پارێزگارێ نەینەوا ناڤێ ١٦ هزار کەس ل وێ پارێزگەهێ راگەهاند کو هاتینە دامەزراندن و د وێ هژمارێ ژی دا نێزیکی نەهـ هزار کەس ل کەرتێ پەروەردێ هاتینە دامەزراندن.

سەقاناسیا عێراقێ راگەهاند، لدیف پێشبینیێن سەقای سوبەهی باران بارین دێ دەستپێکەت و ل چەند دەڤەرێن هەرێمێ و عێراقێ. پسپۆڕەکێ سەقاناسیێ ژی دبێژیت، سوبەهی ل پرانیا دەڤەرێن عێراقێ و هەرێمێ بارانەکا هویر دێ باریت.

وەزارەتا پێشمەرگەی راگەهاند، درێژکرنا ڕاژەیا فەرمانبەران د دەمێ تەمامکرنا ژیێ یاسایێ خانەنشینییا فەرمانبەران هاتیە هەلوەشاندن، ئەفسەر و کارمەندێن وەزارەتا پێشمەرگەی کو تا نوکە خانەنشین دبن لدیف یاسایا خانەنشینیا سەربازی ژمارە سێ یا سالا 2010ێ دێ هێنە خانەنشین کرن.

نڤیسینگەها سەرۆک وەزیرێن عێراقێ راگەهاند، د کۆمبوونا سەرۆک وەزیرێن عێراقێ و وەزیرێ دەرڤەیێ تورکیا، بەحسێ دویماهی پێشهاتێن دەڤەرێ و ئێکخستنا ولاتان هاتەکرن، ئاماژە ب وێیەکێ ژیکر، وەزیرێ دەرڤەیێ تورکیا خاستا ولاتێ خۆ بۆ هەڤبەندییا نێزیک دگەل عێراقێ دەبڕیە ب تایبەت پێشهاتێن دەڤەرێ.

وەزیرێ دەرڤەیێ تورکیا پشتی کۆمبوونێ دگەل وەزیرێ دەرڤەیێ عێراقێ دا ل بەغدا ڕاگەهاند، عێراق هەڤسێیەکێ گەلەک گرنگە بۆ وان و سەروەری، ئاسایش و سەقامگیریا عێراقێ بۆ تورکیا گەلەک گرنگە، وەزیرێ دەرڤەیێ عێراقێ ژی دبێژیت، عێراق و تورکیا ل گەلەک بابەت و پرسان هەڤبەند و هەڤنێرینن.

وەزیرێ پەروەردەیا حکومەتا رێڤەبرنا کاران ڕاگەهاند، ئەو مامۆستایێن بڕیارا خانەنشین بوونێ وان ڤەدگریت چارەسەریەک بۆ وان هاتیە دیتن و رازی بوونا دەستپێکی یا دیوانا جڤاتا وەزیران هاتیە وەرگرتن کو چەند هەیڤان خانەنشین بوونا وان بهێتە راگرتن.

هەرچەندە بڕیاربوو سوبەهی شاندێ هەرێمێ بچیتە بەغدا بۆ گوتوبێژان لسەر مووچەیێ هەیڤا 12 و شایستە داراییێن هەرێمێ ل هەیڤێن سالا 2025ـێ، لێ لدویف زانیاریان دەمێ چوونا وی شاندێ هاتە پاشخستن.

سەقاناسیا هەرێمێ ڕاگەهاند، ئەڤرۆ ئەسمان پارچە عەور و نیڤ عەور دبیت، دبێژیت ژی، سوبەهی پلەیێن گەرمێ هەڤبەر ب ئەڤرۆ دێ بلند بن و ئەسمان بۆ عەورێ تەمام و نیڤ عەور دهێتە گۆهڕین.

وەزارەتا بازرگانیا عێراقێ بزاڤا وێ یەکێ دکەت بازارێن ناڤەندی ل باژێرێن هەرێما کوردستانێ ڤەکەت داکو ب نیڤا بهایێ بازاری پێدڤیان بفرۆشیتە خەلکی.

پۆلیسێن راپەرین ڕاگەهاند، شەڤا دەربازبووی شەرە تەقە دناڤبەرا چار وەلاتیان دا روویدا ئێک ژوان ژیانا خۆ دەستدا و سێ کەسێن دی ژی برینداربوون.

هەر چەندە بڕیاربوو ئەڤرۆ کۆمبوونا شاندێن هەرێم و عێراقێ لسەر پرسا مووچەیێ هەیڤا 12 و مووچەیێن سالا 2025ـێ بهێتەکرن، لێ ژبەر بێهنڤەدانێ بۆ سوبەهی هاتە پاشخستن.

سوبەهی ل هژمارەکا پارێزگەهێن عێراقێ ژبەر سالڕۆژا شەهید ئیمام موسا کازام بێهنڤەدانا فەرمی یە.

مارکۆ رۆبیۆ وەزیرێ دەرڤەیا ئەمریکا راگەهاند، هەمی هاریکاریێن ئەمریکا بۆ وەلاتێن بیانی ب فەرمانا دۆنالد ترەمپ ب ئاوایەکێ دەمکی هاتینە راگرتن و بتنێ هاریکاریێن مرۆڤی بۆ کڕینا خارنێ و هاریکاریێن سەربازی بۆ ئیسرائیل و میسر ناهێنە ڕاگرتن.

شوینکارێ وەزارەتا داراییا عێراقێ راگەهاند، بڕیارە ناڤەڕاستا ڤێ حەفتیی شاندەکا بلندێ هەرێمێ سەرەدانا بەغدا بکەت و خەرجکرنا مووچەی بۆ سالا ٢٠٢٥ێ بچیتە بیاڤێ جێبەجێکرنێ.

وەلاتیەکێ سنورێ دهۆکێ د بوویەرەکا هاتن و چوونێ دا ل باژێرێ سلوپێ ل باکوورێ کوردستانێ ژیانا خۆ ژدەستدا.

بهایێ 100 دۆلاران د بازارێن دراڤێن هەرێمێ داب 151 هزار دیناران بازار پێ دهێتەکرن، ب ڤێ یەکێ ژی هەڤبەر ب دوهی بهایێ وێ 150 دیناران بلندبوویە.

سەقاناسیا هەرێمێ ڕاگەهاند، ئەڤرۆ ئەسمان ساهی دبیت هندەک دەمان ژی دهێتە گۆهڕین بۆ نیڤ عەوری، دبێژیت ژی، سوبەهی پلەیێن گەرمێ نێزیک دبن ژ تۆمارکریێن ئەڤرۆ و ئەسمان دهێتە گۆهڕین بۆ عەورێ تەمام.

بڕیارە سوبەهی شاندێن هەرێم و بەغدا لسەر پرسا مووچە و بودجەی کۆم بن، ئەندامەکێ لژنەیا داراییا پەرلەمانێ عێراقێ ژی دبێژیت، دەربارەی رادەستکرنا داهاتێ ناڤخۆ، هەرێمێ دوو پێشنیار داینە بەغدا.

وەزارەتا کارەبا حکومەتا رێڤەبرنا کاران ڕاگەهاند، ژبەر دروستبوونا ئاریشەیا ڤەگوهاستنا غازا LPG، کۆمپانیا دانەغاز نەچاربوویە ب کێمکرنا بەرهەمئینانا کارەب و غازێ.

شەڤا دەربازبووی عومرەکارەکێ کوردێ ئەکنجیێن بەردەرەش ل ولاتێ سعودیا ل باژێرێ مەککەهێ وەغەرا داویێ کر.

پشتی هەڤدیتنا شاسوار عەبدولواحید و سەرۆک وەزیرێن عێراقێ، سەرۆکێ پارتی بەحسێ پیلانگێریێ دکەت ژلایێ ئۆپۆزسیۆنێ دژی پارتی.

پشتی خانەنشین بوونا ٣٧ هزار فەرمانبەران ل هەرێمێ، وەزارەتا داراییا عێراقێ گۆهڕانکاری د لیستا مووچەیێ هەرێمێ دا کریە و پارە بۆ دابەشکرنا مووچەیێ هەرێمێ کێمکریە.

پۆلیسێن زاخۆ راگەهاند، دوو تۆهمەتبارێن بوویەرا شەڤا بووری یا زاخۆ هاتنە دەستەسەرکرن.

پەرلەمانتارەکێ نەوەی نوێ ل پەرلەمانێ عێراقێ راگەهاند، د کۆمبوونا شاسوار عەبدولواحید و سەرۆکێ پەرلەمانێ عێراقێ دا بڕیار هاتە دان ل ڤان نێزیکان دەنگدان ب پارێزگەهـ بوونا هەلەبجە ل بەرنامەیێ کارێ پەرلەمانی بهێتە دانان.

لدویف داتایێن بازارێ جیهانیێ زێڕی بهایێ ئۆنسەیەکا زێڕی ب دوو هزار و ٧٧٦ دۆلار و ١٣ سەنتان بازار پێ دهێتە کرن، هەڤبەر ب دوهی بهایێ زێڕی ٢٥ دۆلاران بلند بوویە.

سەرۆکێ حکومەتا رێڤەبرنا کاران ڕاگەهاند، پێدڤیە هەرێما کوردستانێ د وان دانوستاندنان پشکدار بیت کو عێراق دگەل کۆمپانیا بریتش پترۆلیۆمدا دکەت بۆ گەشەپێدانا بیرێن پەترۆلیێن کەرکوکێ.

سەقاناسیا هەرێمی راگەهاند، ئەڤرۆ ئەسمان نیڤ عەور دبیت و ل هندەک دەڤەران ئەگەرێ باران بارینێ هەیە، دبێژیت ژی، پلەیێن گەرمێ هەڤبەر ب دوهی دێ بلند بن.

ل باتیڤا ل سنورێ زاخۆ شەرو پەڤچوون دناڤبەر زیرەڤانێن سنوری و چەکدارێن قەندیلی دا روو و دوو زێرەڤانێن سنوری یێن عێراقێ ژیانا خۆ ژ دەستدان و ئێکێ دی ژی بریندابوو.

ل سەنتەرێ باژێرێ زاخۆ شەڕ دناڤبەرا پێنج کەسان دا روویدا و د ئەنجام دا گەنجەک ب چەقۆیان هاتە بریندارکرن و ژبەرکو گەلەک لسەر جاددەیێ مایی و دژواریا برینا وی ژیانا خۆ ژدەستدا.

پەیڤدارێ وەزارەتا ساخلەمییا حکومەتا ڕێڤەبرنا کارێن هەرێمێ راگەهاند، هەمی دەرچوویێن سالا بووری یێن کۆلێژا نوژداریا گشتی دێ هێنە دامەزراندن.