زانایان پاشماوەی هێلکەی تیمساحێکیان دۆزیوەتەوە کە تەمەنەکەی دەگەڕێتەوە بۆ ١٥٢ ملیۆن ساڵ لەمەوبەر.

ئەم دۆزینەوەیە کە لە گۆڤاری زانستیی "PLOS ONE" بڵاوکراوەتەوە، بە کۆنترین هێلکەی تیمساح لە مێژوودا دادەنرێت و توانیویەتی مێژووی ناسراوی پەرەسەندنی ئەم زیندەوەرە بۆ ٤٠ ملیۆن ساڵ زیاتر بەرەو دواوە ببات.

یەکێک لە خاڵە هەرە سەرنجڕاکێشەکانی ئەم توێژینەوەیە ئەوەیە کە ئەم هێلکانە لە ناو شوێنی هێلکەکردنی دایناسۆرەکاندا دۆزراونەتەوە.

ژۆاو ڕوسۆ، توێژەر لە زانکۆی "نۆڤا دی لیسبۆا" ئاماژە بەوە دەکات کە تیمساحە دێرینەکان زۆر لە تیمساحەکانی ئێستا جیاوازتر بوون و خاوەنی جۆرەها شێوە و خواردنی جیاواز بوون، بەڵام شێوەی هێلکەکانیان لە ماوەی ١٥٠ ملیۆن ساڵدا گۆڕانکارییەکی ئەوتۆی بەسەردا نەهاتووە، ئەمەش نیشانەی جێگیریی تاقیگەیی و زۆربوونی ئەم ئاژەڵەیە لە مێژووی زەویدا.

ئەم دۆزینەوەیە چەندین پرسیاری نوێی لای زانایان دروست کردووە، بەتایبەت دەربارەی ئەوەی بۆچی تیمساحەکان و دایناسۆرەکان هەمان شوێنیان بۆ هێلکەکردن بەکار هێناوە؟ ئایا ئەمە نیشانەی هەبوونی ژینگەیەکی هاوبەش بووە یان پەیوەندییەکی تری لە پشتەوە بووە؟ ئەوەی ڕوونە ئەوەیە کە لە سەردەمی "جوراسیک"دا، تیمساحەکان لەگەڵ دایناسۆرە گەورەکاندا لەناو یەک سیستەمی ژینگەیی ئاڵۆزدا ژیاون و توانیویانە بە شێوەیەکی سەرکەوتوو نەوەکانیان بپارێزن.