پسپۆڕانی تەندروستی دووپاتیان کردەوە کە عاشقبوون زۆر باشە بۆ تەندروستی دڵ.

دکتۆر جۆی گێلبمان، پزیشکی دڵ بە ڕۆژنامەی نیویۆرک پۆستی ڕاگەیاندووە " خۆشەویستی و پەیوەندییە سۆزدارییەکان کاریگەری ئەرێنی لەسەر تەندروستی دڵ دروست دەکەن"

ئاماژەی بەوەشکردووە یەکێک لە تیۆرییەکان ئەوەیە کە عاشقبوون دەبێتە هۆی بەرزکردنەوەی ئاستی ئۆکسیتۆسین و دابەزینی ئاستی هۆرمۆنەکانی سترێس وەک کۆرتیزۆڵ، کە دەتوانێت پەستانی خوێن و تەندروستی دڵ و خوێنبەرەکان باشتر بکات.

ئۆکسیتۆسین کە بە "هۆرمۆنی خۆشەویستی" ناسراوە، لە کاتی بینینی خۆشەویستەکەت لە مێشکدا دەردەدرێت کە هەستی متمانە بەخۆبوون زیاد دەکات و فشاری دەروونی کەمدەکاتەوە بەمەش کاریگەری ئەرێنی لەسەر تەندروستی دڵ دروست دەکات.

ئۆکسیتۆسین دەتوانێت ڕێگری لە کۆبوونەوەی چەوری و کۆلیسترۆڵ لە خوێنبەرەکاندا بکات و تەنانەت پێچەوانەشی بکاتەوە بەم شێوەیەش مەترسی توشبوون بە نەخۆشی خوێنبەرەکان کەمدەکاتەوە.

جێگەی باسە بەپێی توێژینەوەیەکی ساڵی ٢٠٢٢ ئۆکسیتۆسین هاندەری دووبارە دروستبوونەوەی خانە و ماسولکەکانی دڵە ئەمەش وای لێدەکات بتوانێت شانەکانی دڵ چاک بکاتەوە دوای جەڵتەی دڵ.

بەپێی وتەی گێلبمان ئەو کەسانەی هاوسەرگیریان کردووە کەمتر تووشی جەڵتەی دڵ دەبن یان بەهۆی نەخۆشییەکانی دڵ و خوێنبەرەکانەوە دەمرن، هاوکات ئەو کەسانەی هاوسەرگیریان نەکردووە ڕێژەی مردن بە نەخۆشییەکانی دڵ و خوێنبەرەکان بە ڕێژەی لەسەدا ٤٥ زیاترە بە بەراورد بەو کەسانەی کە هاوسەرگیرییان کردووە.