ڕیفراندۆم لە نێوان شیعر و واقیعی تاڵی ناوچە دابڕاوەكاندا

236 جار خوێندراوەتەوە

لە راستیدا هەرچی شیعر و شانامەی دونیا هەیە بەباڵای ‎ ڕیفراندۆمدا هەڵی بدەیت ئەوە لەو راستییە كەم ناكاتەوە كە ریفراندۆم بڕیارێكی هەڵە بوو لە كاتێكی هەڵەدا.

‎یانی چی ئەم هەرێمی كوردستانە بە بڕیاری نەتەیەكگرتووەكان و ئەنجوومەنی ئاسایشی دروست بووبێت و ئەو ئەنجومەنە هاوار بكات بڵێت ریفراندۆم مەكەن، ئەمەریكا، بەریتانیا بڵێت مەیكەن، فەرەنسا بڵێت مەیكەن، كەچی تۆ بڵێی حیسابی نوكی نینۆك بۆ كەس ناكەم و سواری سەری خۆت بیت و ئەنجامی بدەی؟

‎ئێوە ڕەوشی خانەقین و قەرەتەپە جبارەتان لێ دیارە؟ ئاگاتان لە كەركوك و شەنگال و مەندەلی و زەویوزاری دەشتی موسڵە؟ ‎هەڵبەت هەموو شتێك بە گوێرەی بەرهەمەكەی دەپێورێت، ئادەی بەرهەمی ڕیفراندۆم چی بوو؟ ‎جگە لە دۆڕانی خاك و پاشەكشێ بۆ سنووری ٢٠٠٣.

‎ئێمە لە حەمرین بووین كەچی گەیشتینەوە پردێ و زاڵگەی كارێز و شێخان!‎ئێستا سەیتەرەی باوە مەحمود لە نێوان خانەقین و كەلار ‎بووەتە مۆتەكە و راوی خەڵكی خانەقین دەنێت. ‎خەڵكی ناتوانێت باری سەیارە كەلوپەل و شمەك بباتەوە بۆ ماڵەكەی خۆی و دەبێت بەرتیل بداتە هێزە عێراقیەكان.

حاڵ و گوزەرانی كوردی ناوچە دابڕاوەكان بەدەست سیاسەتی هەڵەی جوت حیزب و ستەمی میلیشا و هێزە شوڤینیە عێراقیەكانەوە تا سنوری جەهەنم ڕۆیشتووە.

‎پارتی و یەكێتی تاكە ئەرێكێك بیزانن لە ئێستادا دەست تێكەڵكردنە لەگەڵ میلیشاكاندا بۆ تاڵانی، لایەكیان لەگەڵ قەیس غەزعەلی و بەدر خەرێكی تەنسیق و هەمائاهەنگین بۆ تاڵانی نەوت لە كەركوك و خانەقین، لایەكی تریان لەگەڵ فالح فەیاز هەمان كار دەكەن لە موسڵ.

‎سیاسی ڕاستەقینە لە هەر نوشست و شكستێكدا پێش هەر شت لومەی خۆی دەكات، خۆی دەداتە بەر نەشتەری ڕەخنە ڕاستەقینە، نەوەك پاساوی ناواقیعی و بێ بنەما.

‎ئیدی هەرچی شیعر و شانامەی سەربەخۆیی هەیە تەنها بۆ چەشاوكاری و داپۆشینی شكست و پەردەپۆشی تاڵانكارییە، ئەگینا كێشە خەڵك و خاك لە ناوچە دابڕاوەكان دواین خەم و ‎هەمی سەرانی پارتیی و یەكێتییە.