قاوە یەکێکە لە خواردنەوە باوەکان و هەندێک کەس بۆ نەمانی هەستی خەواڵوی بەیانیان دەیخۆنەوە، یان لە کاتی کارەکانیان دەیخۆنەوە، زۆربەی رۆژووانیش لە مانگی رەمەزاندا لە نێوان نانی ئێوارە و پارشێو دەیخۆنەوە، بەڵام ئەم خواردنەوەیە بۆ هەموو کەسێک گونجاو نییە و زیانی هەیە.

بەگوێرەی ماڵپەڕی Eat this not eat thisی بەریتانی قاوە یەکێکە لەو خواردنەوانەی مەترسی توشبوون بە شێرپەنجەی پرۆستات کەمدەکاتەوە و ئەگەری لاوازبوونی ئاستی بیستنیش کەمدەکاتەوە، خواردنەوەی قاوەی تاڵ و رەش یارمەتیدەرە لە دابەزینی کێشی جەستە، بەڵام ئەم خواردنەوەیە وەک خواردنەوەکانی تر لایەنی نەرێنی هەیە و هەندێک کەس بیخۆنەوە زیانی تەندروستیان پێدەگەیەنێت، هەر بۆیە ئەم کەسانە دەبێت واز لە خواردنەوەی قاوە بهێنن:

یەکەم: ئەوانەی نەخۆشی قۆڵۆن و گرژی ریخۆڵەیان هەیە، چونکە ئەو خواردنەوانەی کافاینیان تێدایە رێژەی قەبزی زیاد دەکەن.

دووەم: ئەو کەسانەی نەخۆشی دڵیان هەیە، چونکە ئەگەری هەیە قاوە ببێتە هۆی تێکچوونی لێدانی دڵیان و زیانیان پێبگەیەنێت.

سێیەم: ئەو ژنانەی دووگیانن ، بەگوێرەی کۆلێژی پزیشکی ئەمریکی ژنانی دووگیان بۆ کەمبوونەوەی ئەگەرەکانی لەبارچوون پێویستە بڕی خواردنەوەی قاوە کەمبکەنەوە یان هەر نەیخۆنەوە.

چوارەم: ئەو ژنانەی شیردەدەن بە منداڵەکەیان، چونکە مەترسی وشکبوونەوەی جەستەیان لێدەکرێت و زیاتر هەست بە شەکەتی و ماندوێتی دەکەن.

پێنجەم: ئەو کەسانەی بەدەست خەوزڕانەوە دەناڵێنن.

شەشەم: ئەو کەسانەی گرفتی دەروونیان هەیە وەک خەمۆکی و نیگەرانی.

حەوتەم: منداڵانی خوار تەمەن ١٢ ساڵ نابێت قاوە بخۆنەوە، کاریگەریی لەسەر لێدانی دڵیان دەبێت.

هەشتەم: ئەو کەسانەی گەشکە یان فێیان هەیە، چونکە لێدانی دڵیان زیاد دەکات و حاڵەتەکەیان خراپتر دەکات.

نۆیەم: ئەو کەسانەی برینی گەدە و دڵەکزێ یان گرفتەکانی گەدەیان هەیە.

ئ.ل