بەشێک لە خەڵکی خوویان بەوەوە گرتووە کە مۆبایلەکانیان دەبنە ناو دەستشۆر و بەکاریدەهێنن، بەڵام توێژینەوەیەکی نوێی پزیشکی زانیارییەکی مەترسیدار لەسەر ئەمە ئاشکرا دەکات.

دکتۆر تریشا پاسریچیا لە ناوەندێکی پزیشکیدا لە بۆستن، رایگەیاندووە کە بردنە ژوورەوەی مۆبایل بۆ ناو دەستشۆر، مەترسی تووشبوون بە نەخۆشی " Hemorrhoids" بە ڕێژەی ٤٦٪ زیاد دەکات.

ئەم نەخۆشییە بریتییە لە ئاوسان و گەورەبوونی دەمارەکانی خوێن لە ناوەوە یان دەوروبەری کۆم، کە زۆرجار دەبێتە هۆی ئازار، خوران و خوێنبەربوون.

توێژینەوەکە ئاماژە بەوە دەکات کە کێشەکە تیشکی مۆبایلەکە نییە، بەڵکو ئەو کاتە زیادەیەیە کە بەهۆی سۆشیاڵ میدیا و خوێندنەوەی هەواڵەکانەوە لەسەر کورسی دەستشۆرەکە بەسەری دەبەیت، چونکە دانیشتنی درێژخایەن لەسەر کورسییەکی کراوە و بێ پاڵپشت، پەستانێکی زۆر دەخاتە سەر ئەو دەمارانە و دەبێتە هۆی ئاوسانیان، کە دەرەنجامەکەی تووشبوونە بە ئازارێکی زۆر، خوران و خوێنبەربوون.

لەمبارەیەوە پزیشکان هۆشداری ئەوە دەدەن کە تەنها پێنج خولەک دانیشتنی زیادە، دەکرێت ژیانت بگۆڕێت و تووشی ئازارێکی درێژخایەنت بکات کە چارەسەرکردنی ئاسان نەبێت.