خانمان لە سووڕی مانگانەیاندا زۆرینەیان تووشی ئازار و گرژی و ناڕەحەتی دەبنەوە، کە ئەمە راددەکەی لە ژنێکەوە بۆ ژنێکی دیکە دەگۆڕێت، بەڵام بە گشتی کۆمەڵێك خواردن هەن پێویستە هەموو ژنێك لەو کاتەدا نەیخۆن بۆئەوەی ئازارەکانیان زیاد نەکات.

ماڵپەڕی " Arabic post" لە بابەتێکدا ئاماژەی بە چوار جۆر خواردن کردووە کە باشترە لە کاتی سووڕی مانگانەدا نەخورێن بۆئەوەی هەوکردن و ئازار و گرژی و ئاوسانی سكی خانمان زیاتر نەکات، کە بریتین لەمانە:

شیرینی و خواردنیی دووبارە:

وێڕای ئەوەی خواردنی شیرین بەتامە بەڵام خواردنی بەبڕێکی زۆر لەکاتی سووڕی مانگانەدا دەبێتە هۆی تووشبوون بە دڵەڕاوکێ و تێكجوونی میزاج و زیادبوونی ئازار و گرژی ناوسك.

هەروەها خواردنە دووبارە دروستکراوەکان لە کاربۆهیدرات وەك ئارد و کۆرنفلێکس شەکری شاراوەیان تێدایە کە بە هەمان شێوە ئازار زیاد دەکەن و کاریگەرییان خراپ دەبێت.

دووربکەوەرەوە لە کافایین:

تا دەتوانیت لەماوەی سووڕی مانگانەدا لە کافایین دووربکەوەرەوە چونکە دەبێتە هۆی تووشبوون بە دڵەڕاوکێ و خەمۆکی، هەروەها گرژی و ئازارەکان زیاتر دەکات.

خواردنە چەورەکان:

زۆرێك لە خانمان لەماوەی سووڕی مانگانەدا ئارەزووی خواردنی چەورییەکان دەکەن، کە ئەمەش دەکرێت ببێتە هۆی زیادبوونی هەوکردنەکان و تووشبوون پێیان، کە کاریگەریی دەبێت لەسەر زیادبوونی ئازاری سووڕی مانگانە.

بەرهەمە شیرەمەنییەکان

شیرەمەنییەکان بەشێکی سەرەکین لە سیستمی خواردنی هاوسەنگ، بەڵام لەکاتی سووڕی مانگانەدا هەڵبژاردنێکی باش نین چونکە ئازار و گرژییەکان زیاتر دەکەن و دەکرێت ببنە هۆی ئاوسان و غازات و تەنانەت سکچونیش.