PM:09:29:29/08/2025
108 جار خوێندراوەتەوە
+
-
چاڤی سیمۆنس پەیوەندی بە
تۆتنهامەوە کرد و بڕی گرێبەستەکەی 65 ملیۆن یۆرۆیە.
یانەی تۆتنهام هۆتسپێرزی
ئینگلیزی لە پێگەی فەرمیدا خۆیدا رایگەیاند، خۆشحاڵن بە واژۆکردنی گرێبەست لەگەڵ چاڤی
سیمۆنسی یاریزانی پێشووی یانەی لایپزیگی ئەڵمانی.
یانە ئینگلیزییەکە
دووپاتیشیکردووەتەوە، گرێبەستی سیمۆنس لەگەڵیاندا بۆ ماوەی پێنج ساڵە و تا هاوینی 2030
درێژدەبێتەوە و لەگەڵیاندا ژمارە حەوت دەپۆشێت، بڕی گرێبەستەکەش وەک سەرچاوەکان
باسیان کردووە 65 ملیۆن یۆرۆیە.
سیمۆنس دوای واژۆکردنی
گرێبەستەکەی وتی:بەڕاستی دڵخۆشم و ناتوانم چاوەڕێ بکەم تا دەست بە کارەکانم بکەم،
ماوەیەکی زۆرە خەون بەمەوە دەبینم، تۆتنهام یانەیەکی گەورەیە و کاتێک ڕاهێنەرم ناسی ڕاستەوخۆ
زانیم کە ئەمە شوێنی گونجاوە بۆ من.
ئەستێرە تەمەن 22 ساڵەکە،
لە تەمەنی حەوت ساڵییەوە پەیوەندی بە ئەکادیمیای لاماسیای بەرشەلۆنەوە کرد، دواتر بە
19 ساڵی بووە یاریزانی پاریس سان جێرمان، لەوێوە بۆ ئایندهۆڤن و دواتر لە ساڵی
2023 گەڕایەوە پاریس.
دوای ئەوەی سیمۆنس
گەرایەوە پاریس، راستەوخۆ بە خواستن بووە یاریزانی لایپزیگی ئەڵمانی، لەگەڵ
لایپزیگ ئاستێکی بەرزی پێشکەشکرد و یانە ئەڵمانییەکە گرێبەستەکەی کرد بە هەمیشەیی.