خەنەبەندان ئاهەنگێکی بچوکی فۆلکلۆرییە و لە زۆربەی وڵاتانی ڕۆژهەڵات دەکرێت، هەر ناوچەیەکیش بەپێی نەریتی خۆی ئەو ئاهەنگە ساز دەکات، لە شەودا دەکرێت و لەلایەن خانمانەوە مێزی خەنەبەندان بە شێوازی جیاواز دەڕازێننەوە.

خەنەبەندان شەوێک پێش گواستنەوە و دوای خواردنی نانی ئێوارە ساز دەکرێت، تێیدا دەستەیەک کچ کە هاوڕێ و خزمی بوک و زاوان لە شەودا و بە پۆشاکی کلتوری تایبەت بە ناوچەکەی خۆیانەوە ئامادەی ئاهەنگەکە دەبن، پێس ئەو وادەیەش مێزی خەنەبەندان لەلایەن کەسە نزیکەکانی بوک و زاواوە دەڕازێنرێتەوە.

لەسەر مێزەکە جگە لە خەنە کە کەرەستەی سەرەکی شەوەکەیە، گوڵاو و پەڕەی گوڵی وشککراو و مۆم و چاوەزار و کۆمەڵێک شیرینی یاخو قاڵبێک کێک ئامادە دەبێت، دواتر بە شێواز و ستایلی جیاواز مێزەکە دەڕازێنرێتەوە، باوترین ڕەنگیش لەو شەوەدا سورە و بوکەکەش پۆشاکەکانی رەنگی سورە، لە کۆتاییدا بوک خەنە لە دەستی کچەکان دەدات.