کەرکوک؛ ١٦ ئۆکتۆبەر و ئێستای پێش هەڵبژاردن

1264 جار خوێندراوەتەوە

هەشت ساڵ بەسەر کارەساتی ١٦ـی ئۆکتۆبەر تێپەڕیوە، ئەو رۆژەی هەموو میللەتی کورد لە هەموو سوچێکی ئەم دونیایەوە رەشی پۆشی، دوای چەندین ساڵ شەڕکردن و ڕژانی خوێنی هەزاران گەنج و لاو و پیر و منداڵ و ژنی ئەم نیشتمانە، تەنها لە چەند کاتژمێرێکدا کەرکوکی قودسی کوردستان و ٪٥١’ی خاکی کوردستان لەدەستدرا.

ئەگەر بگەڕێینەوە بۆ چەند ساڵێک بەر لە رووداوەکانی ١٦ـی ئۆکتۆبەر، دوای رووخانی دەسەڵاتی بەعس، کەرکوک بە موتڵەقی لەلایەن کورد ( پارتی و یەکێتی) بەڕێوە دەبرا، ئەوکات خەڵکی هەموو کوردستان و بەتایبەت کەرکوکییەکان، هیوا و ئومێدی ئەوەیان هەبوو کە جارێکی دیکە نابنەوە ژێردەستەی دەسەڵاتی داپڵۆسێنەری عەرەب، بەڵام هەر زوو پارتی و یەکێتی بە جوتە و بە شەریکی و وەک دوو برا، لەبری کارکردن بۆ جێبەجێکردنی مادەی ١٤٠ و بە فیعلی ناساندنی کەرکوک وەک شارێکی کوردستان، دەستیان کرد بە تاڵانکردنی شارەکە، هەر لە داگیرکردنی هەزاران دۆنم زەویی گرانبەهای شارەکە و تاپۆکردنی لەسەر خۆیان، تا دەگاتە دزینی نەوتە بیرە نەوتەکان و تاڵانفرۆشکردنی بۆ وڵاتان، خەڵکی کەرکوکیش چاویان لە نەبوونی ئاو و کارەبا و رێگەوبان و خزمەتگوزاریی زەقەی دەهات!

کات هات و رۆیشت داعش سەری هەڵدا، بوونە هەڕەشەیەکی جددی لەسەر کەرکوک، تا دواتر پێشمەرگە بەتەواوەتی سنووری ناو سەنتەری کەرکوک و تەواوی پارێزگاکەی پاککردەوە لەو تیرۆریستانە، ئەویش بە خوێنی سەدان و هەزاران گەنج.

جارێکی دیکە کەرکوکییەکان دڵیان بۆ سەربەخۆیی لێی دەدا، بەڵام عەرەب و فارس و تورک، چاویان بەوە هەڵنەهات، هەرسێ دووژمنە مێژوویەکەی کورد جارێکی دیکە بۆ داپڵۆسینی کورد یەکیان گرتەوە، لەڕێگەی حەشدی وەحشی ( میلیشیاکانی ئێران لە عێراق) بە تانک و تۆپ و گەلەگورگەکەیانەوە بەڕێ کەوتن بەرەو کەرکوک، ئەو کەرکوکەی کە داعش تۆپ تۆپێنی پێ دەکردن تیایدا! ئەوکات هەموو تاکێکی کورد هیوای بە هێزی پێشمەرگە بوو بۆ بەرگریکردن، بەوپێیەی پارتی و یەکێتی سەنگەرەکانه شارەکەیان بەدەستەوە بوو، هەڕەشەی ئەوەشیان لە حەشد دەکرد کە خۆیان تاقی نەکەنەوە و هێرش نەکەن، چونکە بە توندی رووبەڕوویان دەبنەوە.

بەڵام ئەوەی روویدا شتێکی دیکە بوو، پێش ئەوەی حەشد بگاتە کەرکوک، پارتی و یەکێتی ژێربەژێر لە دووکان رێککەوتبوون، رێککەوتنی بەرگریکردن لە کەرکوک نا! بەڵکوو فرۆشتنی و جێهێشتنی! هەر لەگەڵ دەستپێکی شەڕدا، یەکێتی لە شارەکە کشایەوە، چەند پێشمەرگەیەکی داماوی خێرلەخۆنەدیویشیان لەدوای خۆیان بەناوی بەرگرییەوە جێهێشت و بەکوشتیان دان! بافڵی کوڕی جەلال تاڵەبانیش ئەوکات هاتە سەر تەلەفزیۆن و بە دەنگێکی دلێر و بێ ئەوەی زەڕڕەیەک شەرم و حەیای تیابێت وتی، بە بڕیاری زۆرینەی ئەندامانی سەرکردایەتی یەکێتی بڕیاری فرۆشتنی کەرکوکیان داوە!

لەم نێوەندەشدا پارتی سواری شەپۆلەکە بوو، ئەویش کە سەنگەرەکانی رۆژئاوای شارەکەی بەدەستەوە بوو، بەبێ تەقە و وەک پیشەی هەمیشەییان هەراتن! دەستە چەورەکەشیان بە یەکێتی سڕی و وتیان یەکێتی کەرکوکی فرۆشت! ئەدی خارە، لۆ ئەنگۆ فیشەکەکتان نەتەقاند لە کەرکوک!؟

١٦ـی ئۆکتۆبەر کارەساتێکە لە مێژووی کورددا کەموێنەیە، دەیان هەزار کەس لە ترسی چنگی وەحشییەکان شار و ماڵی خۆیان جێهێشت! پارتی و یەکێتییش وەک پیشەی هەمیشەییان، لەوکاتەی هەموو کورد و بەتایبەت کەرکوکییەکان پێویستیان پێیان بوو، جارێکی دیکە جێیان هێشتن و تەنها بیریان لە خۆیان کردەوە، ئێستاش حەق وایە هەموو کەرکوکییەکان بە یەک دەنگ، پارتی و یەکێتیش بەبێ جیاوازی شاربەدەر بکەن و جارێکی دیکە چارەنووسی خۆیانیان نەدەنە دەست، چونکە ئەمجارەش وەک هەموو جارەکانی دیکە هەرزانفرۆشیان دەکەن!