ئێوە تێر و میللەت برسی

1368 جار خوێندراوەتەوە

دوای زیاتر لە سێ دەیە حكومڕانی، ئێمە دەسەڵاتێكی نكرۆفیلیەتمان بینی، چونکە بە درێژایی مێژوو هێزی دەسەڵات بۆ گۆڕینی هەمو شتێكی ئۆرگانی بووە بۆ نائۆرگانی و دژی بونیادنان و گەشەپێدان بووە، ئەم جۆرە لە بیركردنەوەیەش دەتوانین تەواو پێچەوانەوەی مەیلی بیۆفیلی ببینین كە بریتییە لە خۆشەویستی بۆ ژیان.

ئەوەی ئەم دەسەڵاتە دەیكات لە مژاری چینایەتی و قەیراندا زۆر یەكلا و روونە، كاتێكیش كاریگەری چینی هەڵگرتبێت ئەوا كاریگەری بەدەر لە مرۆڤ بونی هەڵگرتووە، لە رووی سۆسیۆلۆژیشەوە ئازادی تاكەكەس و كۆمەڵگاش بۆ ژیان كردن لە زیندانێكی تاریكدایە، ئەگەر ئێمە چاوێك بە مامەڵەكردنی سەرانی حكومڕانی كوردی بخشێنین، دەبینین كە ئەوان وەك خاوەن خاكێك مامەڵە دەكەن كە تەنها دەیانەوێت خۆیانی لێ بژین و رزگاری بكەن و دواتر تێر و تەسەلبكەن، بەڵام هەر یەكێك لە ئێمە سەرنج بدەین دەبینین هەست بەچەوساوەیی و كەمی دەكەین و بەهایەكی وامان بە دەست نەهێناوە كە بڕوامان لا دروست بكات بەڵێ ئێمەش خاوەنداری ئەم هەرێمەین، لە لای هەمووان ئاسودەییەك لە ئارادا نییە كە وەك مرۆڤ گەلێكی خاوەن نەوت و كانزای سەرزەوی و ژێر زەوی هەڵسوكەوت بكەین و بژین.

لەم هەرێمەدا ئەگەر بە هەریەكێك لە ئێمە بڵێن پێناسەی دۆخی خۆتمان بۆ بكە، دەڵێین لە كەسێتی ئێمەدا كاریگەری بۆرژوازی و كاریگەری سیستەمی سیاسی و پەروەردە و بیانیكردن و فیوداڵیزم و ئابووری و ئازادیش هەیە، ئەم پێناسەیەشمان بە واتای پارچە بوونی كەسایەتی و ژیان كردن دێت، كەسایەتی و ژیان لێرە چەندە بڵێیت مارژیناڵە و هەمووان وەك زۆرینە بوین بە ئەنكیدۆ گەلێك، بەدرێژایی مێژوو شۆڕش و قوربانییەكانمان دواجار بوە قوربانی سیستەمێك كە خزمەتێكی گەورەی ئەفەندییەكانی حكومڕانی كوردی و حزبە دەسەڵاتدارەكان و بە ناو ئۆپۆزسیۆنەكان كرد و لە كۆتیاییدا بیری سیاسییەكی لێ دروست كردن كە ئەتوانین بڵێین بیرێكی مینیماڵ بوو بۆ گەل، چون ئەم جۆرە لە بیرە، بیرێكە هەمیشە نەرێنی هێناوەتە پێشەوە بۆ ئێمە كە سەرتاپا پڕە لە كێشەو نەیانتوانیوە چارەسەری بهێنن، دۆخی ژیانی هاوڵاتیانی ئەم هەرێمە بە دەست بێ باكی دەسەڵاتدارانەوە وای لێ هاتووە كە رازین بە سەرەتایی ترین ماف كە مووچەیە، بەڵام بێ ئاگا لەوەی كە گەل هەمیشە چەكێكی ناوەكی بووە كاتێك كە هێزی لە كۆمەڵایەتیبوون و رۆشنبیرییەوە وەرگرتووە. ئەوەی بەرامبەر بە هاوڵاتیان دەكرێت زێدەڕۆییەكی بێ سنوورە لە پەنابردنە بەر كاڵاگەرایی، دور نییە ئەم سیاسەتە بەرەو ملكەچبون و لەباربوونی هەموان ببات چون هەمو ستەمێك كە دەكرێت توانای داگیركاری هۆشیاری خەڵكی نییە و ناتوانێت سەرجەمی حەقیقەت مۆنۆپۆل بكات، چون دواجار دیاردە و بیری هەست بە خۆكردن و تێگەشتن دێتە ئاراوە كە ئامانجی بەدوادادێت، ئۆبژەی تاكڕەوی سەرانی حكومڕانی كوردی و ئۆبژەی كۆیلایەتیبون هەمیشە هۆكار بووە بۆ زیاتر خۆتێركردنی ئێوە لە دزینی سامانی گەل و برسیكردنی ئەوانەی كە ئەوێ رۆژێ هەموو یۆتۆپیایەكیان گەشتن بوو بۆ ڕزگاربوون لە برسێتی كوردبوون و خاوەن خاك و ماف!

ناوكی پۆڵایینی بەرەی رزگاری هەر میللەتێك ئەكرێت بە شۆرشی هەژاران و برسییەكان بكرێتە هەبونێكی كۆمەڵایەتیبون و بۆ دەسەڵاتی بسەلمێنن كە هەموو لەڕێ لادانێك لە بەرژەوەندی خەڵكی گوزارە لە بەردەوامی ناكات و ئەو دیوارەی كە لە نێوان بنەماڵە دەسەڵاتدارەكان و خەڵكی بەرزكراوەتەوە بە تێربوونی خۆیان و برسی كردنی ئێمە چیدیكە پێویستی بە ڕووخاندنە، بۆ ئەوەی غروری پاوانكردنی دەسەڵات و ئەوەی ناو نراوە یاس او داهات بۆ هەمووان وەك یەكە كە لە راستیدا دەسەڵاتێكی زیاتر و خۆتێر كردنێكی زیاتری نەوەكانیانە لە سامانی نەوت تێك بشكێندرێت بۆ ئەوەی ڕێگری لە برسییەتی هەمووان بگیرێت بە پاساوی خۆ تەسلیمبونی دەسەڵاتی سیاسی كوردی.