پەرلەمانتاری دووڕوو

7000 جار خوێندراوەتەوە

(نەپێویستم بەسەرجێی بوە، نەئێستا و نەلەداهاتوو پێویستم بەسەر جێی نیە) پەرلەمانتارێک لەکۆبونەوەکەی پەرلەمان بەم شێوەیە دژایەتی خۆی بۆ پرۆژەیاسای توندوتیژی خێزانی دەربڕی و رەتیکردەوە. دیارە نەک هەر ئەم پەرلەمانتارە، بەڵکو لەو کۆبوونەوەیە پاڵەوان ئەوە بوو کە بە رستەیەکی سەرنجراکێش دژایەتی پرۆژە یاساکە بکات و لەشاشەکانەوە خەڵک بیبینێ و چەپڵەی بۆلێبدات.

دواتر کەناوەرۆکی پرۆژە یاساکە بڵاوکرایەوە و واژووی ئەوانە زانرا کە بەرزیان کردوەتەوە بۆ سەرۆکایەتی پەرلەمان، وەک ئەوەی دەڵێن قولی رەش و سپی دەرکەوت ئیتر دێمەنێک تەواو جیاواز لای خەڵک رۆشن بویەوە.

دیمەنی ئەم چەند رۆژەی بەشێک لەو پەرلەمانتارانە کە بەهۆکاری پرۆژەیاسای توندوتیژی خێزانیەوە دەرکەوتووە بەمانا قوڵەکەی مایەی پێکەنین و گریانە.

مایەی پێکەنینە کە هێشتا مرەکەبی سەرکاغەزی ئیمزاکانیان وشک نەبووبویەوە، بەڵام هوتاف و دروشمە بریقەدارەکانیان گوێی دنیای کەڕ دەکرد. هەروەک مایەی گریانیشە کە ئێمە خاوەنی جۆرە کەسانێک بین کەنوێنەرایەتی خەڵک دەکەن، بەڵام ئەوەندە دووڕوو و دووفاقن لەگەڵ خوا و خەڵک و ویژدانی مردوویان، هەروەک راستگۆیش نین لەگەڵ ئەو ئەمانەتە گەورەیەی کەخراوەتە سەرشانیان.

پەرلەمان کە بەرزترین دەسەڵاتی یاسادانان و پێویستە چاودێریکەری کارەکانی حکومەت و پارێزەری مافی خەڵک بێت، ئەگەر بەشێک لە کارەکتەرەکانی بەم شێوەیە بن و کوالێتیەکەیان بەوجۆرە نزم بێ، دواجار ئەو فەزایەی لێ بەرهەم دێت کە ئێستا لە هەرێمی کوردستان هەیە. لەبری چاودێری حکومەت، حکومەت رەقیبی ئەو دەکات و دەبێتە کارگەی بەرهەمهێنانی ئەو یاسا و بریار و رێنماییانەی کە حکومەت بۆی دەنێرێ و ئەمیش پەسەندیان دەکات( لەم خولەدا لەکۆی ٢٥ پرۆژە ٢٢ یان لەحکومەتەوە بۆی هاتووە و پەرلەمان شەرعانویەتی).

پەرلەمانتار کاتێک بەدزیەوە ئیمزا دەکات و بە ئاشکرایش دژی ئیمزاکەی هات و هاوار دەکات ، ئەوا یان:

١-متمانە و بروای بەخۆی نیە و کەسێکیش بروای بەخۆی نەبێ، ئەستەمە نوێنەری خەڵک بێت.

٢- پرۆژە یاساکەی نەخوێندوەتەوە و ئیمزای کردوە کەئەمەش مانای نەخوێنەوارە و نابێ نمایندەی میللەت بکات.

٣- بەئەمر ئیمزای پێکراوە و ئەمەیش کۆیلەیەکی عەیار بیست و چوارە و کۆیللە ناتوانێ خۆی رزگار بکات چ جای میللەتەکەی.