ئازاد بە و ئازابە... هەڵبژێرە...

2628 جار خوێندراوەتەوە

دیباچە:

لە سەرەتای دروستبوونی دیموکراسیەوە تاکو ئێستا خاڵی جەوهەری هەبوونی دەنگدانێکی ئازادانە و دوور لە دەستێوەردان بووە، خودی سیستمی حومکڕانی دیموکراسی بە واتایەکی سادە کورت دەکرێتەوە لە بەشداریپێکردنی خەڵک و تاک وەک لایەنی یەکلاکەرەوە کە ئایا کێ حوکمڕانی بکات! رەنگە کارێکی ئاسان نەبێت کە لە ئێستادا ئێمە بەراوردێک بۆ هەلومەرجی سیستمی حوکمڕانی لە هەرێمی کوردستاندا وەک ناودەبرێت بە "دیموکراسی"، لەگەڵ ناوەڕۆک و واتاکانی دیموکراسیدا بکەین، بۆیە مەبەستی سەرەکی ئەم وتارە شیکردنەوەی بەهاکانی دیموکراسی نیە هێندەی رۆچوونە بە گرنگی یەکێک لە بنەما و پێوەرەکانی دیموکراسی کە ئەویش پرۆسەی هەڵبژاردنە (هەڵبژاردنی ئازادانە)، بە تایبەتیش تایبەتمەندییەکان و گرنگی و جیاوازییەکانی هەڵبژاردنەکانی نوێنەرایەتی پارلەمانی کوردستان ٢٠٢٤.

سەرەتا:

گرنگە کە ئەوە بزانین کە ئەمساڵ ٢٠٢٤، بە ساڵی هەڵبژاردن ناوزەد دەکرێت لە سەرانسەری جیهاندا، بەوپێیەی کە زیاتر لە ٤٩٪ـی دانیشتوانی سەرزەوی لە ساڵی ٢٠٢٤ ـدا ئەزموونی دەنگدان دەکەن، کۆی گشتی ٦٥ وڵاتی جیهان بە نزیکەیی رێژەی دوو ملیار کەسی سەر زەوی، سەرەڕای یەکێتی ئەوروپا و چەند دامەزراوەیەکی دیکەی هاوشێوە، روو لە سندوقەکانی دەنگدان دەکەن، کە ئەمەش لە مێژووی دروستبوونی دیموکراسیەوە تاکو ئەمڕۆ کەم وێنەیە و رووینەداوە. دەنگدەران لە جیهاندا دەسەڵاتەکان و فەرمانڕەواکان دیاری دەکەن، هاونیشتمانیانی وڵاتان سەرکردە و نوێنەرەکانیان دەستنیشان دەکەن تاکو لە چوار ساڵی داهاتوودا نوێنەرایەتیان بکەن بۆ مافەکانیان و دابینکردنی ژیانێکی باشتر بۆیان. هەربۆیە لە زانستی سیاسی و پەیوەندییە نێودەوڵەتییەکاندا بە ساڵی هەڵبژاردن ناوزەد دەکرێت و گرنگە لە رێگەی کۆئاگاییەکەی گشتیەوە هەمووان بزانن و تێبگەن لە گرنگی هەڵبژاردنی ئەمجارەی هەرێمی کوردستان.

بە درێژایی نۆ هەڵبژاردنی پەرلەمان لە هەرێمی کوردستاندا، ئەم هەڵبژاردنە بە یەکەمین هەڵبژاردنی رێکخراو و ئازاد و دوور لە دەستێوەردان و ساختەکاری بەڕێوەدەچێت (بەپێی دەربڕینەکانی کۆمسیۆنی هەڵبژاردن)، ئەمە بەقسەی من نا، بەڵکو بە قسەی خودی ئەو حزبانەی کە هەمیشە لە یەکەمەکان بوون، دانیان ناوە بەو راستیەدا کە ئەم هەڵبژاردنە (خولی دەهەم)ـی پەرلەمان، دەبێتە یەکەمین هەڵبژاردن کە کۆمسیۆنی عێراقی فیدراڵ لە جیاتی کۆمسیۆنی کوردستان سەرپەرشتی دەکات، وەک چۆن شێوازی دەنگدان و شێوازی جیاکردنەوە و ژماردنی دەنگەکان زۆر جیاوازتر و پاکیزەترە لە هەموو هەڵبژاردنەکانی دیکە. بۆیە دەمانەوێت لەسەر گرنگی و جیاوازی ئەم هەڵبژاردنە بوەستین و بدوێین، بەو هیوایەی کە بەرچاوڕوونی زیاتر بدەینە هاوڵاتیانی هەرێمی کورستان تاکو بتوانن ئازادانە بچن بەشداری هەڵبژاردن بکەن و دەنگی خۆیان بدەن بەو لایەنەی بە شایەنی حوکمڕانی هەرێمی دەزانن. 

لە هەڵبژاردنەکانی رابردوودا کوردستان هەنگاوێکی گەورەی نا بەرەو دروستبوونی دوو بەرەی دژ و نەیار بەیەک، لەلایەک لایەنەکانی دەسەڵات وەک دوو پارتە سەرەکیەکەی کوردستان، لەلایەکی تریش بەرەی رکابەر کە بە یەکەمین ئۆپۆزسیۆنی چالاک لە مێژووی هەڵبژاردنەکاندا هەژمار دەکرێت کە ئەویش بزووتنەوەی گۆڕان بوو. لەو سەردەمەدا بە روونی بینیمان کە (خەڵک) توانیان بەدەنگەکانیان و لە رێگەی سندوقەکانی دەنگدان هێزێکی جیاواز لە هێزی دەسەڵات ببەنە ناو پەرلەمان و ببنە دەنگی ئۆپۆزیسیۆن لەنێو ناوەندەکانی بڕیاردانی سیاسی و کۆمەڵایەتی و ئابووری، بەڵام بەداخەوە ئەمە زۆر درێژەی نەکێشا و لەساڵانی دواتردا بینیمان کە چۆن لایەنەکانی دەسەڵات توانیان ئەم دەنگە ناڕازی و ئۆپۆزسیۆنە بەزەبری هێز و چەک و پارە و بەرژەوەندی کەسی ئەم بزووتنەوەیە لەخشتە بەرن و بیگەیەننە قۆناغێک کە دەنگدەرەکانیان لە دوا هەڵبژاردنەکاندا سزای دیموکراسی ئەو بزووتنەوەیەیان داو لە ٢٥ کورسیوەوە دەنگەکانیان ببێتە سفر کورسی و تاکە یەک نوێنەریشیان سەرنەکەوێت لە هەڵبژاردنەکاندا، ئەمە نموونەیەکی زیندووی هێزی گەل و دیموکراسیە و بەچاوی خۆمان ئەوەمان بینی. 

لە راستیدا ئەم چەند دێڕەی سەرەوە، بۆ دروستکردنی بێهیوایی نیە کە خۆی لەخۆیدا کرۆکی کێشەکانە و (خەڵک) بڕوای تەنانەت بە دەنگدانیش و خودی پرۆسەی دیموکراسی هەڵبژاردن نەماوە، بەڵکو بە پێچەوانەوە هاندانێکی سەرسەختانەیە بۆ ئەوەی کە دیسان خەڵک و گشت بڕوا بەوە بهێننەوە کە تاکە رێگەی ئاڵوگۆڕی دەسەڵات و سیستمی فەرمانڕەوایی تەنها و تەنها لە رێگەی هەڵبژاردنەوە ئەنجامی دەبێت، بەوپێیە لایەنی فەرمانڕەوا خاوەنی هێز و جبەخانە و شۆڕشە و سەرجەم جومگەکانی دەسەڵاتە لە هەرێمەکەدا لەدەستی ئەواندایە، زۆر ئەستەم و سەختە (خەڵک) کە بێچەک و بێ دەسەڵاتە بتوانێت لەرێی توندوتیژییەوە گۆڕانکاری دروست بکات (ئەوەشمان بینی کە چۆن وەڵامی دەسەڵات بۆ خۆپیشاندان و ناڕەزایی، بریتی بوو لە فیشەک و خوێنڕشتن، بۆیە سندوقەکانی دەنگدان دەبنە ئەو مەیدانەی کە گشت بتوانێت سزای کەمینەی فەرمانڕەوا بدات (گەر بەدڵی نەبێت) هەروەها هێزی نوێ و خوێنی نوێ بهێنێتە ناو بازنەی دەسەڵات و بەهەمان شێوەش گەر نەیویست و بەدڵی نەبوو سزای بدات (وەک گۆڕان). بەوپێیەی لە دەستووری هەرێم و لە دەستووری عێراقی فیدراڵیشدا ئاماژەیەکی روون هەیە بۆ ئەوەی کە سیستمی فەرمانڕەوایی وڵاتەکە و هەرێمەکە دیموکراسیە، بۆیە بەپێی دەستوور روونکردنەوە و رۆشنکردنەوەی ئەم چەمکە کاری لەپێشینەی دامەزراوە دەوڵەتی و نادەوڵەتییەکانە تاکو دەنگدەرێکی بەئاگا لە ماف و ئەرکەکانی دروست ببێت و کەسانی شیاو هەڵبژێرن بۆ شوێنی شیاو، بە بەشداری کارای (خەڵک) لەدەنگدانێکی ئازادانەدا دەکرێت گۆڕانکاری ریشەیی لە هەرێمەکەدا دروست ببێت. 

هەڵبژاردن و گرێبەستی کۆمەڵایەتی:

تاکی دەنگدەر وەک چۆن ئەرکیەتی کەسانی دەستەبژێر هەڵبژێرێت بۆ ناوەندەکانی بڕیار و بەڕێوەبردن، بەهەمان شێوەش مافی هەیە لەوەی کە بەدواداچوون بۆ دەنگەکانی بکات و ئەو کەسانەی کە هەڵیبژاردوون پێویستە پارێزەری مافەکانیان بن و کاری لەپێشینەی بەرەوپێشبردنی بەرژەوەندیی گشتی بێت، نەک بەرژەوەندییە کەسیەکانی خۆی و دەوروبەری یان پارتە سیاسیەکەی. داڕشتنی گرێبەستێکی ئاکاری و کۆمەڵایەتی لەنێوان ئەم دوو کاراکتەرەی کە دەنگدەر و کەسی هەڵبژێردراوە، یەکێکە لە پێوەرە سەرەکیەکانی هەر سیستمێکی دیموکراسی لە دنیادا، بەوپێیەی دەنگدان پرۆسەیەکی بەردەوامە و پێویستە بە پێی دەستووری هەرێمەکە و وڵاتەکەش چوار ساڵ جارێک هەڵبژاردنی پەرلەمانی ئەنجام بدات بەبێ دابڕان و دواخستن، بۆیە ئەگەری چاودێربوونی دەنگدەران بەسەر سیستمی فەرمانڕەواوە زیاتر دەکات و دەسەڵاتی رەها دەداتە دەنگدەر کە دوای هەڵبژاردن بەدواداچوون بۆ پرۆگرام و ئەجێندای کەسانی هەڵبژێردراو بکات کە ئایا بە ئەرکی لەپێشینەی خۆی هەستاوە، کە ئەویش بەرژەوەندی گشتی و خەڵکە بەر لە هەر شتێکی تر. دروستکردنی رای گشتی (public opinion) ئەرکی لەپێشینەی پارێزگارانی دیموکراسیە و پێویستە کۆمەڵگەی مەدەنی و تاکی هوشیار و ناوەندە ئەکادیمی و باسکارییەکان بەشداربن لە دروستکردنی رای گشتی تەندروست و دوور لە ئەگەری هێنانەئارای تاکڕەوی و دەسەڵاتخوازی. 

لەئەگەری نەبوونی هیچ پێوەرێکی هەڵسەنگاندنی کارامەیی هەڵبژێردراوان، بێگومان رێخۆشکەرێکی سەرەکی دەبێت بۆ هاتنەئارای دەسەتخوازی و مانەوەی بەردەوام لە فەرمانڕەوایی بەبێ گوێدان و ترس لە ئەگەری سزادانی پارت و کەسانی هەڵبژێردراو لە خولەکانی دیکەی هەڵبژاردندا. بۆیە کارکردن لەسەر دروستکردنی دەنگدەری هوشیار و بەئاگا و ئازا و ئازاد، رۆڵێکی ریشەیی دەگێڕێت لە بەرەوپێشبردنی هەلومەرجە سیاسی و کۆمەڵایەتی و ئابوورییەکانی هەرێمەکەدا. ئەم گوتارە تەنها دەنگدەری ئۆپۆزسیۆن و بەرەی دژە دەسەڵات ناگرێتەوە، بەڵکو رووی دەمی ئێمە زیاتر لە تاکی نێو پارتە سیاسیەکانە، بەوپێیە ئەو دەسەڵاتەی کە دەدرێتە پارتەکان بۆ حومکڕانی، سەرچاوەی لە دەنگدەرەکانیانەوەیە، بۆیە گرنگە کە تاکی دەنگدەری وابەستە بە پارتە دەسەڵاتدارەکانەوە بزانێت کە حوکمی دەنگەکەی زیاترەو لێپرسراویەتی زیاتری لەئەستۆدایە بە بەراورد بەو دەنگدەرەی کە دژبەری پارتە دەسەڵاتدارەکانە و داوای گۆڕانکاری ریشەیی دەکات. ئەو دەنگدەرەی کە بڕیاردەدات دووبارە دەنگبداتەوە بەلایەنی دەسەڵات، مەرج نیە تەنها لەبەر ئەوەی کە ئەندامی ئەو پارتەیە ئیدی دەنگەکەی راستەوخۆ بۆ ئەو لایەنە بێت، بەڵکو گەر خۆی بە دەنگدەرێکی ئازا و ئازاد بزانێت و پێیوایە کە پارتەکەی ناتوانێت راستگۆ بێت و بەرژەوەندییەکانی گشت لەبەرچاو بگرێت، دەتوانێت نیشانەی راست لە هێزێکی دیکە و کەسێکی دیکە بدات و پارتی سیاسی دیکە تاقیبکاتەوە. بەڵام ئەگەر سوورە لەسەر ئەوەی دەنگبداتەوە بەو لایەنانە، پێویستە بەئاگابێت لەوەی کە ئەو گرێبەستێکی ئەخلاقی و ئاکاریی لەگەڵ هەڵبژێردراوەکاندا دەکات و دەتوانێت لەئەگەری نەبوونی مەرجەکانی هەڵبژێردراوێکی تەندروست کە کار بۆ بەرژەوەندی گشتی بکات، بیر لە ئەگەری دیکە بکاتەوە و وێنایەکی باشتر بۆ داهاتووی خۆی و نەوەکانی بهێنێتە ئاراوە. 

حوکمی یاسا:

لەهەردوو چەمکەکەدا بە روونی دەبینین کە دیموکراسی کۆن و نوێش لەسەر ئەم دوو چەمکە دەوەستێت و پێوەری بنەڕەتین لە ناوزەدکردنی هەرێم و وڵاتێک بە دیموکراسی. لەکۆی هەر پێنج شێوازەکەی دیموکراسی و لە هەر سێ شەپۆلەکانی دیموکراسیدا، حومکی یاسا (Rule of Law) کرۆکی سەرخەر و ژێرخەری ئەو حوکمداری و فەرمانڕەوایەتیەیە کە وڵاتەکە بەڕێوە دەبات، بەوپێیەی کە لەسیستمی دیموکراسیدا رۆڵی یاسا و حوکمی یاسا پێوەری ژمارە یەکە. نەبوونی هیچ هێزێک و لایەنێک لە سەروو یاسا، نیشاندەری ئەوەیە کە دەسەڵاتدارانی ئەو هەرێمە یان وڵاتە بەراستیانە کە دەیانەوێت فەرمانڕەواییەکی یەکسان و بێ جیاوازی شوێن و رەگەز و بیرکردنەوە بهێننە ئاراوە، چونکە هەموومان دەزانین کە دەستکەوتەکانی لایەنی حوکمڕان، کاتێک جێی رەزامەندی گشت ئەبێت کە لە خزمەت و بەرژەوەندیی گشتیدا بێت نەک تاک و پارتێک. بۆیە ئەمەش لەخۆبوردەیی شۆڕشگێڕەکانی دەوێت، بەوەی کە دەستبەرداری ئەو ئەگەرە حەتمیە بن، مادام ئەوان شۆڕشیان کردووە، کەواتە دەبێت هەر ئەوانیش حوکم بکەن. 

هەبوونی یاسا و حوکمی یاسا، زۆرتر لە بەرژەوەندی فەرمانڕەواکان و لایەنی دەسەڵاتدایە نەک تاکەکان بەتەنها، بۆ نمونە لەئەگەری دروستبوونی کێشیەکی یاسایی لەنێوان تاکەکانی کۆمەڵگەدا، رەنگە بابەتی کێشەکە ئەگەر ناکۆکی دارایی بێت، لە چەند سەد هەزارێک تێپەڕ نەکات، لەکاتێکدا لەکاتی هەبوونی کێشەیەکی یاسایی و ناکۆکی یاسایی لەسەر بابەتێک لەنێوان دەسەڵاتداراندا، چەندان ملیۆن یان ملیارد بێت، بۆیە هەبوونی حوکمی یاسا زیاتر لە بەرژەوەندی لایەنەکانی دەسەڵاتە وەک لە تاکەکانی کۆمەڵ. هەموومان دەزانین کە لە بێ یاساییدا و لەکاتی گەرەلاوژە (Chaos) دا ئەوە لایەنی پاوانخوازی دەسەڵاتە کە زۆرترین دەستکەوتی لە داهاتی نیشتمانی و نانیشتمانی دەست دەکەوێت، ئەوە دەسەڵاتە بەرژەوەندییەکانی خۆی دەخاتە سەروو هەموو شتێکەوە و داهاتی نیشتمانی و بەرژەوەندیی گشتی هەمووی دەخاتە خزمەت خۆی و پارتەکەیەوە، بەمەش مانەوە و بەردەوامی زیاتر بۆخۆی و دەوروبەرەکەی مسۆگەر دەکات، بۆیە تێگەیشتنی تاکی دەنگدەر لەسنورەکان و گرنگی و ئاستی بەشداریەکەی لەکاتی هەبونی گەندەڵی و پاوانخوازی لەو کەس و لایەنەی هەڵیبژاردوە، ناڕاستەوخۆ بەشدار دەبێت لە هەموو ئەو کارە خراپانەی کە پارتی دڵخوازی ئەو ئەنجامی دەدات، کەواتە ئەمە نیشاندەری ئەوەیە کە تا چەند گرنگە کە تاکی دەنگدەر ئاگایی هەبێت لە ئێستا و داهاتووی بڕیارەکەی وەک دەنگدەرێک، بۆیە هەبوونی بنەمایەکی بەهێز بۆ حوکمی یاسا دەتوانێت نەک تەنها مافەکانی ئەو تاکە بپارێزێت بەڵکو دەتوانێت حزمەتی گەورە بە بەرژەوەندیی گشتی بکات. 

بەرژەوەندیی گشتی:

پێناسەی جۆراوجۆر زۆرن، کە ئایا بەرژەوەندیی گشتی (Public Interest) چیە و کامەیە؟ بەڵام بەشێوەیەکی گشتی سەرجەم بیریار و فەیلەسوفان کۆکن لەسەر ئەوەی کە بەرژەوەندیی گشتی بریتیە لەهەر کردە، کار، یاسا، رێنمایی، یان چاکەیەک کە بۆ گشت خەڵکی بەبێ جیاوازی سوودبەخش بێت. واتە هەر یاسا و بڕیار و کردەیەک کە بتوانێت ژیانی گشتی باشتر بکات و بەرەوپێشی بەرێت، پێیدەوترێت بەرژەوەندیی گشتی. بۆیە بەکورتی دەتوانین بڵێین بیرکردنەوە و پلاندانان بۆ باشترکردنی ئەزموونی ژیان لەهەر کۆمەڵگەیەک کە دووربێت لە زیادکردنی بەرژەوەندییە کەسیەکان یان گروپێکی تایبەت، لەڕووی ئابووری، کۆمەڵایەتی، سیاسی، یاسایی و تەندروستیەوە، دەبێتە بەرژەوەندیی گشتی. 

ئێستا با بزانین ئایا هەلومەرجی بەرژەوەندیی گشتی لە هەرێمی کوردستان چۆنە و ئەزموونی خەڵک و گشت لەم هەرێمە چۆنە! بەدڵنیاییەوە ئەگەر ئەم پێوەرەی دیموکراسی کە بەرژەوەندیی گشتیە لەم هەرێمەدا لە ئاستێکی باشدا بوایە، تەنانەت پێویستمان بەوە نەبوو کە ئەم بابەتەش بنوسین و لەسەری رامان هەبێت، بۆیە بەداخەوە لە هەلومەرجێکی ناهەمواردا ئێمە ئەم باسە دەوروژێنین، چونکە لەکۆی نۆ کابینەی پێشووتری هەرێمی کوردستان، ئەم بابەتە جێی سەرنجی دەسەڵاتداران و فەرمانڕەوایانی هەرێمەکە نەبووە، بە نموونە: تاکو ئێستا و بەدرێژایی ٣٣ ساڵی رابردوو هەرێمەکە هێشتا تاکە رێگەی گواستنەوەی گشتی بریتین لە تەکسی و پاسی بچوک و بێکەلک و کۆن کە بەهیچ شێوەیەک لە سوودی گشت نیە، نەتوانراوە بیر لە هێڵی پاسی گشتی، ترام قیتار یان هیچ رێگەیەکی دیکە نەکراوەتەوە و تەنانەت شەقام و رێگەوبانەکانیش بەکەڵکی ئەوە نایەن کە بە ئۆتۆمبیلی تایبەتیش هاتوچۆ بکەیت. 

بەشێوەیەکی گشتی دەتوانین بڵیین کە بوونی هەزاران قوتابخانەی تایبەت بە پارەی زۆر و زانکۆی تایبەت و کەناڵی تەلەفزیۆنی تایبەت و رادیۆ و دامەزراوە و کۆمپانیا و کارگەی زەبەلاح و شار و شارۆچکەی تایبەت، لەبەرامبەریشدا پێچەوانەکانی بۆ بەرژەوەندی گشتی، واتە نەبوونی سیستمێکی باشی خوێندنی پێش و پاش زانکۆ، نەبونی خزمەتگوزاری گشتی لەناو شار و حزمەتگوزارییە گشتیەکان وەک کارەبا و ئاو و باخ و سەوزایی و ژینگەدروستی، نیشاندەری ئەوەیە کە لەم هەرێمەدا یەکێک لە بنەما سەرەکییەکانی دیموکراسی کە بەرژەوەندی گشتی و گشتگیربوونی دەستکەوتەکانی دیموکراسیە، بەتەواوەتی پشتگوێخراوە و سەرجەم بەرژەوەندییەکان کەسین و هەندێکجار لەنێوان تەنها چەندکەسێکی سەر بەلایەن یان دوو لایەن دا کورت دەبێتەوە و بەردەوام لەهەوڵی زیاترکردن و باشترکردنی بەرژوەندییە تایبەتەکانی خۆیانن و بەشێوەیەکی بەرچاو بەرژەوەندیی گشتی پشتگوێ خراوە. 

ئامانج لە روونکردنەوەی زیاتری ئەم بابەتە بۆ بەرچاوڕوونی تاکی دەنگدەرە، تاکو بزانێت کە لەکوێوە ماف و ئەرکەکانی وەک دەنگدەرێکی ئازاد دەستپێدەکات و پێوەرەکان دەبێ چیبن بۆ دەنگدان بەلایەنێکی دیاریکراوە، بێگومان ئەو دەنگدەرەی کە سەر بە لایەنێکی دیاریکراو بێت و دەستەمۆی بیری گشتێنراوی پارتەکەی بێت نایەوێت گوێی لەم راستیانە بێت و بەردەوام دەبێت لەزیاترکردنی هێز و بەرژەوەندی ئەو لایەنەی کە رێگرە لە باشترکردنی هەلومەرجی ژیانی گشتیدا، هەرچەندە هێشتا هیوایەک هەیە بۆ ئەوەی ئەو کەسە دەستەمۆیانەش بیربکەنەوە و بگەنە ئەو رادەیەی بڕوابەخۆبوون کە دەتوانن ئامانجێکی تر دەستنیشان بکەن و هێز و لایەنی دیکە تاقیبکەنەوە، تاکو بینەری گۆڕانکاری ریشەیی بن لە رێگەی سندوقەکانی دەنگدانەوە و رۆژگارێکی جیاوازتر بێننە ئاراوە کە بەرژەوەندیی گشتی ئامانجی سەرەکیان بێت، یان لانی کەم وەک لەسەرەوە روونکراوەتەوە هەوڵبدەن گرێبەستێکی ئاکاری لەنێوان خۆیان و لایەنەکانیاندا دروست بکەن، داوایان لێبکەن کە لەجیاتی گشت بیربکەنەوە و بۆ بەرژەوەندیی گشت. 

ئەنجام:

تاکی کوردستان نزیک دەبێتەوە لە ساتەوەختێکی مێژووی، کە ئەویش دەنگدانە بۆ هەڵبژاردنی دەهەمین خولی پەرلەمان و دەیەمین حکومەتی کوردی، بۆیە پێویستە بەرچاوڕوونی تەواوی هەبێت کە گرنگی بەشداریکردن و دەنگدان لەم هەڵبژاردنەدا لەچ ئاستێکدایە و بۆچی پێویستە بیر لەگرێبەستی ئاکاری و کۆمەڵایەتی بکاتەوە بۆ هێنانەئارای رۆژگارێکی باشتر بۆ هەرێمی کوردستان، بەوپێیەی کە خەڵك (گشت) ئەو هێزەیە کە دەتوانێت یەکلایی بکاتەوە کێ فەرمانڕەوایە و کێ لە دەرەوەی دەسەڵاتە! ئەگەر بڕوای وایە کە هێزەکانی دەسەڵات دەتوانن هەلومەرجێکی باشتر بخوڵقێنن دەتوانێت لەڕێی ئەو گرێبەستەوە کە بۆ چوار ساڵ بڕدەکات دەنگی خۆی بداتەوە بەو لایەنانە، بە مەرجێک بیری لای ئەوە هەبێت کە دوای چوارساڵ هەمان دەنگدەر بۆی هەیە کە بەدواداچوونێک بکات کە ئایا ئەو لایەنەی ئەم هەڵیبژاردووە ژیانی گشتی و تاکەکانی خۆشتر کردووە یان خراپتر، تاکو بڕیاربدات کە دەنگیان پێبداتەوە یان نا. لەلایەکی ترەوە گەر وادەزانێت کە لایەنەکانی دەسەڵات پاوانی هەموو بەرژەوەندییەکانیان کردووە بەس سوودی خۆیان و گشتیان پشتگوێ خستووە، ئەوە پێویستە ئەوە بزانێت کە ئەم دەنگدانەی ئەمجارە دەتوانێت دەنگی خۆی بداتە لایەنێکی دیکە کە وادەزانێت دەتوانێت خزمەتی زیاتر بکات و ژیانی گشتی باشتر بکات بەهەمان مەرجی ئەوەی کە گرێبەستی ئاکاری هەبێت لەگەڵیاندا. کاتی ئەوە نەماوە تەنها بۆڵە بۆڵ و خوتەخوت بتوانێت گۆڕانکاری دروستبکات، ئەوەی ئێوە بۆی دەگەڕێن و ناوی لێدەنێن گۆڕانکاری، لە سندوقەکانی دەنگدانەوە دەستپێدەکات و هەر لەوێش کۆتایی دێت، بۆیە ئازا بە و ئازاد بە و هەڵبژێرە.