سێ ساڵ تەمەنی NRT4

14252 جار خوێندراوەتەوە

ئەمڕۆ، کەناڵی NRT4 سێ ساڵی تەمەنی تێپەڕاند و مۆمی چوارەمی تەمەنی داگیرساند. لە مێژووی کاری ڕۆژنامەنووسیمدا، NRT4 بە یەکێک لە درەوشاوەترین کارەکانی ژیانم دەزانم و ئەوپەری ھەوڵم داوە هێندەی ماندووبوونمان بەرهەمیشمان دیار بێت، هیوادارم خوای گەورە و کارساز لێی وەرگرتبین و بە پەرستشی خۆی بۆی ئەژمار کردبین.

١ی ئایاری ٢٠١٩، NRT4 دەستی بە پەخش کرد و بۆ ماوەی ٥ ڕۆژ بەرنامە و بڕگەکانی خۆی بە بینەرانی ناساند. لە ٥ی ئایاری ٢٠١٩ ھاوکات لەگەڵ ١ی ڕەمەزانی ١٤٤٠ی کۆچی، دەستی بە پەخشی بەرنامەکانی کرد. پلانمان بۆ کەناڵەکە وا بوو، کەناڵێک بێت زۆرینەی ھاونیشتمانانی کوردی ئیماندار تەماشای کەناڵەکە بکەن و بڕگە و پرۆگرام و بەرنامەکانی لە ئاست ڕەزامەندیی خوای گەورە و ئەواندا بێت. سوپاس بۆ خوای گەورە! ئەوەی ئێمە چاوەڕێمان دەکرد، لە ماوەیەکی یەکجار کەم و چاوەڕواننەکراودا زۆر بە زیادەوە ھاتە دی. نەک ئێستا، بەڵکوو ھەر لە چەند مانگی یەکەمی تەمەنیدا، ئەم کەناڵە بوو بە کەناڵێک بۆ ھەموو موسوڵمانان. ئەمە سوپاسی خوای گەورەی دەوێت. ئەمە تەنیا بۆچوونی خۆمان نییە، بەڵکوو کەسانی خاوەن قەڵەمی ئیسلامی و زانایانی مێزەرسپیی ئایینی پیرۆزی ئیسلام و کەسانی ئەکادیمی و مامۆستایانی زانکۆ لە چەندین بۆنە و کۆڕی تایبەتدا باسیان کردووە و شاھیدییان بۆ NRT4 داوە.

پێشتریش چەند جارێک وتوومانە: "لە دەستپێکی کەناڵەکەوە بە بەردەوامی لە بیر و فیکری ئەوەدا بووین باشترین و چاکترین پێشکەشی بینەرەکانمان بکەین. ئەمە زۆر ماندووی کردووین، بەڵام ئاسوودەین کە بەرھەمەکەی دیارە."

وەک پێشتریش وتم، ھەمیشە لە بیری ئەوەدا بووین باشترین و جوانترین و بەکەڵکترین پێشکەشی بینەر و تاکی موسوڵمانی کورد بکەین، بۆ ئەمەش پلانی وردمان داناوە و بەردەوامیش تێدەفکرین. ھەر ئەمە وای لێ کردین لە پاڵ کاری تەلەفیزیۆنییشماندا، لە یەکەم ساڵیادی کەناڵەکەمان لە ٥ی ئایاری ٢٠٢٠ #پرۆژەی_کتێبی_ NRT4 ڕابگەیەنین، (کە بە ڕای خوێنەری کورد، یەکێک لە کارە باشەکانمان بووە). لەم پرۆژەیەدا تا ئێستا شەش کتێبمان بە چاپ گەیاندووە، کە ئەمانەن: (XYZی ئایینی، گەنجینەی وتەکان، تەریقەتی عاشقان، یادنامەی NRT4، مودەڕڕیس، مەلای گەورە) و ئێستاش ڕای دەگەیەنین لە دووەم ساڵیادی #پرۆژەی_کتێبیNRT4دا، سێ کاری ترمان ئامادەی چاپە. ئەوانیش: (مەولەوی، کتێبی دووەمی XYZی ئایینی، یادنامەی NRT4 بۆ ساڵی ٢٠٢٣).

لەم یادەدا، سوپاسی تایبەتم ھەیە بۆ ھەموو ئەو مامۆستا مێزەرسپی و زانا ئایینییانەی بەردەوام ھاوکارمان بوون لە سەرخستی کارەکانماندا. سوپاس بۆ ھەموو ئەو بانگخواز و شارەزا و کەسە ئەکادیمییانەی چاویان لەسەر NRT4 بووە و بەردەوام بە سەرنج و تێبینییەکانیان بەپێزیی زیاتریان پێ بەخشیوین. سوپاسی ھەموو ئەو دۆستانەش دەکەین لە ماوەی ڕابردوودا بە ڕەخنە و تێبینییەکانیان ھەوڵی سەرخستنی کەناڵەکەیان داوە.

بەڵێن دەدەین لە داھاتوودا کەناڵی NRT4 باشتر و باشتر لە جاران لە خزمەتی بینەراندا بێت و وەک هەمیشە مینبەری ھەموو ئەوانە بێت خواستی گەیاندنی پەیامی خوایان ھەیە و دڵسۆزانە بۆ سەرخستنی ئەم کاروانە تێدەکۆشن.

سوپاس بۆ ئەو ستافە دڵسۆزەی بەردەوام لە خەمی سەرخستی کەناڵەکەدان، دڵسۆزیی ئەوان بەشێکی باشی سەرکەوتنەکانی بەرھەم ھێناوە.

بەڵێن دەدەین بۆ ساڵانی ئاییندە کاری باشتر پێشکەش بکەین.

دەپاڕێینەوە خواگیان کارەکانمانی لێ وەرگرتبین و قەبووڵی فەرمووبێت و ھاوکارمان بێت بۆ کاری باشتر.