عێراق و هەرێم، دۆخی ئاڵۆزی زیاتر لەپێناو چی؟

1180 جار خوێندراوەتەوە

دۆخی ناوچەکە دەکوڵێت، عێراق لە نێوەڕاستی جەنگی ئێران / ئیسرائیل _ ئەمریکادایە، هەموو هێزە سیاسییەکان لە عێراق و هەرێم لەبری ئەوەی لەسەر مێزێکی خڕ کۆببنەوە و پلان بۆ دوورخستنەوەی پیلانەکان دابڕێژن و وڵات لە ئاگری شەڕەکە پارێزراو بکەن، کەچی هەریەکە و لە سوچێکەوە وەک هاووڵاتییەکی ئاسایی سەیر دەکات بزانێت چی دەگوزەرێت!

هیچکام لەو هێزانە نەک لە ئاست بەرپرسیارێتیی دۆخەکەدا نین، بەڵکو هەریەکیان هۆکارێکن لەو ئاژاوە و پشێوی و بێسەروبەرییەی لە ئاسایشی وڵات ڕوو دەدات، ململانێی ئەوان لەپێناو بەرژەوەندییە تایبەتەکان و دوور لە ئەجێندا نیشتمانییەکان هەموو هۆکاری سەرەکین بۆ ئەو ناسەقامگیرییەی کە خەریکە ئاسایشی وڵات دەخاتە ژێر پرسیارەوە. چڕی و زۆری بۆردومانی درۆنەکان و مووشەک و دەستدرێژییەکانی وڵاتانی شەڕکەر بۆ سەر پێگەی هێزە سەربازی و گرووپەکان لە ناوچە جیاوازەکان، بێدەنگی و ئیفلیجبوونی دامەزراوە حکومییەکان لە عێراق و هەرێم لە دۆخی ئاوا قورسدا، چاوەڕوانکراوە ببێتە دەرفەتێکی زیاتر بۆ ئەو هێز و گرووپانەی لە ژێر چەتری یاسا دەرچوون، ناسەقامگیری و دۆخی ئاسایش تێک بدەن، یان هەر لایەن و وڵاتێک بیەوێت دەرفەتی دوورەپەرێزیی هێز و لایەنە سیاسییەکانی لە عێراق و هەرێم، بقۆزێتەوە و دەستی ئاژاوەی درێژ بکات.

ئەوەی وا دەکات عێراق و هەرێم، لە لێکەوتەکانی شەڕی ناوچەکە پارێزراوتر بێت و کاریگەرییەکانی کەمتر بن، ئاسایشی وڵات بەرەو خراپی نەڕوات، هەستکردنی ئەو هێز و لایەنانەیە بە کورد و عەرەب، بە شیعە و سووننە و سەرجەم کەمایەتییەکان، بە پڕۆژەیەکی نیشتمانی و هەستکردن بە بەرپرسیارێتی، لەسەر مێزی گفتوگۆ تاوتوێی دۆخەکە بکەن درزی نێوانیان بشارنەوە و خەمی وڵات و ئاسایشی وڵاتەکەیان لە ئەولەوییەت بێت.