شوان عەتوف هونەرمەند و سینەماکار لە لاپەڕەی تایبەتی خۆی لە ئینستاگرام لە نوسینێکدا ئاشکرایکردووە کە گەشتی سەختی کۆتایی هاتووە و ماڵئاویی لەم قۆناغە دەکات.

لە نوسینەکەدا شوان عەتوف بە دریژی باسی لە هەنگاوەکانی بەرەوپێشچوونی سینەما و فیلمسازی کردووە تا گەیشتووە بەم دۆخەی ئێستای، لە کۆتاییشدا ئاشکرایکردووە کە وەك خۆی بڕیاریداوە لەمەودوا لەم قاڵبەی ئێستا لە فیلمسازیدا دەربچێت و هەوڵبدات بۆ گەیشتن بە ئاستێك کە وابکرێت فیلمە کوردییەکان بتوانن بەشداری لە فێستیڤاڵە جیهانییە گەورەکاندا بکەن و چیتر فیلمسازەکان بچنە جیهانی بوونەوە و لە ناوەوە و دەرەوە فیلم خۆی بژێنێت.

درێژەی نوسینەکەش بەم جۆرەیە:

" لە كورتە فیلمی (ماڵ و كلیل) و بۆ فیلمی (بێ‌ نیشتیمان)، هیچ شتێك بۆ فیلمساز وەك ئەزموون نیە، ئەزموون و پراكتیك هەموو شتێك روون دەكاتەوە، ساڵی ٢٠١٤ ترس و فۆرم پێكەوە كورتە فیلمی (ماڵ وكلیل)ی بەرهەم هێنام پرسیاری ئەوەی بۆ فیلمەكانمان خاڵین لە (چەمك)، برۆ بۆ كورتە فیلمی (باخەكەی باوكم) و قوڵ بوونەوە لە رۆحی ئێكسپێرمێنتاڵ و ئینجا كورتە فیلمی (فرمێسك و دڵ) كە فرێمدایە تەنەكەی خۆڵ، هەتا كورتە فیلمی (دەلاك و دونیا) و دۆزینەوەی رەگی كارەكتەر لە هەناوی كۆمەڵگەدا و پەرینەوە بۆ شانۆ لە (تەپڵ و بەرد) كە ئیدی لێرەوە كارەكتەر لای من شوناسی وەرگرت و لە داهاتوودا درێژەی دەبێت (پەیكەری دڵ بەرهەم هات و هەمووتان ئەزانن چیە).

دەگەینە ٢٠١٩ و بەشداریەكانم وەك ئەكتەرلە فیلمی (سفر نۆ) و تێستكردنی ئاكشن و مقۆمقۆكانی و بەدوایدا فیلمی (ئەزموون) كە هەوڵێكی گرنگی بەرزكردنەوەی چاوی بینەری خۆمانە بۆ فیلمی خۆمان بە دوایدا فیلمی (بێ نیشتیمان) كە كار لەسەر خستنە قسەی كارەكتەری كورد دەكات و هەوڵدانە بۆ رزگاربوون لە دۆخی قوربانی و رزگاربوون لە پرۆدێكشنە گەندەڵەكان و پراكتیك كردنی راستەقینەی بیری سەربەخۆ لە فیلم دا، بەرنامەی كورد ئەكتەر بۆ برەو دان بە دنیای نواندن و فەرامۆشكردنی خیشكردن و كۆمەك نەكردنی لە زۆرینەی بەناو هونەرمەندی گەورە و هەتا دوایی، حەوت هەشت ساڵ كە تێیدا لەزەت و دارزین و هیلاكی و پێكەنین و ماناو جوانی و هەست و ئیرەیی و ماسك و بارۆكە و لێدان و سەركەوتن و شكان تا ئێستاش تێكەڵ بووە لەم ناوەندە زۆر هەژارەی ناوی سینما و سینەما كارەكانیەتی، لەگەڵ سەرجەم سینەماكار و هاوریێانی ئەم رێگەیە، بەرێم كرد بە سەختی.

هەنگاوی گرنگ بەدەست هات، سینەما خەریكە دەبێت بە بزنس، ژانرای جیا لە فیلم دروست بوو، ئیدی فیلمی كوردی بێ‌ بینەر نیە، ئەكادیمیایی سینما قوتابی پێدەگەێنێت، كۆمپانیاكانی ریكلام ئەزموون دەبەخشن، بەشەكانی سینمای حكومەت با كەمیش بێت؟ كورتە فیلم بەرهەم دەهێنن، سینەما سالم پرۆژەی رەخنەی فیلم ساز دەدات، فیستیڤاڵی سینەمایی سلێمانی با هێشتا زۆری مابێ‌ ؟ بەڵام ئەزممون دەكات، دەیان گەنجی بەتوانا درووست بوون لە هەموو بوارەكانی فیلم و بەرهەم هێنان، فیستیڤاڵی دهۆك بەردەوام گەشە دەكات (ئەگەر چی گەندەڵیش گەرای ترسناكی خۆی هەیە سوپایەكی بیر تیژی دەوێت دانە دانە ئەو گەرایانە قەڵاچۆبكات كە بازرگانی بە داهاتووی فیلمسازە خەوبینەوەكانەوە دەكەن) بەڵام گەشەش هەیە، ئەمە بێ‌ لەو هەوڵە سەربەخۆیانەی كە خۆرسكانە فیلم و كورتە فیلم بەرهەم دەهێنن، (هەموو ئەو فیلمسازانەی لەم ساڵە سەختانەی لەناو فیلم دروستكردن بەسەرمان برد پێكەوە من بە باوەرەوە ناوتان ئەنێم (خەباتگێر) لەبەرئەوەی لە هیچەوە شتی گەورە دروست ئەكەن، (ئەگەر چی هێشتا هۆڵەكانی سینەما رێزی فیلمە كوردییەكان ناگرێت و لەبری دیسكاونت پشك زیاددەكات لە كەرتی تایبەتەوە كە زۆرینەی خاوەنەكانیان كورد نین و بیانین و بە هیلاكی و فیلمەكانمان پێدەکەنن و گەمە ئەكەن) , ئەگەر تەنها هەشت ساڵ ئارامی ئابووری و سیاسی لەو مەملەكەتە هەبوایە دڵنیابووم سینەما زۆر باش پێش دەكەوت بەڵام سەرەرای ئەوەش سڵاو سوپاس بۆ هەموو هاورێكانم، ئەوانەی داهاتوو شاهید دەبێت كامتان بەراستی و هۆشیاریەوە درێژە دەدەن بە كار و پرۆژە و كامیشتان وەك (بێرگمان) ئەیوت لەواگۆنەكە دادەبەزن .

ئیستە ئیدی كاتی بیركردنەوەیەكی ترە، كاتی خوێندنەوە و رەخنەكردنێكی جدی ئەو فیلمانەیە كە هەموومان بەرهەممان هێناوون و لێوەی ئەو پرسیارە بكەین، بۆ ئێمە لەباشوور زمانی سینەماییمان نابێتە ئەو زمانەی كە فیستیڤاڵە گەورەكانی وەك و (كان) و (ئۆسكار ) وەرمان گرن؟ كەی لەم گرێ‌ی خۆ بەكەم زانینە سینەماییە رزگارمان دەبێت، بۆ فیلمساز و بەرهەمهێنەر و كۆمپانیای ئێمە ناتوانن پێ‌ بخەنە خاكی جیهانی بوونەوە، كەی رۆژگارێك دێت كە فیلم خۆی بژێنێت لەناوەوەو لەدەرەو؟ كەی ژیانی سینەمایی رێك دەخرێت لەم هەرێمە و كەی فیلمەكانمان هاوتەریبی خۆشی، مەستی بۆ بینەر، كۆمەڵگە و سیاسەت و هێزی دواكەوتوو دەترسێنن؟ (بۆ من داهاتوو هەمووی هەوڵ دەبێت بۆ وەڵامدانەوەی ئەم پرسیارانە ).

من بۆ خۆم پەنجەرەیەكی تر ئەكەمە و خەونێكی تر ئەبینم و ئیتر بای بای بۆ قۆناغی پێشوو.