پزیشکێکی پسپۆڕ بەناوی ئیرینا بێساریفا ئاشكرایکردووە، خواردنەوە گازییە شیرینەکان و ئاوی گازی وێڕای زیانەکانیان، بۆ کۆمەڵێکی دیاریکراو زیانی زیاتریان هەیە و نابێت بیخۆنەوە.

ئەو پسپۆڕە ئاشكرایکردوە، "رێنمایی بە خانمانی دووگیان نادەم کە خواردنەوەی گازی و سۆدا بخۆنەوە، چونکە ئەم خواردنەوەیە رێگە لە گەشەی کۆرپەکەیان دەگرێت"، وەك لە بابەتێکی ماڵپەڕی "روسیا تودەی"دا باسکراوە.

ئەو پسپۆڕە رێنمایی داوە بەوەی رێگە بە منداڵان و کەسە بەساڵاچووەکان نەدرێت کە خواردنەوەی گازی بخۆنەوە، هەروەها ئەو کەسانەی کە فشاری خوێنیان بەرزە و کێشەی دەمارەکانیان هەیە لەگەڵ ئەوانەی تووشی شێرپەنجەبوون ئەم خواردنەوانە نەخۆنەوە.

هەروەها وتویەتی، "ترشی فۆسفۆریك کە لەم خواردنەوانەدا هەیە، زیان بە مینای ددانەکان دەگەیەنێت و ترشی گەدە زیاتر دەکات، بۆیە ئەو کەسانەی کە کێشە لە کۆئەندامی هەرسیاندا هەیە و برینی گەدە و قۆڵۆنیان هەیە باشتروایە نەیخۆنەوە، چونکە ئەو ترشە کاریگەری نەرێنی دەبێت لەسەر مژینی کالسیۆم و ناهێڵێت بگات بە ئێسکەپەیکەر".

ئەوەشی روونکردووەتەوە، ئەم خواردنەوەیە دەبێتە هۆی زیادبوونی تینوێتی و وشكبوونەوەی دەم، ئەمەش وادەکات ئاوێکی زۆر بخۆنەوە و قورسایی لەسەر گورچیلە زیاتر ببێت.