هاوڵاتی لە نێوان دیموكراسیەت و سیستەمی دیسپۆتیزمیدا
PM:09:39:26/05/2022
5448 جار خوێندراوەتەوە
کەمال محەمەد
+
-
هاوڵاتی لە نێوان دیموكراسیەت و سیستەمی
دیسپۆتیزمیدا
دیموكراسی وەك دەستەواژەیەكی كۆنی یۆنانی
سەدەی پێنجەمی پێش زاینییە، دیموكراسی واتە رەخساندنی بواری لێبوردەیی و فرەلایەنی
و پێكەوە ژیان بە پێی بنەما دیموكراسییەكان، دیموكراسی واتە پاراستنی ماف و ئازادییەكانی
تاك و كۆ لەژێر سایەی دەسەڵاتی یاسادا، لە دیموكراسی و فەرمانڕەوایی گەلدا هەمو
بارودۆخە سیاسی و ئابوری و كۆمەڵایەتی و فەرهەنگییەكان لەبەرچاو دەگیرێت تاكو چارەنوس
و مافەكانی خۆیان تێدا بەرقەرار بچەسپێنن.
دیموكراسی واتە هێنانە كایەی یەكسانی
گشتی لە ڕێگەی یاسا بەسزادان و ڕای گشتیش بە لێپێچینەوە، بە مەرجێك یاساكان هاوسەنگی
لەنێوان بەرژەوەندییە كەسی و گشتییەكاندا دروست بكات لە پێناو ئەوەی ماف و بەرپرسیارێتی
ون نەبێت و بەرژەوەندی دەسەڵات لەگەڵ بەرژەوەندی تاكەكەس و گەلدا بگونجێت، لەسیستەمی
دیموكراسی كۆمەڵگای سیاسی رێكخراوتر ئەبێت و مرۆڤ و هێزە مەعنەوییەكانی بەرەو ئاستێكی
یەكسان و باڵاتر ئەبات و كۆمەڵگاش لە چاوچنۆكی ئیرادە تایبەتییەكانی پارێزراوتر ئەكات،
ئەمەش وا دەكات دەسەڵات لە سیستەمە دیموكراسییەكەدا دوچاری هەڵە نەبێت و سەرچاوەی
خۆی لەگەلەوە وەربگرێت و لەڕوی پێناسە و ناوەرۆكیشەوە تەنها مەبەستی بەرژەوەندی
گشتی بێت.
لەسیستەمی دیسپۆتیزمیدا كەسەرچاوەكەی بۆ
دوو هەزار ساڵ پێشتر ئەگەڕێتەوە دەسەڵاتەكان لەدەست چەند كەسانێكدایە و بەرژەوەندییەكانیان
وای خواستوە كە گەل پابەندی ئەو یاسایانە بكەن كە خۆیان دای ئەڕێژن و هەر خۆشیان لەسەرو
ئەو یاسانەوە بڕیاری لەسەر ئەدەن، واتە لە سیستەمی دیسپۆتیزمیدا هێزی جێبەجێكردن و بڕیار لەسەر كارپێكردنی یاساكان
لەگەڵ ئیرادەی گشتیدا یەكناگرێتەوە.
لە هەرێمی كوردستان سیستەمی دیسپۆتیزمی
وای كردوە كە بابەتی یاسا گشتی نەبێت و
دور نەبێت لە خواستی حیزب و بنەماڵەكان، ئەمەش وایكردوە چەمكی چاكە و یەكسانی و خۆشگوزەرانی
نەهێنێتە نێو كۆمەڵگا و سیستەمێكی دیموكراسی كە ئەركی بریتیی بێت لە مافە سروشتی و
یاساییەكان، لەم هەرێمەی ئێمە تا هەنوكە دەرفەت بە تاك و كۆمەڵگا نەدراوە تاوەكو لەپرۆسەیەكی
دیموكراسی وەك هەڵبژاردندا بەر بەم فشار و سیستەمە مەترسیدارە دا بگرێت كە وایكردوە
یاساكان تەعبیر نەبێت لە ئیرادەی گشتی، لەم سیستەمە دیسپۆتیزمییەی لێرەدا هەیە
دادگا و دادوەرەكان بوون بە ئامڕازێك بۆ بەرەنگاربونەوەی ئازادی و دادپەروەری هاوڵاتیان
نەوەك بەرەنگاربونەوەی ئەو ستەمكاری و قۆرخكارییەی كە حیزب و بنەماڵەكان دروستیان
كردوە.
یەكێك لە هۆكارەكانی بەردەوامی سیستەمە
دیسپۆتیزمییەكە نەبونی ئۆپۆزسیۆنێكی كارامە و خاوەن مۆڕاڵی سیاسییە كاتێك بەشداریكردنی
هاوڵاتیان لەپرۆسەی دەنگدانی گشتییدا ئەیكەنە ئامڕازێك بۆ بەشداریكردن لەدەسەڵاتی
گشتی بەڵام لە چوارچێوەی سیستەمە دیسپۆتیزمییەكە ئەمەش لە رێگەی گۆڕینەوەی ماف و ئازادییەكانی
كۆمەڵگا بە دەسەڵات، بۆیە گەشەنەكردنی عەقل و فیكری ئێمە هاوكاتە بۆ بەردەوامی ئەم
سیستەمە دیسپۆتیزمییە و ئەم جۆرە لە ئۆپۆزسیۆنانەی كە بەردەوام رێیان لە گۆڕانكاری و بواری مومارەسەكردنی ئازادییە راستییەكانیان
گرتوە و نەیانتوانیوە ببنە دەسەڵاتێك كە سنور بۆ ئەم سیستەم و دەسەڵاتە دابنێن.