لەکاتی وەرزی زستاندا، زۆرینەمان ئارەزووی خواردنەوەی گەرم دەکەین، بەڵام چونکە زۆرینەی خواردنەوەکان کافایینیان تێدایە، کاریگەرییان لەسەر کوالیتی خەو دەبێت.

شیر یەکێکە لەخواردنەوە باش و بەسوودەکان بۆ وەرزی زستان، ئەگەر هەندێك بەهاراتی تێبکرێت ئەوا چەندین سوودی گرنگی دیکەی بۆ تەندروستی دەبێت.

باشترین ئەو پێکهاتانەش کە دەتوانرێت بۆ شیر زیادبکرێت زەنجەفیل و دارچینە، کە چەندین سوودی دیکە بۆ شیر زیاد دەکەن، چونکە زەنجەفیل و دارچین دەوڵەمەندن بە دژەئۆکسیدەکان و کانزاکان، کە یارمەتیدەرن بۆ چارەسەری هەستیاری وەرزی، سەرما، داخرانی لوت، هەوکردنی قوڕگ و تێكچوونی هەرس.

هەروەها یارمەتیدەرن بۆ باشترکردنی کرداری هەرس و دابەزینی کێش، هەروەها کاریگەریی دژە هەوکردنیان لەسەر جەستە هەیە، کە هەوکردنەکان کەمدەکاتەوە.

بۆیە دەتوانن کوپێك شیر لەگەڵ دوو کەوچك زەنجەفیلی هاڕاو و کەمێك دارچین تێکەڵ بکەن و لەجیاتی شەکر هەنگوینی تێبکەن و بە گەرمی بیخۆنەوە بۆئەوەی تەواوی سوودەکانی لێوەربگرن.