PM:08:23:09/03/2025
128 جار خوێندراوەتەوە
+
-
بەرێڤەبەرێ بەرهەمئینانا کارەبێ راگەهاند، پرۆژێ رووناهیێ
ئێکە ژ هیڤیێن سەرۆکێ حکومەتا رێڤەبرنا کاران و وەزارەتا کارەبێ. هەروەسا دبێژیت،
پرۆسە گەلەک ب باشی برێڤە دچیت.
ئەڤرۆ ئێکشەمبی ٩ـێ ئادارا ٢٠٢٥ـێ، فارس میرخان، بەرێڤەبەرێ
بەرهەمئینانا کارەبێ بۆ میدیایا پارتی راگەهاند، پرۆژێ رووناهیێ ل هەرێما کوردستانێ
ئێکە ژ هیڤیێن مەسرور بارزانی، سەرۆکێ حکومەتا رێڤەبرنا کاران و وەزارەتا کارەبێ،
هەڤدەم پرۆسە ژی گەلەک ب باشی برێڤە دچیت، لدیف پلان و بەرنامێ حکومەتێ، هەرێم دێ
بیتە خودانا کارەبا ٢٤ دەمژمێری.
ئاماژە ب وێیەکێ ژیکر، بهایێ کارەبا ٢٤ دەمژمێری دگەل وێ
کارەبا نوکە هەی، کێمەکێ جوداهی هەیە، ژبەرکو بەری نوکە ژی حکومەتا هەرێمێ د دانا
کریا کارەبێ دا پشتەڤانیا وەڵاتیان دکر، کو لسەر حکومەتێ ب ١٥٦ دیناران بوو بۆ هەر
کیلۆ واتەکێ، بڤێ ڕامانێ حکومەتێ بتنێ ١٨ دینار وەردگرتن و ئەوێن دی حکومەتێ ددان،
نوکە ژی کو بوویە ٢٤ دەمژمێر کارەب ناگەهیتە وی بهایێ حکومەت بخۆ بەرهەم دئینیت، ژبەر
هندێ دڤی پرۆژەی دا حکومەت بخۆ پشتەڤانیێ دکەت.
ئاماژە ب وێیەکێ ژیکر، ئێک دوو کەسێن ب تەمەن بەحس ل وێ
چەندێ کریە کو ٥٠٠ هزار دینار بۆ وان هاتینە، دیار بوو ل وی دەمی کو کارەبا ٢٤ دەمژمێری
هەبوویە، کارەبا باش ژی بکارئینابوو، ئەڤ کۆژمە بۆ هاتییە، ئێکێ دی ژی دوکاندارەک
بوو، گوت پارەکێ زۆر بۆ وی هاتییە، دیار بوو دوکانا وی ئامیرێن زۆر یێن کارەبێ
دانابوون، ژبەر هندێ لدیف بکارئینانا کارەبێ پارە بۆ وان دهێت هەیڤانە.
گوت ژی، ئەگەر خێزانەک نوکە چار ئەمپێرێن کارەبا موەلیدێ
بکاربینیت، دێ گەهیتە نێزیکی ٧٠ هزار دیناران، نوکە ب وی پارەی ٢٤ دەمژمێران کارەبا
بەردەوام دێ هەبیت و دشێن هەمی ئامیرێن کارەبێ ژی کار پێ بکەن، ئەگەر کێمتر ژی بیت،
پارەیێ کێمتر دهێت، ژبەر هندێ نوکە پرۆسە ل هەولێر و سلێمانی و دهۆک و سۆران و سەنتەرێ
باژێڕان دەستپێکریە و هەتا سالا ٢٠٢٦ـێ هەمی خەلکێ هەرێما کوردستانێ دێ بیتە خودانێ
کارەبا ٢٤ دەمژمێری.