ئەنجامی تاقیکردنەوەکانی پۆلی نۆیەمی بنەڕەتی بڵاوکرایەوە
یەکێتی و پارتی بەردەوامن لە فرۆشتنی نەوت بەشێوەی قاچاخ، وتەبێژی ئەپیکۆریش دەڵێت رۆژانە ٢٥٠ هەزار بەرمیل نەوت بەرهەم دەهێنین. هاوکات بەپێی زانیارییەکانی ئێن ئاڕ تی، جووت حزبەکە نەوتەکە بە چەند وڵاتێک دەفرۆشن و بۆ هەر بەرمیلێک ٤٠ دۆلار وەردەگرن و داهاتەکەشی کەس نازانێت بۆ کوێ دەچێت.
وەزارەتی پەروەردەی حکومەتی کاربەڕێکەری هەرێم رایگەیاند، ئەنجامی تاقیکردنەوەکانی خولی یەکەمی پۆلی نۆیەمی بنەڕەتی بڵاو کراوەتەوە و لە ئێستادا خوێندکاران دەتوانن ئەنجامەکان بەشێوەی دیجیتاڵی لەڕێگەی لینکێکی تایبەتەوە وەربگرنەوە.
بەڕێوەبەرایەتیی کەشناسیی هەرێم بڵاوی کردەوە، لە ماوەی ٩ـی سەرلەبەیانی ئەمڕۆ تاوەکو کاتژمێر ٩ـی ئەمشەو لەو ناوچانەی هەرێم کە بارانیان تێدا باریوە، لە ناوچەی سۆران زۆرترین بڕی باران باریوە کە بڕی ٨.٢ ملم بووە و لە زاخۆش کەمترین بڕی باران باریوە کە بەشێوەی دڵۆپ دڵۆپ بووە.
وەزارەتی بەرگری روسیا رایگەیاند، سوپاکەیان هێڵی بەرگریی هێزەکانی ئۆکرانیایان بەزاندووە لە هەرێمی خارکێڤ و چەند شارۆچکەیەکیان کۆنتڕۆڵ کردووە، سەرۆکی ئۆکرانیاش دۆخەکە بە مەترسیدار ناو دەبات و هێزی زیاتری رەوانەی بەرەکانی جەنگ کردووە.
ئەنجومەنی توێژینەوەی پزیشکی هندستان (ئای سی ئێم ئاڕ) ئامۆژگاری لە بارەی خواردنی چا و قاوەوە کردووە، هەروەها دەزگای پزیشکی لەم دواییانەدا ١٧ رێنمایی نوێی خۆراکی بە هاوبەشی لەگەڵ پەیمانگای نیشتمانی خۆراکی هندستان (ئێن ئای ئێن) خستە روو، کە ئامانج لێی هاندانی خووی خواردنی تەندروستە.
سەردانی شاندە بیانییەکان بۆ لای نەوەی نوێ بەردەوامە، شاندێکی نەتەوە یەکگرتووەکان سەردانی جوڵانەوەی نەوەی نوێی کرد و نەوەی نوێ جەختی کردەوە لەسەر ئەنجامدانی هەڵبژاردنی پەرلەمانی کوردستان.
دادگای سزای قورسی تورکیا ٢٢ـەمین دانیشتنی ئەنجامدا لەبارەی دۆسیەی خۆپیشاندانەکانی ساڵی ٢٠١٤ـی کۆبانێ کە لەلایەن پارتە کوردییەکانەوە رێکخرا دژی بێ هەڵوێستی تورکیا بەرامبەر هێرشی چەکدارانی داعش بۆسەر کۆبانێ، لە دانیشتنەکەدا لەسەر ئەو دۆسیە و چەند دۆسیەیەکی دیکە دادگا بڕیاری دا بە سزادانی سەڵاحەدین دەمیرتاش سەرۆکی پێشووی هەدەپە بە ٤٢ ساڵ زیندانی کردن.
وەزارەتی تەندروستی فەڵەستین رایاگەیاند، دوای ٢٢٢ رۆژ لە سەرهەڵدانی جەنگی نێوان حەماس و ئیسڕائیل، ژمارەی گیانلەدەستدان لە کەرتی غەززە بەرزبووەتەوە بۆ ٣٥ هەزار و ٢٧٢ کەس. دەشڵێت، لە ماوەی ٢٤ کاتژمێری رابردوودا ٣٩ کەس گیانیان لەدەستداوە.
پەیامنێری ئێن ئاڕ تی لە هەولێر رایگەیاند، ئامێرەکانی راکێشانی پارەی "هەژماری من" کار ناکات و بەهۆیەوە قەرەباڵغییەکی زۆر دروست بووە، هەربۆیە مووچەخۆرانی بەشدار لە هەژماری من ناتوانن مووچەکانیان وەربگرن.
نێردەی تایبەتی نەتەوە یەکگرتووەکان لە عێراق رایگەیاند، ئەنجام نەدانی هەڵبژاردنی پەرلەمانی هەرێم کۆتایی بە شەرعیەتی دامەزراوەکانی هەرێمی کوردستان دەهێنێت. دەشڵێت، " پێویستە بە زووترین کات هەڵبژاردنی پەرلەمانی هەرێم ئەنجام بدرێت".
راوێژکاری دارایی و ئابووری سەرۆک وەزیرانی عێراق بە دیجیتاڵ میدیای ئێن ئاڕ تی راگەیاند، سەرجەم ئەو قەرزانەی لە ساڵی ٢٠٠٣ـەوە، سندوقی دراوی نێودەوڵەتی داویەتی بە عێراق گەڕێندراونەتەوە و بە تێکڕا لە هەشت ملیار دۆلار تێپەڕی نەکردووە. دەشلێت، قەرزەکان پاڵپشتییەکی بەرچاویان پێشکەش بە چاکسازییە ئابووری و دارییەکانی عێراق کردووە".
لە سنورى کفری، بەشێک لە جوتیاران دژى رێگریکردن لە ساغکردنەوەی بەرهەمەکانیان گرد بوونەوە. دەشڵێن، "لە بازگەی عێراق رێگامان نادەن بەرهەمی دانەوێڵەکانمان بگوازینەوە بۆ سایلۆی دووزخورماتوو".
سەرۆک وەزیرانی عێراق بانکی TBI راسپاردووە بۆ گرتنەبەری کۆمەڵێک رێکار بە ئامانجی فراوانکردنی لقەکانی بانکەکە و زیادکردنی خزمەتگوزارییەکانى.
حکومەتی عێراق رایگەیاند، لە کۆتایی مانگی تەمووز کەمپی ئاوارەکان دادەخەن، بەڕێوەبەری کۆچ و کۆچبەرانی دهۆکیش بە ئێن ئاڕ تی راگەیاند، دەیانەوێت سەرجەم ئاوارەکانی شنگال بگەڕێنەوە ناوچەکانی خۆیان و بۆ ئەو مەبەستەش حکومەتی عێراق بۆ هەر خێزانێک بڕی چوار ملیۆن دیناری تەرخان کردووە. دەشڵێت، "ئاوارەکانی شنگال لەهەر پارێزگایەکی عێراق و هەرێم بیانەوێت بژین عێراق هاوکارییان دەکات".
رۆژی ١٦ـی ئایاری هەموو ساڵێک لەسەر ئاستی عێراق وەک رۆژی نیشتمانیی گۆڕەبەکۆمەڵەکان دیاری کراوە. یەکێتی نووسەرانی جینۆسایدی کوردستان بڵاوی کردەوە، تا ئێستا کەمتر ١٪ـی رووفاتی ئەنفالکراوان گەڕێندراونەتەوە هەرێم. لەکاتێکدا چەندین ساڵە پارتی و یەکێتی چەندین پۆستی باڵایان لە بەغدا هەیە و هیچ هەوڵێکیان بۆ هێنانەوەی یەکجاریی رووفاتی ئەنفالکراوان نەداوە.
بانکی ناوەندیی عێراق رایگەیاند، لەلایەن گەشتیاران و بازرگانان و بانکەکانەوە داواکاری بۆ کڕینەوەی زیاتر لە ٢٨١ ملیۆن دۆلار پێشکەش کراوە بە نرخی فەرمی، لەو رێژەیەش زیاتر لە ٢٢ ملیۆن دۆلاری بەشێوەی کاش بووە. لە بازاڕەکانی هەرێمیش نرخی دۆلار رووی لە دابەزین کردووە و ١٠٠ دۆلار بە ١٤٥ هەزار و ٧٥٠ دینار مامەڵەی پێوە دەکرێت.
بەڕێوەبەری ئۆفیسی هەولێری کۆمسیۆنی هەڵبژاردنەکانی عێراق رایگەیاند، دووبارە دەست بە تۆماری بایۆمێتری دەکرێت لە هەر چوار پارێزگاکەی هەرێم.
چاوگێکی ئاگادار لە وەزارەتی دارایی حکومەتی کاربەڕێکەر بە دیجیتاڵ میدیای ئێن ئاڕ تی راگەیاند، ئەو وەزارەت و دەزگایانەی کە ناویان لە لیستی مووچەدا نییە، چاوەڕوانن کە پارەکانیان لە بەغداوە بنێردرێت و راستەوخۆ دەست بە دابەشکردنی مووچەی مانگی نیسان دەکەن. دەشڵێت، "حکومەتی عێراق نەرمی نواندووە بۆ ناردنی مووچەی مووچەخۆرانی هەرێم لە کاتی خۆیدا".
دوای ئەوەی دوێنێ چوارشەممە داتاکانی پەیوەست بە داهاتی تاکەکەسی ئەمرکا بڵاو بووەوە، کاریگەری ئەرێنی بۆ بەرزبوونەوەی نرخی زێر دروست کرد و بەهۆیەوە گەیشتە دوو هەزار و ٣٩٠ دۆلار و بەراورد بە هەمان رۆژ ٤٠ دۆلار بەرزبوونەوەی بەخۆیەوە بینی. لە بازاڕەکانی هەرێمیش نرخی مسقاڵێک زێڕ شەش بۆ حەوت هەزار دینار بەرزبوونەوەی بەخۆیەوە بینیوە.
کەشناسیی هەرێم رایگەیاند، نمەباران لە ناوچە شاخاوییە سنوورییەکانی باکووری هەرێم دەبارێت، لە کاتەکانی دوانیوەڕۆشدا، لە چەند ناوچەیەکی هەرێم دابارین بەشێوەی تاوەباران دەبێت.
دوای ئەوەی بە بڕیارێک دەست کراوە بە تێکدانی مەیدانی ئاژەڵانی سلێمانی لەژێر ناوی پڕۆژەیەکدا، کاسبکارانی مەیدانەکە گرد بوونەوە. دەشڵێن، "سەرەڕای ئەوەی زەوییەکانمان لێ داگیر کراوە لەلایەن کۆمپانیایەکەوە، هیچ قەرەبوویەکیش ناکرێینەوە، نە بەزەوی نە بە پارە لە کاتێکدا ئەو زەویانە شارەوانی داویەتی پێمان".
شەوی رابردوو بەهۆی گڕگرتن و تەقینەوەی تانکەرێکی سوتەمەنییەوە لە رێگەی تۆپ عەسکەر – کەلار، کەسێک گیانی لەدەستدا.
پاش دابەزینی نرخی نەوت لە چەند رۆژی رابردوودا و لەگەڵ فراوانبوونی گرژی و ئاڵۆزییەکانی رۆژهەڵاتی ناوەڕاست نرخی نەوت جارێکی دیکە بەرزبووەوە، لە ئێستاشدا بەرمیلێک نەوتی خاوی برێنت بە ٨٣ دۆلار و ١٨ سەنت مامەڵەی پێوە دەکرێت.
وەزیری ناوخۆی عێراق رایگەیاند، لەگەڵ نزیکبوونەوە لە وەرزی حەجی ئەمساڵ، فەرمانیان کردووە بە دابیبنکردنی ئاسایشی تەواو لە دەروازەی سنووری عەرعەر و دابینکردنی کەشێکی سەلامەت بۆ تەواوی حاجیان. دەشڵێت، رۆژی ١٨ـی ئەم مانگە یەکەم گەشتی ئاسمانی حاجییان بۆ سعودییە دەستپێدەکات و گەشتە وشکانییەکانیش لە رۆژی ٢٢ـی ئەم مانگەوە دەست پێدەکەن.
وەزارەتی خوێندنی باڵا و توێژینەوەی زانستی عێراق رایگەیاند، بەپێی هەڵسەنگاندنێکی ماڵپەڕی "زە تایمز ئیجوکەیشن" بۆ دوو هەزار و ٢٤ زانکۆ لە کۆی ١٠٨ وڵات، زانکۆکانی عێراق بە پلەی ٣٧ـەمین هاتن لە رووی گرنگییە زۆرەی دەدرێت بە وانەوتنەوە و گواستنەوەی زانیاری و تێروانینی نێودەوڵەتی لە زانکۆکاندا.
وەزارەتى دەرەوەى ئەمریکا لە راپۆرتى ساڵانەیدا پێشێلکارییەکانى مافى مرۆڤی لە هەرێمى کوردستان بڵاوکردەوە و دەڵێت دەزگا ئەمنییەکانی هەرێم چەندین پێشێلکارییان بەرامبەر مافەکانی مرۆڤ ئەنجامداوە.
بەپێی ئەنجامی توێژینەوەیەکی ئەم دواییانە کە لە رۆژنامەی " The Sun British" بڵاوکراوەتەوە، تیایدا ئاماژە بەوە کراوە، یەکێک لە هۆکارەکانی قەڵەوبوونی منداڵان نانخواردنە لەبەردەم شاشەی تەلەفزیۆن یان ئامێرە ئەلکترۆنییەکان، بەو پێیەی شاشەکان، منداڵان سەرقاڵ دەکەن و بە درەنگ هەست بە تێربوون دەکەن، ئەمەش دواجار دەبێتە هۆی ئەوەی زیاتر لە پێویستی خۆی بخوات و قەڵەو ببێت.
بەڕێوەبەرایەتی هاتوچۆی دەربەندیخان رایگەیاند، بەهۆی چارەسەر نەکردنی کێشەکانیانەوە شۆفێرانی بارهەڵگر مانیان گرتووە و بەو هۆیەوە بە نزیکەی ١٠ کیلۆمەتر رێگا قەرەباڵغ بووە.
پەرلەمانی عێراق کارنامەی دانیشتنی رۆژی شەممەی هەفتەی داهاتووی بڵاو کردەوە و تێیدا مادەی سێیەمی دانیشتنەکە بریتییە لە هەڵبژاردنی سەرۆکی پەرلەمان.
وەزیری بەرگری ئیسرائیل رایگەیاند، رازی نابن بە حکومڕانی ئیسرائیل لە کەرتی غەززە لەدوای کۆتاییهاتنی حەماس لە ناوچەکە. وتیشی، داوای کردووە دەستەیەکی جێگرەوە لە جێی حەماس دیاری بکرێت بۆ حکومڕانیکردنی غەززە لەدوای کۆتاییهاتن بە شەڕ.