PM:07:32:22/06/2026
1008 جار خوێندراوەتەوە
+
-
حەوت گۆڵەکەی ئەڵمانیا لە بەرازیل و 10
گۆڵی هەنگاریا لە ساڵی 1982 لە ئەنجامە گەورەکانی مێژووی مۆندیالن
لە جیهانی تۆپی پێدا بەتایبەت لە مێژووی
مۆندیالەکاندا چەندین ئەنجامی گەورە رویانداوە کە تاڵاوی زۆری بە هاندەرانی هەندێک
هەڵبژاردە بەخشیوە و جگە لەوەش هاوشێوەی برینێکی قوڵ لە جەستەی یاریزانان و
هاندەراندا دەمێنێتەوە
یەکێک لە ئەنجامە گەورەکانی مێژووی
مۆندیال بردنەوە گەورەکەی ئەڵمانیا بوو لە بەرازیل لە مۆندیالی 2014 بە ئەنجامی
حەوت گۆڵ بەرامبەر گۆڵێک بە شێوەیەک کە بەرازیل لە یاریگای خۆیدا ئەو ئەنجامە
قورسە بەسەردا هات و بووە هۆکاری گریانی هاندەران و شۆک بوونیان، رۆژنامەکانی
بەرازیلیش ئەو ئەنجامەیان بە کارەساتێکی نیشتمانی ناوبردووە
تۆمارکردنی 10 گۆڵ لەلایەن هەڵبژاردەی
هەنگاریا دژی سلڤادۆر لە مۆندیالی 1982 یەکێکە لە ئەنجامە گەورەکانی مێژووی
مۆندیال و تا ئەم ساتەش ئەو سەرکەوتنە گەورەیە لە مێژوودا باس دەکرێتەوە
یەکێکیتر لە ئەنجامە گەورەکانی مێژووی
مۆندیال، بردنەوەی هەڵبژاردەی یوگۆسلاڤیا بووە لە هەڵبژاردەی زائیر بە ئەنجامی نۆ
گۆڵی بێبەرامبەر لە مۆندیالی 1974 بەشێوەیەک کە دەریخست هەندێک هەڵبژاردە شایستەی
ئەوە نین بەشداری مۆندیال بکەن و ئەو ئەنجامەش یەکێکە لە شکستە گەورەکانی
هەڵبژاردەیەکی ئەفریقی لە مۆندیالدا
لە مۆندیالی 1954یشدا هەڵبژاردەی
هەنگاریا ئەنجامێکی تری گەورەی نوسیوەتەوە بە شێوەیەک کە بە سەرکردایەتی پوشکاش بە
نۆ گۆڵی بێبەرامبەر لە هەڵبژاردەی کۆریای باشووری بردووەتەوە
هەڵبژاردەی سوید لە مۆندیالی 1938 بە
ئەنجامی هەشت گۆڵی بێبەرامبەر لە کوبای بردووەتەوە بەشێوەیەک کە نەیهێشتووە
یاریزانانی کوبا هێرشی مەترسیدار دروست بکەن و یەکەم ئەنجامی گەورەش بووە لە
مێژووی مۆندیالدا
لە مۆندیالی 1950 هەڵبژاردەی ئۆرۆگوای
یەکێک بووە لە بەهێزترینەکانی جیهان و هەشت گۆڵی لە بۆلیڤیا تۆمارکردووە، ئەو
سەرکەوتنە گەورەیە بە یەکێک لە ئەنجامی گەورەکانی مێژووی هەڵبژاردەی ئۆرۆگوای
دانراوە
هەشت گۆڵەکەی هەڵبژاردەی ئەڵمانیا لە
سعودیە لە مۆندیالی 2002 یەکێکیترە لە ئەنجامە گەورەکانی مێژووی مۆندیال و ئێستاش
هەر کاتێک باس لە ئەنجامی گەورە دەکرێت دەستبەجێ ئەنجامی ئەم یارییە دووبارە بە
بیر دەهێنرێتەوە
هەڵبژاردەی پۆڵەندا لە مۆندیالی 1974
باشترینی خۆی لە مێژووی مۆندیالدا پێشکەش کردووە و لە یەکێک لە یارییەکاندا
توانیویەتی بە حەوت گۆڵی بێبەرامبەر بردنەوە بەسەر هەڵبژاردەی هایتی بەدەستبهێنێت
یەکێکیتر لە ئەنجامە گەورەکان لە مێژووی
مۆندیالدا بردنەوە نایابەکەی پۆرتوگال بوو بە سەرکردایەتی کریستیانۆ رۆناڵدۆ لە
مۆندیالی 2010 بە ئەنجامی حەوت گۆڵی بێبەرامبەر لە هەڵبژاردەی کۆریای باکوور
هەڵبژاردەی تورکیاش بێبەش نییە لەوەی کە
ئەنجامی گەورەی لە مێژووی مۆندیال بەدەستهێنابێت بە شێوەیەک کە لە مۆندیالی 1954دا
بە ئەنجامی حەوت گۆڵی بێبەرامبەر لە هەڵبژاردەی کۆریای باشووری بردووەتەوە
خ . ک