پێشبینی دەکرێت لە سبەینێوە شەپۆلێکی باران و بەفر ناوچە جیاجیاکانی هەرێم بگرێتەوە و ماوەی چوار رۆژ بخایەنێت.

ئەمڕۆ دووشەممە ١٠ـی شوباتـی ٢٠٢٥، کەشناسی هەرێم رایگەیاند، ئەمڕۆ پلەکانی گەرما لە ناوچە شاخاوییەکان (٢ -٣) پلە نزم دەبێتەوە، بەلام بەگشتى لە ناوچەکانى تر نزیک دەبێتەوە لە تۆمارکراوەکانى دوێنێ.

ئاماژەی بەوەشکرد، سبەى ئاسمان لەنێوان هەور و نیمچە هەور دەبێت، لە کاتەکانی بەیانی ئەگەری کەمێک دابارینی نمە باران و بەفر هەیە لە ناوچەکانی رۆژئاوای هەرێم، پاشان کاریگەری درێژ دەبێتەوە تاکو کاتەکانی شەو بۆ ناوچە شاخاوییە سنووریەکان و زیاتر ناوچەکانی بادینان بەشێوەی نمە باران و برێکی کەم لە بەفر.

هاوکات، کەشناسی عێراق ئەوەشی خستەڕوو، پێشبینی دەکرێت لە سبەینێوە شەپۆلی بەفر و باران لە ناوچە جیاجیاکانی هەرێم دەستپێبکات و بۆ ماوەی چوار رۆژ شەپۆلەکە بەردەوام بێت.