستدرێژى هەژماربکرێت، ئەوا سزاکە ڕاگرتن دەبێت لە نێوان چوار بۆ 12 یاری.

ناوبژیوانى یارییەکەش لە ڕاپۆرتەکەیدا وردەکارى کێشەکەى لە نێوان هەردوو یاریزاندا و بەرزکردنەوەى کارتى سور بە ڕوویاندا ڕوونکردووەتەوە، کە ئەمەش پشتى پێدەبەسترێت لە بڕیارى کۆتایى ئەگەرى ڕاگرتنى یاریزانەکاندا.

گ . ف