کوبە یەکێکە لە خواردنە
بەتامەکان و هەر ناوچەیە و بە دەستوری تایبەت بە خۆیان ئامادەی دەکەن، لەوانەش کوبەی
موسڵاوییە کە زیاتر بە بڕوێش ئامادە دەکرێت.
کەرەستەکانی:
دوو پەرداخ "پیرخەنی"
یان ساوەری ورد
یەک پەرداخ بڕوێش
کەوچکێکی چێشت خوێ
ئاوی شلەتێن
قیمە بەپێی ئارەزوو
سەلکێک پیازی جنراو
بەهارات "بیبەری
رەش و زیرە و کاری"
نیو دەسک کەرەوزی
وردکراو
زەیت
ئامادەکردنەکەی:
سەرەتا بڕوێش و پیرخەنی
و خوێیەکە تێکەڵ بکە، دواتر کەمێک ئاوی تێبکە کە بڕوێش و پیرخەنییەکە تەڕ بکات،
سەری داپۆشە و بۆ ماوەی کاتژمێرێک بەجێبهێڵە تاکو بە جوانی بخوسێن.
قیمەکە بکەرە تاوەیەکەوە
و لەسەر ئاگر دایبنێ، خوێ و پیاز و بەهاراتەکانی تێبکە تاکو کەمێک سور دەبێتەوە،
پاشان کەرەوزە جنراوەکەی تێبکە، دوای سوربوونەوەی لەسەر ئاگر دایبگرە و وازی
لێبهێنە تاکو سارد دەبێتەوە.
کەمێک قیمەی بێ چەوری
بکەرە ناو بڕوێش و پیرخەنییەکەوە و بە جوانی بیشێلە بەڵام بیرت نەچێت نابێت قیمەکە
چەوری پێوە بێت، دوای ئەوەی وەک هەویری لێدەرچوو بیکە بە گونک.
گونکەکان لەسەر نایلۆنێک
پانبکەرەوە، قیمەکە بکەرە ناو یەکێک لە گونکە پانکراوەکان و دانەیەکی تر بدە بە
سەریدا، بە سینییەک یان سەری مەنجەڵێک قاڵبی بگرە و زیادەکانی لێبکەرەوە و بیکەرە
ناو رۆنە قرچاوەکەوە و سوری بکەرەوە، لە کۆتاییدا لەگەڵ زەڵاتە پێشکەشی بکە.
ئ.ل