سەرۆکوەزیرانی عێراق هەڵوێستی خۆی لەبارەی هێرشەکانی تورکیاوە ئاشکراکردووە و رایگەیاند، عێراق مافی وەڵامدانەوە و بەرپەرچدانەوەی هێرشەکانی تورکیای هەیە و بە پێشێلکارییەکی زەق ناویدەبات. دەشڵێت، هیچ پاساوێکی ئەمنی بۆ ئەو هێرشانە قبوڵناکەن.
مستەفا کازمی سەرۆکوەزیرانی عێراق رایگەیاندووە، "ئەمڕۆ چوارشەممە دووبارە هێزەکانی تورکیا پێشێلکارییەکی زەق و ئاشکرایان لە دژی سەروەریی عێراق و ژیان و ئارامی هاوڵاتییانی عێراق ئەنجامدا."
ئاماژەی
بەوەشکردووە، "ئەم دەستدرێژییە دڕندەیە دەیسەلمێنێت تورکیا بەهیچ شێوەیەک گوێی
بە داواکارییە بەردەوامەکانی عێراق نەداوە بۆ راگرتنی پێشێلکارییە سەربازییەکانیان
بۆ سەر خاکی عێراق و ژیانی هاوڵاتییان."
دەشڵێت، "عێراق
هەمیشە پابەندی بنەماکانی سیاسەتی دراوسێی باش بووە و بەردەوام رەتیکردووە و قبووڵی
نەکردووە هیچ لایەنێک خاکەکەی بەکاربهێنێت بۆ دەستدرێژیکردنە سەر دراوسێکانی، هەموو
جۆرە پاساوێکی ئەمنی رەتدەکاتەوە کە دەبنە مایەی هێرشکردنە سەر هاوڵاتییان و دەستدرێژیکردنە
سەر خاکی عێراق، ئەم هەڵوێستە پێشێلکردنی بنەماکانی دراوسێی باش و گوێنەدانە بە رێککەوتنە
نێودەوڵەتییەکان و پەیوەندیی و هاوئاهەنگییە هاوبەشەکان." لەکاتێکدایە، حکومەتی هەرێم ئاماژە بەوە دەکات، تورکیا بە بیانووی بوونی چەکدارانی پەکەکە لەو ناوچانە ئەو هێرشانە ئەنجامدەدات.
مستەفا کازمی
راشیگەیاندووە، "عێراق مافی وەڵامدانەوە و بەرپەرچدانەوەی تەواوی هەیە بۆ هەر
جۆرە دەستدرێژییەک و هەموو جۆرە کردار و رێکارێکی پێویست لەخۆ دەگرێت بۆ پاراستنی
گەلی عێراق و بەرپرسیارێتیی خستنە سەرشانی لایەنی دەستدرێژیکار بۆ سەرجەم لێکەوتەکانی
هەڵکشانی گرژیی بەردەوام."
ئەوەش لە کاتێکدایە،
ئەمڕۆ فڕۆکەکانی تورکیا بۆردومانی هاوینەهەواری پەرەخێیان کرد لە سنوری زاخۆ و بەهۆیەوە
نۆ کەس گیانیان لەدەستدا و ٢٥ کەسی دیکە بریندار بوون.
هـ.ئـ