پەیاما ئۆجەلانى ڕویساری و بێهیڤییەکا مەزن

240 جار خوێندراوەتەوە

بەرى نێزیکى مەهـ و نیڤان مە ل دۆر ڤێ مژارا ئێکجار گرنگ ئەوا دبێژنێ "پێڤاژۆیا ئاشتیێ" شرۆڤەکرنا سیاسی پێشکێشى خوەندەڤانێن هێژا کربوون، ئەز وەکۆ چاڤدێرەکێ سیاسى بەریا وێ ژى وەکۆ کۆردەکێ ژبۆ وى پرسا کۆردى خەما ئێکەم، ئەز ب تشتەکێ مەزن چاڤەڕێى پەیاما سەرۆکێ پارتییا کارکەرێن کۆردستانێ بووم.

پێنچ شەمبێ 27-شواتێ ل دەمژمێر پێنچى ئێڤارى پەیاما بەڕێز (ئاپۆى) ژ لایێ شاندێ بلندێ ئیمڕالیڤە هاتە پەخشکرن، و تێدا پەیام ژبۆ: چەکدارێن پارتییا خوە ل قەندیل، و هەسەدێ ل ڕۆژئاڤایێ کوردستانێ، و ڕێکخستنێن پەکەکێ ل ئۆڕۆپا، و ژ بۆ(Dem party) ل توركيا و ژ بۆ ڕژێم و حکۆمەتا تورکیا پەیام ئاڕاستە کر.

هەرچەندە گۆرەى نیشان و داتايێن سیاسى گەرەکە هەمییان زانیبت دێ داخوازییا چەکدانانێ ژ (PKK)ـێ ناڤنیشان و ناڤەڕۆکا پەیاما (عبد الله ئۆجەلانى) بتن، لێ ب ڕاستى قەد من بخوە باوەر نەدکر دێ ل ڤى ئاستێ هەرە مەزنێ رۆیسارى بتن، دێ ئەڤ قەبارەیێ بێهیڤیبوونێ سەبارەت هەر کوردێ چ ل باکۆڕێ کوردستانێ یا ل هەر جهکێ ژێ بارتن!!

گەلۆ چەوان (ئاپۆ) ئەوێ حزبا نێزیکى (47) ساڵن خەباتکرى، یا ل ساڵا 1978 هاتییە ژیانا سیاسى، ئەوا ب ڕۆبارێن خوینێ خاکا کوردستانێ ئاڤداى، دێ هۆ ب ساناهى بەرپڕسێ وێ یێ ئێکێ بێژتن: ئەڤ کارێ هندە مەزن ل دویڤ ڕێبازەکا فەلسەفە "سۆشیالیزما ڕییالیستیک" بژارەیەکا خەلەتبوو، ب کێشانا خیتەکا خامەى، هۆسان ب ساناهى دێ هەلسەنگینت، و دێ ل سفرێ دا.

یان چەوا نها ژ نوى دێ سەرۆکێ وێ هێت و بێژت: سۆشیاليزما ڕییاليست هەلوەشییا" ب زمانحالێ خوە دۆپات بکت: خەباتا گەلێ کورد ب وێ هزرێڤە ب توندى هەلاویستییە ، مادەم ئایدلۆژییا کەفت هیڤى و ئومێد و خواستێن تەڤگەڕەکا مەزن یا کوردى دڤێت ڕاوەستت، ب خودێ ئەڤ مژارە هندى مرۆڤ هزرێن خوە بکت نەشێت سەرێ خوە ژێ بهینت دەر ئەرێ – خوە ئەگەر بێفامەک ژى بێژیت پەیوەندییەکا دیالیکتیکى و لۆژیکى د ناڤبەرا خەباتا ڕەویا نەتەوەیی نیشتمانى یا مللەتێ کورد ب شێوازێ ستراتیژى و کریارى و تەکتیکى، ب چەکدارى و ب پارتیزانى هەمیێ پەوەندییەکا موکوم ب "سۆشیاڵیزما ڕییالیستکا مارکسى لینینى"ڤە هەیە ژى – ئەێ بەڕێز (ئاپۆ) ما دێ پشتى کەفتنا ڤێ فەلسەفا بۆرى ب دەهان ساڵان ژنوى هەڵسەنگینى، ئەو فەلسەفە ل سەر دەستێ سەرۆکێ سۆفێتێ (میخائیل گورباتشۆفى) ب (بیرستڕویکا – ئاکۆ سەر ژنویکرنا هزر و ئاڤکرنێ ل ساڵا 1987 بزمارێ دویماهیێ ل تابۆتا مارکسزم-لینلیزم هاتە دان، ئەرێ تو بخۆدێ ئەڤە بەرعەقلە پشتى (38) ساڵان ژ کەفتنا ئایدلۆژییەکێ ژ نوى ئەڤرۆ بهێى بەحس لێ بکى بێژى: دڤێت ژ نها پێڤە دەستبەردارى وى ببین چونکى کەفت و نەما، و تو سەرۆکێ پارتەکا ڕزگاریخوازى بووى و تا نهاى ژى هەر تویى، ئەو پارتە ل دەڤ خوە و گەلەک خەلکێ ژى نوێنەرییا پارچەیا هەرە مەزن ژ کوردستانێ دکتن و ژبلى ڤێ ژى تو (ئۆجەلان) ئێک ژ مەزنە ڕەوشەنبیر و ڕۆناکبیرا خوە د هەژمێرى و دویڤچۆیێن تەژى وەسا تە ببینن؟!

باشان چەوان تو بهێى (بێى گرەنتى) و (بێ قەید و مەرج) دخوازى شەڕڤان هەمى چەکێ خوە بدانن و بچنە ناڤا پڕۆسیسەکا ئاشتى و دیموکراسیێدا، کەلۆ کێ دەمان دایە تە کو لایەنێ دیتر (تورکیا) دێ ب نیازپاکى و ب چاکى دێ هێتە پێش؟!

ئەرێ دەریا خوینا هاتییە ڕژتن هەمى ژ بۆ یەکێ بوو تو بهێیە ئازادکرن ل ڤى ژیێ پیراتیێ و تە خەلکێ چارەنڤێسێ خوە ب ڕێبازا تە دەیناى گرێداىی و کفنێن خوە دەینانینە ل سەر ملێن خوە ئەنجام و چارەنڤێسێ ئەڤە بت ژ سەرێن چییان بهێنە خوار و خوە ڕادەست بکەن، هەر وەکى چ ڕوی نەداى و چ چێنەبووى؟!

ب ڕاستى ئەگەر هندەک هیڤى من ب سەرکەفتنا پێڤاژۆیا ئاشتیێ - بەریا نها - هەبن پشتى پەیاما ئاپۆى ژ بەر چەند ئەگەرەکێن حەتمى ئەو ژى ژناڤچۆن، لێ دێ ل پشکا بهێت ژ ڤێ مژارێ "پێڤاژۆیا ئاشتیێ" ب ئاناهییا خۆدێ دێ هینەمە زمان.