وریا حەمەکەریم رۆژنامەنووسی دیاری کوردستان و پەیامنێر و پێشکەشکاری کەناڵی ئێن ئاڕ تی بەرەبەیانی ئەمڕۆ کۆچی دوای کرد.

وریا حەمەکەریم ساڵی ١٩٨٧ لە هەڵەبجە لە دایکبووە و هەر لەو شارەش نیشتەجێبووە، وریا بەرکەوتەی چەکی کیمیاوی بووە و خاوەنی دوو منداڵ بووە، ماوەی زیاتر لە ١٢ ساڵە وەکو پەیامنێر و پێشکەشکار لە کەناڵی ئێن ئاڕ تی کاریکردووە، لە وەرزی نوێی ئێن ئاڕتیدا پێشکەشکاری بەرنامەی گەڕیدە بووە، کە یەکێک بوو لە پڕبینەرترین بەرنامەکانی ئێن ئاڕتی و بەردەوام لە خەمی خەڵکدا بووە و کێشە و گرفتەکانی هاوڵاتیانی خستووەتەڕوو.

لە سنووری پارێزگای هەڵەبجە زۆرترین پرسی گەندەڵی ئاشکراکردووە و بەهۆی دەستبردنی بۆ کەسیە هەستیارەکان زیاترلە ١٠ جار توشی گرتن و دادگایی کردن بووەتەوە و بەشێک لە کەیسەکانیشی تائێستا یەکلایی نەکراونەتەوە.

وریا کەسێکی دەم بەخەندە و رووخۆش بووە و بەردەوام لەگەڵ خەڵکدا بووە جێگای خۆی لە دڵی بینەر و بیسەرانیدا کردبووەوە.

وریا حەمەکەریم لە ساڵی ٢٠٢٤دا لە پۆستێکدا لە فەیسبوکدا نوسیوویەتی: "هەموو سەرەتایەک کۆتاییەکی هەیە، بۆیە دەبێت خۆمانی بۆ ئامادە بکەین".

بەداخەوە کۆتایی ئەو لە بەرەبەیانی ٦ی ٢ی ٢٠٢٥دا و لە کاتژمێر ٤:٣٠ خولەکدا بوو، لەکاتێکدا کە وریا بەمەبەستی هاوکاریکردنی ئۆتۆمبێلێکی دیکە دەوەستێت لەسەر رێگەی عەربەت-سلێمانی و لەگەڵ شۆفێری ئۆتۆمبێلەکەی دیکەدا سەرقاڵی چارەسەرکردنی کێشەکە دەبن، لەو کاتەدا بارهەڵگرێک کۆنترۆڵ لەدەستدەدات و خۆی دەکێشێت بە ئۆتۆمبێلەکەیاندا و هەردووکیان گیان لەدەست دەدەن.